Da IV Źjezdu biełarusaŭ śvietu, arhanizavanaha MHA «Baćkaŭščyna», zastaŭsia miesiac: «My praviadziom źjezd — u Biełarusi ci za jaje miežami». Karespandent «NN» Arkadź Šanski hutaryć z staršynioj Rady Mižnarodnaj hramadzkaj arhanizacyi ZBS «Baćkaŭščyna» Alenaj Makoŭskaj.
«NN»: Dzie i jak maje adbyvacca Źjezd biełarusaŭ śvietu?
Alena Makoŭskaja: U adpaviednaści z rašeńniem Małoj rady źjezd projdzie 16—17 lipienia. Jość damoŭlenaść na pamiaškańnie Mižnarodnaha adukacyjnaha centru IVV (Miensk, praspekt hazety «Pravda», 11).
«NN»: Kolki delehataŭ budzie brać udzieł u źjeździe?
AM: Miarkujecca ŭdzieł kala 400 čałaviek — paroŭnu ź Biełarusi i zamiežža. Škada, što źjezd budzie doŭžycca tolki dva dni. Vopyt i praktyka pakazvajuć: ludziam, jakija pryjaždžajuć z dalokaha (i navat blizkaha) zamiežža, chočacca bolš času paprysutničać na radzimie. Finansy abmiažoŭvajuć nas. Praŭda, šmat chto z udzielnikaŭ zatrymajecca daŭžej. Vitaŭt Kipiel ci Janka Zaprudnik z ZŠA pryjeduć nie na dva dni, a na miesiac i bolš… Ale heta ŭžo budzie pa-za našaj prahramaj.
«NN»: Chto jašče ź viadomych asobaŭ užo daŭ zhodu na pryjezd?
AM: Kiraŭnik Zhurtavańnia biełarusaŭ Vialikabrytanii Alena Michaluk, mahčyma, a. Alaksandar Nadsan. Z palityčnych pryčyn nia zmoža pryjechać Staršynia Rady BNR Ivonka Surviłła, adnak jana vielmi dapamahaje ŭ praviadzieńni źjezdu. Pa stanie zdaroŭja nie pryjeduć Kastuś Akuła z Kanady dy Janka Žučka z Belhii, što braŭ udzieł va ŭsich źjezdach.
«NN»: Jaki stan siońniašniaj biełaruskaj dyjaspary? Ci kantaktujuć emihranty novaj chvali sa starymi emihrantami?
AM: Na žal, pakaleńnie pavajennaj emihracyi pastupova adychodzić. Što da maładych, treba ŭličvać nastupny fakt. Maładyja emihranty ŭ Eŭropie imknucca zasnoŭvać novyja arhanizacyi, a ŭ Kanadzie, ZŠA, Aŭstralii jany dałučajucca da starych arhanizacyj.
«NN»: Peŭny čas cyrkulavała infarmacyja, što ŭłady źbirajucca pravieści svoj, alternatyŭny źjezd…
AM: Ułady nieadnarazova aficyjna zajaŭlali pra namier pravieści mižnarodny kanhres biełarusaŭ, ale pakul panuje maŭčańnie.
«NN»: A ciapier dziaržava dapamahaje ci zaminaje?
AM: Na pačatku hodu my źviarnulisia ŭ ministerstvy adukacyi, kultury, infarmacyi, kab jany vykazali svaje prapanovy nakont źjezdu, dy zaprasili pradstaŭnikoŭ ministerstvaŭ da ŭdziełu ŭ forumie. Bo delehataŭ źjezdu cikavić dziejnaść hetych ministerstvaŭ. Adnak my nie atrymali adkazu. Mahčyma, aficyjny Miensk vyrašyŭ trymać dystancyju. Nia vyklučana, što ŭ nas uźniknuć prablemy z pamiaškańniami. Ale jany ŭ nas byli i na minułym źjeździe…
«NN»: Nie baiciesia, što pamiaškańnie moža «źniknuć» u samy apošni momant?
AM: Mahu skazać adno: u adpaviednaści z našym statutam, miesca praviadzieńnia źjezdu moža być luboje — ci ŭ Biełarusi, ci pa-za jaje miežami. Abmiarkoŭvalisia mnohija varyjanty: Vilnia, Biełastok, Kijeŭ, Smalensk… Viadoma, kali źjezd nia ŭdasca pravieści tut, to spatrebicca niekalki miesiacaŭ, kab padrychtavać jaho ŭ inšym miescy. Častka ludziej, jakija pryjeduć na hety źjezd, nia zmohuć uziać udzieł u novym źjeździe. Ale tady źjezd papoŭnicca inšymi pradstaŭnikami biełaruskaj dyjaspary.
Kamientary