Z kastryčnika novy pakiet sankcyj zapracuje napoŭnicu. Jak da hetaj daty rychtujucca biznes i hruzapieravozčyki?
Abmiežavańni raniej užo dziejničali ŭ dačynieńni da Rasii, ale ciapier raspaŭsiudziacca i na našu krainu.
Ščylina začyniajecca
Rada Jeŭrasajuza pryniała novy pakiet sankcyj suprać Biełarusi 29 červienia 2024 hoda. Pryniatyja abmiežavańni raniej užo dziejničali ŭ dačynieńni da Rasii. Hetym pakietam, pa mierkavańni jeŭrapiejskich čynoŭnikaŭ, zakryli samuju vialikuju ščylinu ŭ sankcyjnym režymie — kab Rasija nie mahła lohka abychodzić abmiežavańni z dapamohaj Biełaruś.
Pry hetym, za niekatorymi vyklučeńniami, abaviazki pa kantraktach, zaklučanych da 1 lipienia 2024 hoda, mohuć praciahvać vykonvacca da 2 kastryčnika 2024 hoda.
Tamu biełaruskija i rasijskija imparciory imknulisia pastavić jak maha bolej tavaraŭ ź Jeŭropy da kastryčnika.
Pad abmiežavańni trapili bolš za 200 mytnych kodaŭ z samych roznych hrup tavaraŭ.
«Zajavak na pieravozku stała mienš»
Pa słovach hruzapieravozčykaŭ, u žniŭni-vieraśni adbyvajecca sapraŭdny bum.
«Apošnija miesiacy byli, možna skazać, vielmi dobryja ŭ płanie zarobkaŭ, ale ŭžo ciapier my adčuvajem, što kolkaść zajavak na dastaŭku tavaraŭ značna skaraciłasia», — havoryć dyrektar transpartnaj kampanii.
Jon čakaje, što z kastryčnika hruzapatok źmienšycca.
«Buduć padać taryfy, a razam ź imi i zarobki. Prynamsi ciapier pierśpiektyvy vyhladajuć nie vielmi pazityŭnymi, pakolki pieralik hruzaŭ, jakija možna było dastaŭlać, skaracicca».
Čyhunka zamiest fury
Inšy surazmoŭca, jaki pracuje łahistam, kaža, što apošnim časam nazirajecca pieraraźmierkavańnie hruzapatoku z aŭtamabilnaha transpartu na čyhunačny.
«Abjomy dastavak pa čyhuncy vyraśli, a furami, naadvarot, krychu prasieli», — śćviardžaje łahist.
Na jaho dumku, hetamu spryjaje adrazu niekalki faktaraŭ.
«Pa-pieršaje, my nazirajem, što ciapier kampanii nabyvajuć tavary z zapasam, bo paśla 1 kastryčnika dastaŭlać ich u Biełaruś i Rasiju stanie jak minimum składaniej.
Ciapier skłałasia takaja situacyja, kali adnyja i tyja ž tavary jeŭrapiejskija mytniki nie prapuskajuć praz aŭtadarožnyja punkty propusku, ale afarmlajuć, kali jany iduć čyhunkaj.
Naprykład, kali jość harantyjny list ad vytvorcy, to pa čyhuncy ŭsio vydatna vyjazdžaje, a kali z tym ža tavaram i listom adpravić furu, to šancaŭ na prajezd amal niama», — tłumačyć łahist.
Što imparciory buduć rabić paśla 1 kastryčnika?
Śpiecyjalist miarkuje, što tyja tavary, jakija niama čym zamianić, buduć dastaŭlać u Biełaruś i Rasiju i paśla 2 kastryčnika.
«Imavierna, źmienicca schiema dastaŭki. Mahčyma, jašče bolš prasiadzie dastaŭka aŭtatranspartam, ale kazać, što ŭsio całkam spynicca, nie vypadaje», — ličyć surazmoŭca.
Ciapier, pa jaho słovach, nabiraje papularnaść dastaŭka z udziełam kampanij z Kyrhyzstana, Kazachstana i navat Tadžykistana, jaki i ŭ JEAES nie ŭvachodzić.
Taksama jon kaža, što rasijanie ŭsio čaściej zamaŭlajuć dastaŭku praz Turcyju abo Rumyniju.
«Dastaŭka adbyvajecca da Kanstancy (Rumynija), a adtul moram adrazu ŭ Rasiju. Inšy varyjant — praz Turcyju i Hruziju. Praz heta atrymlivajecca, što dastavić sankcyjonku ŭ Rasiju navat praściej, čym u Biełaruś».
Azija ŭ trendzie
Kožnyja novyja abmiežavańni skaračajuć abjomy pastavak tavaraŭ u Rasiju praź Biełaruś. Pradstaŭnik bujnoj suśvietna viadomaj kampanii, jakaja aficyjna syšła z Rasii jašče ŭ 2022-m kaža, što praz bolš darahuju łahistyku rasijskija klijenty vymušany zamianiać pradukcyju anałahami kitajskaj vytvorčaści.
«Kampanii, jakija syšli z Rasii, nasamreč vydatna bačać, jak ich pradukcyja pa-raniejšamu traplaje na rasijski rynak. Heta lohka adsačyć, bo kali niešta pierastaje pastaŭlacca naŭprost u Rasiju, to pačynajuć raści abjomy pastavak hetych tavaraŭ u Turcyju i krainy Centralnaj Azii», — tłumačyć śpiecyjalist.
Tym nie mienš heta nie aznačaje, što Rasija nie adčuvaje ŭpłyvu ad hetych abmiežavańniaŭ.
«Statystyka pakazvaje, što praz trecija krainy traplaje pryblizna tolki 2/3 ad tych abjomaŭ, što pastaŭlalisia raniej. Praz składanuju łahistyku i dadatkovyja schiematozy kančatkovaja cana vyrastaje. Adpaviedna, źnižajecca popyt. U dadatak adbyvajecca zamiena mnohich pazicyj anałahami z «siabroŭskich» krain», — adznačaje surazmoŭca.
Aŭtapierahonny biznes — usio? Chutka stanie nielha pradavać rasijanam śviežapryhnanyja mašyny ź ES i ZŠA
«Chočuć prymusić ludziej pracavać za kapiejki». Dalnabojščyki — pra namiery pazbavić ich biaspłatnych miedycynskich pasłuh
«Biełarusnafta» sudzicca za niepastaŭku abstalavańnia adrazu ź niekalkimi zachodnimi kampanijami
Bondarava zachacieła dvuchmoŭja, jak u Finlandyi. My taksama za4
Kamientary
(...)Praz heta atrymlivajecca, što dastavić sankcyjonku ŭ Rasiju navat praściej, čym u Biełaruś.