Nacyjanalny bank Biełarusi ŭzmacniaje žorstkaść patrabavańniaŭ da kambankaŭ u častcy valutnaha kredytavańnia. Pra heta śviedčyć list kiraŭnictva Nacbanka, nakiravany kamiercyjnym bankam.
Rašeńnie rehulatara źjaviłasia ŭśled za adpaviednymi rekamiendacyjami Mižnarodnaha valutnaha fondu.
U liście, jaki na minułym tydni atrymali kamiercyjnyja banki, paviedamlajecca, što kiraŭnictvam Nacbanka «ŭ metach abmiežavańnia kredytnych ryzykaŭ bankaŭ, źviazanych z valutnymi ryzykami ich daŭžnikoŭ», pryniata pastanova, jakaja ŭnosić źmienu ŭ instrukcyju ab narmatyvach biaśpiečnaha funkcyjanavańnia dla bankaŭ i niabankaŭskich
Rehulatar adznačaje, što ŭ suviazi z pryniatym rašeńniem valutnaje kredytavańnie budzie adnosicca da apieracyj z bolš vysokim kaeficyjentam ryzyki.
«Źmieny, što ŭnosiacca, praduhledžvajuć vykarystańnie bankami pry raźliku pakazčykaŭ dastatkovaści narmatyŭnaha kapitału vahavoha kaeficyjenta ryzyki 150 pracentaŭ dla kredytnaj zavinavačanaści, kaštoŭnych papier rezidentaŭ Respubliki Biełaruś, naminavanych u zamiežnaj valucie, a taksama dla kredytnaj zavinavačanaści, mižbankaŭskich kredytaŭ i depazitaŭ, zabiaśpiečanych zakładam kaštoŭnych papier, harantyjami i paručycielstvami jurydyčnych asob Respubliki Biełaruś, naminavanymi ŭ zamiežnaj valucie», — paviedamlajecca ŭ liście Nacbanka.
Varta adznačyć, što hetaje rašeńnie hałoŭnaha banka krainy źjaviłasia ŭśled za rekamiendacyjami Antykryzisnaha fondu JeŭrAzES i MVF — kredytorami Biełarusi — abmiežavać abjomy valutnaha kredytavańnia ŭ krainie.
Tak, Mižnarodny valutny fond u svaim červieńskim dakładzie rekamiendavaŭ Nacbanku «vykarystoŭvać miery makraprudencyjnaj palityki dla strymlivańnia chutkaha rostu kredytavańnia ŭ zamiežnaj valucie». Piersanał fondu vykazaŭ zaniepakojenaść tym, što ŭ Biełarusi «vialikaja častka valutnych kredytaŭ vydzialajecca niechiedžavanym pazyčalnikam», i heta stvaraje ryzyki nieviartańnia kredytaŭ.
«Piersanał MVF rekamiendavaŭ razhledzieć dadatkovyja miery pa abmiežavańni rostu kredytavańnia ŭ zamiežnaj valucie. U pryvatnaści, piersanał rekamiendavaŭ razhledzieć pavyšanyja vahavyja kaeficyjenty ryzyki dla valutnych kredytaŭ», — adznačałasia ŭ dakładzie.
Takim čynam, pryniataje rašeńnie Nacbanka źjaŭlajecca lustranym adbitkam rekamiendacyj fondu.
Jak rastłumačyli BiełaPAN bankiry, rašeńnie Nacbanka budzie naŭprost ŭpłyvać na ŭzrovień dastatkovaści kapitału bankaŭ.
«U banka zychodziačy ź jaho aktyŭnych apieracyj pavinna chapić kapitału dla pakryćcia niepradbačanych ryzyk. Dla vyznačeńnia dastatkovaści kapitału da aktyvaŭ prymianiajucca roznyja vahavyja kaeficyjenty ryzyki. Zhodna z novymi praviłami kapitał pavinien być u 1,5 razu bolšy za vydadzieny kredyt u zamiežnaj valucie», — skazaŭ BiełaPAN kiraŭnik padraździaleńnia kamiercyjnaha banka.
Takim čynam, pradoŭžyŭ jon, realizacyja pryniataha rašeńnia pryviadzie da źnižeńnia pakazčykaŭ dastatkovaści kapitału bankaŭ. «Heta prymusić banki zadumacca pra abjomy valutnaha kredytavańnia, bo pakazčyk dastatkovaści kapitału — klučavy, na jaki ŭsie źviartajuć uvahu», — kanstatavaŭ pradstaŭnik kamiercyjnaha banka.
U liście Nacbanka paviedamlajecca, što zaraz pryniataja pastanova, jakaja tyčycca valutnaha kredytavańnia, prachodzić abaviazkovuju jurydyčnuju ekśpiertyzu. «Data nabyćcia pastanovaj mocy vyznačana z 1 kastryčnika 2013 hoda», — havorycca ŭ liście.
Kamientary