Чарговы раўнд вайны паміж Беларусьсю і Латвіяй.
На гэтым тыдні Рыскі акруговы суд вырашыць лёс санаторыю «Беларусь»: кампанія T.E.K.Group LLC хоча за даўгі арыштаваць маёмасьць Адміністрацыі прэзыдэнта Рэспублікі Беларусь.
У сакавіку 2006 г. санаторый «Беларусь» пазьбег вельмі сумнай рэчы: Юрмальскі суд спыніў судовы працэс кампаніі T.E.K.Group LLC, якая патрабавала арыштаваць дом адпачынку.
Гісторыя, у эпіцэнтры якой апынуўся санаторый «Беларусь», пачалася ў 2002 г. Тады кампанія T.E.K. Group LLC заключыла дамову з латвійскай фірмай Konsultācijas pakalpojumi. І вось кансультацыйная фірма параіла T.E.K. Group LLC выдатную зьдзелку: заключыць дамову з Адміністрацыяй прэзыдэнта Беларусі аб фінансаваньні закупак сырой нафты ў Расеі.
Нафта прызначалася для Дзяржаўнага вытворча‑гандёвага УП «Белая Русь», кіраўніком якога і зьяўлялася Адміністрацыя Лукашэнкі. Аднак «Белая Русь» пасьпяхова разарылася, а кіраўніцтва фірмы села ў турму. У выніку T.E.K. Group LLC, згодна з умовамі дамовы, вырашыла судовым шляхам спагнаць страты з Адміністрацыі прэзыдэнта Беларусі і кампаніі Konsultācijas pakalpojumi. А для забесьпячэньня пазову афшорка патрабавала накласьці арышт на маёмасьць Беларусі ў Латвіі — санаторый «Беларусь». Пры гэтым T.E.K. Group LLC прад’явіла да выкананьня ў Юрмальскі суд рашэньне міжнароднага арбітражнага суда Гандлёва‑прамысловай палаты РФ.
Аднак Юрмальскі суд палічыў, што арыштоўваць маёмасьць трэба ня ў Латвіі, а ў Беларусі. Рыскі акруговы суд і мусіць даць ацэнку гэтаму рашэньню.
Не да канца таксама ясны лёс санаторыю «Бурштынавы бераг», што належыць Расеі.
Каментары