Расійскі пенсіянер загінуў на вайне. Затое яго сястры-беларусцы пашанцавала — атрымала адну пятую «Лады»
Праўда, машына не новая, таму долю Алены Цяраевай у «Ладзе» ацанілі толькі ў $250.
Грамадзянка Беларусі Алена Цяраева (дзявочае прозвішча — Дорахава) дамаглася ў Расіі праз суд, каб ёй аддалі пятую частку маёмасці Івана Дорахава — яе брата, які загінуў ва Украіне.
У красавіку 2024 года Іван Дорахаў, якому на той момант было 64 гады, паехаў паваяваць. Атрымалася так сабе — паміж момантам падпісання кантракту і яго знікненнем прайшло роўна два тыдні. А вось на тое, каб дастаць яго цела і ўзяць узоры ДНК для ідэнтыфікацыі, патрацілі больш за паўгода.
Зрэшты, дзяліць спадчыну не было асабліва каму. І бацькі, і жонка, і дзеці Івана ўжо памерлі. Тады чарга дайшла да братоў і сясцёр. Спачатку па спадчыну прыйшла сястра Вера. Пасля падключыліся і астатнія — Ігар, Юрый, Таццяна і Алена. Алена адзіная з іх грамадзянка Беларусі.
У выніку маёмасць загінулага падзялілі на пяць частак. Ад Івана застаўся дом рынкавым коштам $1100, гараж коштам $800, хлеў коштам $300, а таксама аўтамабіль.
І менавіта «Лада» — самае дарагое, што было ў Івана. Аўтамабіль 2005 года ацанілі ў $1250.
А на рахунках ляжалі яшчэ і рэшткі пенсіі — прыкладна $275.
Усё гэта дабро ў выніку і падзялілі паміж пяцю братамі і сёстрамі.
Каментары