«Eŭrasieć» pahražaje sychodam ź biełaruskaha rynku

Hienieralny dyrektar biełaruskaha filijała «Jeŭrasieci» — najbujniejšaha sotavaha retejlera ŭ SND — Aleś Muchin nie vyklučaje sychodu kampanii z rynku Biełarusi.

«Raźvićcio kampanii «Jeŭrasieć» na miascovym rynku budzie zaležać ad hatoŭnaści dziaržavy padstavić plačo svaim dobraprystojnym partnioram», — zajaviŭ jon u ekskluziŭnym kamientaryi BiełaPAN. I padkreśliŭ: «Pakul takoj padtrymki my nie adčuvajem».

«Kali takaja padtrymka budzie adsutničać, to kampanii, jakija pryniali rašeńnie pracavać u Biełarusi pa absalutna prazrystych i zakonnych schiemach, buduć prosta vymušany pakinuć rynak», — skazaŭ A.Muchin. Jon zaznačyŭ, što «Jeŭrasieć» — heta kamiercyjny, a nie dabračynny prajekt, dla jaho važnaja akupnaść. U Biełarusi ž z‑za vysokich padatkaŭ i vialikaj doli «šeraha» impartu (pavodle niekatorych acenak, jana składaje 70‑75%) rentabielnaści damahčysia ciažka.

«Nie tak daŭno byŭ pryniaty šerah rašeńniaŭ, jakija istotna ŭskładnili dla nas umovy viadzieńnia biźniesu z‑za pavieličeńnia koštu aparataŭ, — patłumačyŭ kiraŭnik biełaruskaha filijała «Jeŭrasietki». — Pa padatkaabkładajemaj bazie miascovy padatak z prodažu pavialičany z 5 da 15%. Aprača taho, dahetul dziejničaje rašeńnie ab aklejvańni kantrolnymi znakami karobak z telefonami, jakija lehalna pastaŭlajucca ŭ Biełaruś, za miežami mytnaj terytoryi respubliki. Heta dastatkova pracajomkaja i zatratnaja pracedura. U vyniku ŭ canie «biełaha» mabilnaha telefona da 7% składajuć zatraty na naniasieńnie kantrolnych znakaŭ».

Druhi istotny momant, na dumku A.Muchina, zaklučajecca ŭ tym, što «dziaržava sprabuje zarabić nie na abarocie, a na adzinkavaj ździełcy, bo ciapier pryjarytet u atrymańni dachodaŭ z rynku mabilnych telefonaŭ na dziaržaŭnym uzroŭni lažyć nie ŭ pavyšeńni abarotu za košt źnižeńnia cen, admieny pošlin i, u kančatkovym vyniku, u pavyšeńni prodažu». «Ciapier dziaržava sprabuje atrymać usie pastupleńni ŭ biudžet ź pierśpiektyŭnaha rynku adrazu, pavialičvajučy ceny na mabilnyja telefony za košt pošlin i miascovych padatkaŭ», — skazaŭ A.Muchin.

Pavodle jaho słoŭ, dabaŭleńnie 15% tolki miascovaha padatku da koštu tavaru vyklikaje istotnaje padzieńnie abarotu dla pradaŭcoŭ i prymušaje zadumacca mnohich ab rentabielnaści biźniesu jak takoha.

Raniej ab namiery vyvieści biźnies ź Biełarusi zajaviŭ staršynia savieta dyrektaraŭ kampanii «Jeŭrasieć» Jaŭhien Čyčvarkin. U červieni hetaha hoda kampanija ŭžo pakinuła azierbajdžanski rynak, ale ž jana tolki vyjšła na jaho ź piaćciu sałonami. «Padatki tam uzraśli na 10%, i my ŭžo idziem da strataŭ», — patłumačyŭ Ja.Čyčvarkin.

Nahadajem, pieršy sałon sotavaj suviazi ŭ Biełarusi «Jeŭrasieć» adkryła ŭ vieraśni 2005 hoda. U mai 2007 hoda kolkaść mahazinaŭ była daviedziena da 100, adnak chutka paśla hetaha niekalki sałonaŭ zakrylisia.

Ciapier kampanija «Jeŭrasieć» pradstaŭlena prykładna 4.900 mahazinami ŭ Rasii, va Ukrainie, u Biełarusi, Małdovie, Estonii, Łatvii, Litvie, Kazachstanie, Kyrhyzstanie, Uźbiekistanie, Armienii. U 2006 hodzie kolkaść naviednikaŭ sałonaŭ «Jeŭrasieci» pieravysiła 700 młn. čałaviek. U pieršym paŭhodździ 2007 hoda abarot kampanii skłaŭ 2,6 młrd. dołaraŭ.

• 0
• 0
• 0
• 0
• 0
• 0
• 0
• 0