Паводле вучэньня фройдамарксістаў, падтрымка партый, якія выступаюць за рэжым моцнай рукі, і жаданьне пайсьці на халадзец можа тлумачыцца адным і тым жа завуаляваным прынцыпам садамазахічнага задавальненьня.
У абодвух выпадках узбуджэньне адбываецца за кошт акцэнтаваньня на сытуацыі пакутаў. Ахвяра нямецкага людаеда ішла на сьмерць, смакуючы наперад, як ёй адрэжуць пэніс і засмажаць яго з часныком. Расейскі выбаршчык упадаў у электаральны экстаз, канструюючы ў падсьвядомасьці вобразы Чубайса, які пакутуе на нарах, і згвалтаванай амэрыканцамі Радзімы.
Калі эратычная афарбоўка Радзімы-маці яшчэ зразумелая, дык вобраз лідэра РАТ «АЭС» у паласатай куфайцы, які гэтак смакуецца расейцамі ды выклікае акт глыбокага задавальненьня і нават нейкага ўзвышэньня, мне асабіста чужы і незразумелы. Атрыманьне амаль сэксуальнага задавальненьня ад пакутаў лібэрала (лібэраласадафілія), відавочна, зьяўляецца новай фазай разьвіцьця расейскай камасутры, невядомай нам, цёмным людзям на балоце. Спрабаваў узбудзіцца, малюючы ў думках Лябедзьку ў эратычнай топ-целагрэйцы, аднак арганізм усе фантазіі рашуча сабатаваў.
На шляху інтэграцыі, побач з праблемамі прыватызацыі «Белтрансгазу» і ўвядзеньня адзінага грашовага сродку, узьнікла новая — розныя вэктары сэксуальнай актыўнасьці. Ці здольны братэрскія славянскія народы аб’яднацца без адзінай сыстэмы сэксуальнай кампэнсацыі?
Вырашыць праблему можна двума сродкамі. Паводле Эрыха Фрома, дэструктыўнасьць пераадольваецца рацыяналізацыяй. Мадэль камунізму і ёсьць неабходнай рацыяналізацыяй — грамадзтва, пабудаванае на ідэях братэрства, роўнасьці і шчасьця. Аднак, баюся, ідэі адмены грошай, роспуску войска і паліцыі, перадачы ўлады мясцовым саветам і іншыя прыбамбасы камуністычнай фармацыі «бацьку» не спадабаюцца.
Адзіны спосаб ліквідаваць сэксуальную палярызацыю славянаў — даручыць Анатолю Чубайсу правесьці ў Беларусі энэргетычную рэформу. «Руды шэльма» хутка прывучыць нас да вэерных адключэньняў сьвятла, стоадсоткавай аплаты за ЖКГ, тэхнікі бясьпекі пры карыстаньні буржуйкамі і газьнічкамі, сынхранізуючы такім чынам флюіды расейскіх і беларускіх Я і Яно.
Магчыма, яшчэ ня ўсё загублена ў нашай сэксуальнай адукацыі. Веру: яшчэ прыйдзе дзень, калі навіна аб арышце удзельнікаў пікету АГП заменіць беларусам пігулку віягры і кліп «Тату».
Лёлік Ушкін
Каментары