Hitleriuhiend, humaryst, celibat: dziesiać faktaŭ pra Bieniedykta XVI

Najstarejšy

Jozef Ratcynhier naradziŭsia ŭ 1927 hodzie ŭ maleńkaj viosačcy ŭ Bavaryi ŭ siamji palicyjanta. Bieniedykt XVI byŭ pieršym Papam niamieckaha pachodžańnia amal za tysiaču hadoŭ. Na momant abrańnia Ratcynhiera Papam jamu było 78 hadoŭ — heta adzin z najstarejšych kiraŭnikoŭ Katalickaha kaścioła za ŭsie viaki.

Hitleriuhiend

Kažučy pra Bieniedykta XVI, niemahčyma abminuć staronki jaho bijahrafii časoŭ Druhoj suśvietnaj. U 1941 Jozef Ratcynhier ustupiŭ u Hitleriuhiend, dzie prajšoŭ kursy pamočnika zienitčyka. U 1944 trapiŭ u viermacht, adnak dezierciravaŭ adtul. Znachodziŭsia ŭ pałonie. Hetyja staronki ź bijahrafii Papy nie vielmi afišavalisia, ale ŭsio adno vychodzili vonki. Kažuć, što mienavita padziei, pieražytyja ŭ hady nacyskaha režymu, pierakanali Ratcynhiera, što carkva pavinna stajać na pazicyjach praŭdy i svabody.

Viedaje dziasiatak movaŭ

Adukacyju Ratcynhier atrymlivaŭ u Miunchienie (fiłasofija i teałohija). U 1951 paśviačany ŭ śviatary. U 1953 atrymaŭ stupień doktara teałohii, abaraniŭšy pracu pa spadčynie śviatoha Aŭhustyna. Ratcynhier zarekamiendavaŭ siabie jak adzin z najlepšych teołahaŭ Niamieččyny i Jeŭropy. Jaho charaktaryzavali jak navukoŭca, što addaje pieravahu «intelektualnym sprečkam». Razmaŭlaje na niamieckaj italjanskaj, anhlijskaj, łacinie, iŭrycie, ispanskaj i na niekatorych inšych movach.

Patrabavaŭ admieny celibatu

U 1970 Jozef Ratcynhier byŭ siarod tych niamieckich teołahaŭ, što vystupili z patrabavańnie admieny dla katalickich śviataroŭ celibatu. Adnak u budučyni jon źmianiŭ svoj punkt hledžańnia. Tamu budučy Papam jon nie padymaŭ hetaj temy. Zatoje Bieniedykt XVI dapuściŭ prymalnaść vykarystańnia preziervatyvaŭ u krajnich vypadkach. Da hetaha času katalickaja carkva vystupała suprać luboha vykarystańnia kantraceptyvaŭ. Homaseksualizm Bieniedykt ličyć hrachom.

Humaryst

Letaś u Lejpcyhu vyjšła kniha aniekdotaŭ pra Papu Rymskaha, a taksama viasiołyja historyi i žarty ad samoha pantyfika. «U daścipnych žartach i viasiołym charaktary Papy vyjaŭlajucca narodnaja mudraść bavarca, jaki apynuŭsia ŭ centry italjanskaj stalicy», — adznačali vydaŭcy zbornika.

Sustrakaŭsia z Łukašenkam, ale nie pryjechaŭ u Biełaruś

U krasaviku 2009 Alaksandr Łukašenka ŭ Vatykanie mieŭ pryvatnuju razmovu z Papam Bieniedyktam XVI. Heta byŭ pieršy vyjezd Łukašenki ŭ Jeŭropu paśla admieny sankcyj. Tady Papa taksama pryniaŭ padarunak ad Mikałaja Łukašenki — bukvar pa-rasiejsku. Tym nie mienš kankardat pamiž Biełaruśsiu i Vatykanam tak i nie byŭ zaklučany. Łukašenka nieadnakroć kazaŭ pra mahčymaść vizitu Papy ŭ Biełaruś. Ale pajezdka praz pazicyju pravasłaŭnaj carkvy tak i nie adbyłasia.

Pomnik u Łučai

Pieršy ŭ śviecie pomnik Bieniedyktu XVI adkryty ŭ miastečku Łučaj Pastaŭskaha rajona. Paŭstaŭ jon pierad kaściołam dziakujučy namahańniam ksiandza Mikałaja Lipskaha. Kaścioł u Biełarusi pry Bieniedykcie XVI praciahvaŭ biełarusizavacca.

Misija Hudžeroci

U vieraśni letaś apostalski nuncyj Vatykana Kłaŭdyjo Hudžeroci naviedaŭ u turmach biełaruskich palitviaźniaŭ. U viaźnicach jon pieradavaŭ vitańni ad Papy. Palitviaźni atrymali vializnuju maralnuju padtrymku, viedajučy, što pra ich molicca kiraŭnik Katalickaha kaścioła. Na Kubie Bieniedykt XVI zaklikaŭ žycharoŭ vostrava «šukać sapraŭdnuju svabodu».

Tvitar

Papa Bieniedykt nie byŭ refarmataram, u adroźnieńnie ad papiarednika Jana Paŭła II. Tym nie mienš, jamu taksama davodziłasia paśpiavać za časam. Naprykład, mieć mikrabłoh u Tvitary. Byŭ pieršym Papam, jaki naviedaŭ televizijnuju pieradaču, kab adkazać na pytańni hledačoŭ.

Nastupnik

Nie paśpieŭ Papa abvieścić pra svoj sychod, jak bukmiekiery ŭžo skłali śpis mahčymych nastupnikaŭ Bieniedykta. Nazyvajucca imiony nastupnych kardynałaŭ: haniec Piter Tarksan, kanadziec Mark Uele, nihieryjec Frensis Arynzie. Ale zusim nie fakt, što niechta ź ich stanie nastupnym Papam.

• 0
• 0
• 0
• 0
• 0
• 0