Алега Груздзіловіча спачатку затрымалі 16 ліпеня, падчас пагрому мінскага офіса «Радыё Свабода», ён адсядзеў тады 10 сутак. 23 снежня яго затрымалі паўторна.
Суд над Алегам пачаўся ўчора. Былога журналіста «Радыё Свабода» абвінавачвалі у трох эпізодах удзелу ў «масавых беспарадках» падчас пратэстаў супраць фальсіфікацыі выбараў 2020 года і гвалту (артыкул 342). Пракурор запатрабаваў пакараць Груздзіловіча тэрмінам у 1,5 года зняволення ў калоніі агульнага рэжыму.
Таксама Груздзіловічу выставілі іск на 56 тысяч рублёў.
Журналіста ўчора дапыталі па кожным эпізодзе: дзе знаходзіўся і што рабіў у даты, выстаўленыя ў абвінавачванні. Алег адказаў, што 16 жніўня 2020 года меў акрэдытацыю МЗС Беларусі ў якасці карэспандэнта «Радыё Свабода» і быў у камізэльцы з надпісам «Прэса», а 11 і 18 кастрычніка працаваў як пазаштатны журналіст «Народнай волі», выконваў сваю працу, бо з канца жніўня МЗС пазбавіў свабодаўцаў акрэдытацыі.
Сведкам на працэсе учора выступіў рэдактар «Народнай волі» Іосіф Сярэдзіч, які расказаў суду, што Алег выконваў рэдакцыйнае заданне па асвятленні падзей.
***
Алег Груздзіловіч — адзін з найвядомейшых беларускіх журналістаў. Яго стаж налічвае амаль 40 гадоў.
