Малады, але вопытны слуцкі барсетачнік стаміўся жыць дома па законе — паехаў ваяваць за Расію і знік у штурме
Уладзімір Ямец — з тых людзей, якія вечна жывуць пад увагай органаў. Гэты 29-гадовы рэцыдывіст з вёскі Ячава пад Слуцкам пачаў чысціць машыны яшчэ неўпаўналетнім. Браў усё, што бралася, нават шасціграннікі — такіх на блатным жаргоне называюць барсетачнікамі. Умудрыўся сесці нават за парушэнне прэвентыўнага нагляду. Цяпер яго цела шукае сястра.
У сацыяльных сетках з'явіўся зварот беларускі Вікторыі, якая называе сябе сястрой без вестак зніклага расійскага байца Уладзіміра Ямца.
Яна расказвае, што яе брат апошнія два гады жыў у горадзе Нявіннамыск у Стаўрапальскім краі Расіі.
Гэта нічым не адметны, шараговы горад у перадгор'і Каўказа, удвая большы за Слуцк. Туды часам залятаюць украінскія беспілотнікі, а летась трое каўказцаў заштурхалі нагамі ў мясцовым бары ветэрана «СВА», які перасоўваўся на мыліцах.
«3 лютага 2025 года Уладзімір падпісаў кантракт [з расійскай арміяй]. Ведаю, што пазыўны «Бульбаш». 22 ці 23 чэрвеня выйшаў на баявое заданне. З 24 [чэрвеня] не выходзіў на сувязь. Лічыцца без вестак зніклым. Дапамажыце, калі ласка, знайсці», — просіць Вікторыя.
Па пазыўным становіцца ясна, што Ямец мае дачыненне да Беларусі. І гэта так. Згодна з інфармацыяй з базы «Белпола», Уладзімір Ямец — гэта ўраджэнец вёскі Ячава з-пад Слуцка. Ён крымінальнік, якога не раз судзілі за крадзяжы з машын.
Пачынаючы з 2014 года, Ямец не вылазіў з калоній.
Першую сваю машыну ён з падзельнікамі адпрацаваў яшчэ ў 2012 годзе, калі яму было 17. Тады суд абмежаваўся ўмоўным тэрмінам.
Уладзімір скончыў ПТВ, уладкаваўся слесарам у Слуцкую ЖКГ. Але ў 2014 усё ж сеў па-сапраўднаму — за тое ж самае. Ямцу далі тры з паловай гады калоніі.
У 2017-м вызваліўся і атрымаў прэвентыўны нагляд, але напляваў на гэта і раскатваў па краіне. У выніку пасля пары адміністратывак атрымаў крыміналку за невыкананне рэжыму і зноў паехаў у калонію.
Як Ямец апынуўся ў Стаўрапальскім краі, невядома. Чым займаўся — таксама.
Па словах сястры, ваяваў ён у 1-й гвардзейскай мотастралковай брыгадзе (в/ч 41680).
У інтэрнэце поўна зваротаў сваякоў, якія шукаюць інфармацыю пра сваіх родных, якія ваявалі ў той жа брыгадзе.
Гэтая часць ваюе на Пакроўскім кірунку — месцы бесперапынных мясных штурмаў, у якіх украінскія беспілотнікі і артылерыя штодня сотнямі выкашваюць расійскіх салдат. Сваіх параненых рускія адтуль не забіраюць.
Гісторыя Ямца нагадвае гісторыю іншага маладога беларускага крымінальніка Ігара Сакалоўскага, якому пашчасціла не загінуць, а здацца ў палон.
Нядаўна ён расказаў украінцам пра тое, як падпісаў кантракт, каб не быць дэпартаваным у Беларусь, а потым быў да ніткі абабраны ў расійскім войску. Пасля чаго яго, нарэшце, адправілі на забой.
Чытайце таксама: Малады беларускі крымінальнік трапіў на вайну, здаўся ўкраінцам і красамоўна апісаў парадкі ў расійскай арміі
Цяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА119
Аляксандр Лукашэнка так ляснуўся на лёд на хакеі, што трыбуны замерлі ВІДЭА
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары