«ЭпіВакКарона» неэфектыўная супраць кавіду і нават шкодная. А ёй прышчапляўся Макей
«Медуза» прааналізавала вынікі прымянення расійскай вакцыны ад кавіду «ЭпіВакКарона», а таксама іншых расійскіх вакцын на аснове звестак аб захворвальнасці ў Маскве летам 2021 года. Гэтыя вынікі пацвярджаюць тое, пра што многія ўжо здагадваліся, але ніхто не мог статыстычна даказаць, піша выданне: «ЭпіВакКарона» неэфектыўная.
Больш за тое, яна можа быць шкодная, бо дае прышчэпленым ілжывае адчуванне абароны і тым самым стымулюе вялікую захворвальнасць.
Так, паводле «Медузы», унутраныя звесткі аб захворванні дэпартамента здароўя Масквы пацвярджаюць наяўнасць ахоўнай эфектыўнасці ў «Спутніка V», прычым супраць больш цяжкага цячэння яна павышаецца.
А вось па выніках прымянення «ЭпіВакКароны», якую распрацаваў новасібірскі цэнтр «Вектар», у гэтай вакцыны ў Маскве не выявілася якой-небудзь эфектыўнасці наогул.
Прычым сярэднія значэнні эфектыўнасці сыходзяць у мінус для ўсіх узроставых груп: -16% для групы 18-50 і яшчэ ніжэй для старэйшых груп. Магчыма, гэта звязана з цалкам зразумелым і чаканым змяненнем паводзін людзей пасля прышчэпкі: яны пачынаюць весці больш актыўны лад жыцця, разлічваючы на абарону, якой няма.
Даследаванні ў Санкт-Пецярбургу таксама паказалі, што эфектыўнасці няма.
Разам з тым, падкрэслівае выданне, «ЭпіВакКарона» чамусьці працягвае выпускацца і прымяняцца ў Расіі ў 2022 годзе, таму Мінздароўя краіны павінна адклікаць яе рэгістрацыю як прэпарату без даказанай эфектыўнасці, а таксама апублікаваць вынікі экспертызы, паводле даных якой ён быў зарэгістраваны.
А распрацоўшчык «ЭпіВакКароны» — цэнтр «Вектар» — павінен апублікаваць даныя клінічнага даследавання III фазы, якое вядзецца з пачатку 2021 года і аб выніках якога да гэтага часу нічога не вядома.
У лістападзе 2021 года паведамлялася, што «ЭпіВакКаронай» прашчапіўся міністр замежных спраў Беларусі Уладзімір Макей.
«Так, я зрабіў прышчэпку расійскай вакцынай, якая была ў наяўнасці, — «ЭпіВакКаронай», — казаў тады міністр у інтэрв'ю РІА «Навіны».
Паводле яго слоў, пасля гэтага ўдалося пабываць у многіх краінах, і «калі здаеш ПЛР-тэсты, атрымліваеш адмоўны вынік». «Значыць, вакцына дзейнічае, і дзейнічае эфектыўна», — дзяліўся назіраннямі кіраўнік МЗС Беларусі.
НАН: Беларуская вакцына ад кавіду выпрацоўвае антыцелы не горш за сусветныя аналагі. Але ёсць нюанс
У Беларусі зноў пачала расці колькасць новых выпадкаў кавіду. А што ў суседзяў? ГРАФІКІ
Цяпер чытаюць
Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы4
Каментары