Bieniedykt XVI abviaściŭ siońnia ab svaim rašeńni pakinuć Pasad sv. Piatra. Śviaty Ajciec spasłaŭsia na stan svajho zdaroŭja i niemahčymaść naležnaha vykanańnia svajho słužeńnia. Papa abviaściŭ heta 11 lutaha na zvyčajnaj kansistoryi.
«Ja paklikaŭ vas na hetu Kansistoryju nie tolki z pryčyny troch kananizacyj, ale i paviedamić vam rašeńnie, jakoje maje vialikaje značeńnie dla žyćcia Kaścioła. — skazaŭ Bieniedykt XVI, źviartajučysia da kardynałaŭ — Razvažyŭšy heta šmat razoŭ u sumleńni pierad Boham, ja nabyŭ upeŭnienaść, što praz stały ŭzrost maje siły nie dastatkovyja, kab naležnym čynam ažyćciaŭlać słužeńnie sv. Piatra. Ja całkam uśviedamlaju, što heta słužeńnie ŭ svajoj duchoŭnaj sutnaści pavinna vykonvacca nie tolki praź dziejańni i słovy, ale nie ŭ mienšaj stupieni, praź ciarpieńnie i malitvu. Adnak, kab kiravać łodkaj sv. Piatra i abviaščać Jevanhielle ŭ sučasnym śviecie, schilnym da chutkich źmien i chvalavanym pytańniami, jakija majuć vialikaje značeńnie dla žyćcia viery, nieabchodnaja jak siła cieła, tak i ducha, jakaja ŭ apošnija miesiacy asłabieła ŭ mianie nastolki, što ja pavinien pryznać svaju niazdolnaść dobra vykonvać daručanaje mnie słužeńnie. Tamu, całkam uśviedamlajučy surjoznaść hetaha akta, u poŭnaj svabodzie, ja zajaŭlaju, što ja admaŭlajusia ad słužeńnia Rymskaha Biskupa, Nastupnika sv. Piatra, uskładzienaje na mianie kardynałami 19 krasavika 2005 hoda, tak, što z 28 lutaha 2013 hoda, ad 20.00, rymski pasad, Pasad sv. Piatra budzie zvolnieny (sede vacante), i paŭstanie nieabchodnaść, kab tyja, chto maje kampietencyju, sklikali Kankłaŭ dla abrańnia novaha Papy.
Darahija braty, ja dziakuju vam ad usiaho serca za ŭsiu luboŭ i pracu, praź jakuju vy nieśli sa mnoj ciažar majho słužeńnia, i prašu prabačeńnia ŭsich maich chibaŭ. Ciapier my davierajem śviaty Kaścioł apiecy Najvyšejšaha Pastyra, Pana našaha Jezusa Chrysta, i prosim Jaho Najśviaciejšuju Maci Maryju, kab dapamahała svajoj maciarynskaj dabrynioj Ajcam Kardynałam u abrańni novaha Papy. Kali havorka idzie pra mianie, u budučyni ja chaču słužyć usim sercam, usim addanym malitvie žyćciom, Śviatomu Božamu Kaściołu», — zaklučyŭ Benedykt XVI u svaim paviedamleńni, skiravanym da kardynałaŭ.
Cikava, što dla zajavy Papa vykarystaŭ svaju ŭlubionuju łacinskuju movu: «Quapropter bene conscius ponderis huius actus plena libertate declaro me ministerio Episcopi Romae, Successoris Sancti Petri, mihi per manus Cardinalium die 19 aprilis MMV commissum renuntiare…»
Kamientary