Ekśpierty: Biełaruś viarnułasia da dakryzisnaj madeli ekanamičnaha rostu

Biełaruskaja ekanomika viarnułasia na dakryzisnuju trajektoryju raźvićcia, kali ekanamičny rost zabiaśpiečvajecca za košt unutranaha popytu.

Aŭtary daśledavańnia, u jakim charaktaryzujecca ekanamičnaja palityka ŭ Biełarusi paśla valutnaha kryzisu, adznačajuć, što ŭ krainie adbyłosia pieraklučeńnie režymaŭ ekanamičnaha rostu i ciapier hety rost zabiaśpiečvajecca za košt unutranaha popytu.

Pieraklučeńnie na ŭnutrany popyt adbyŭsia ŭ druhoj pałovie 2012 hoda, kali Biełaruś pa patrabavańni Rasii spyniła ekspart rastvaralnikaŭ i razbavicielaŭ, adznačajuć ekśpierty.

«U novych umovach mahčymaści rostu za košt źniešniaha popytu byli vyčarpanyja: źnikła mahčymaść vykarystoŭvać „nou-chau“ u vyhladzie ekspartu rastvaralnikaŭ i razbavicielaŭ, a rost ekspartu inšych tavaraŭ i pasłuh staŭ zapavolvacca z-za rostu realnaha abmiennaha kursu», — havorycca ŭ analityčnaj zapiscy BEROC.

Jak vynik — ekanamičny rost u krainie staŭ zabiaśpiečvacca vyklučna za košt unutranaha popytu.

Pavodle dadzienych aŭtaraŭ daśledavańnia, układ unutranaha popytu ŭ pryrost VUP u druhim paŭhodździ 2012 hoda skłaŭ 4,1%, układ źniešniaha popytu byŭ admoŭnym.

Pavodle acenak ekśpiertaŭ BEROC, ekanamičny rost za košt unutranaha popytu staŭ mahčymy dziakujučy pavieličeńniu abjomaŭ kredytavańnia ekanomiki i chutkamu rostu zarobkaŭ.

«Adradžeńnie staroha „sacyjalnaha kantrakta“ pryviało i da adradžeńnia raniejšaha (dakryzisnaha) scenaryja ekanamičnaj palityki i raniejšaha režymu rostu. Adnak u hetym vypadku amal niepaźbiežnaje i novaje sutyknieńnie z prablemaj nieadpaviednaści žadanaha tempu ekanamičnaha rostu z tym, jaki hienieruje ciapierašniaja madel biełaruskaj ekanomiki», — havorycca ŭ analityčnaj zapiscy centra.

Pavodle mierkavańnia ekśpiertaŭ BEROC, dla praduchileńnia novych pahroz pry takoj trajektoryi raźvićcia «šmatkroć uzrastaje aktualnaść pošuku novych krynic doŭhaterminovaha rostu i praviadzieńnia strukturnych reform».

Razam z tym, kanstatujuć aŭtary daśledavańnia, u bok strukturnych reform, «skiravanych na farmiravańnie novych krynic rostu, značnych dziejańniaŭ u postkryzisny pieryjad zroblena nie było».

Jak paviedamlałasia raniej, ciapier ekanamičnyja ŭłady rychtujuć prahnoz sacyjalna-ekanamičnaha raźvićcia na 2014 hod. Pavodle infarmacyi BiełaPAN, u kancepcyi prahnozu ŭłady zakłali rost na ŭzroŭni 9,6% u nastupnym hodzie. Pry hetym u kancepcyi ŭdakładniałasia, što na 5,8 pracentnaha punkta rost płanujecca zabiaśpiečyć za košt unutranaha popytu, na 3,8 pracentnaha punkta — za košt źniešniaha.

Pavodle mierkavańnia biełaruskich ekanamistaŭ, jakija pradstaŭlajuć niedziaržaŭnyja daśledčyja centry, sproby zabiaśpiečyć rost za košt unutranaha popytu mohuć pryvieści da narastańnia niehatyŭnych tendencyj u ekanomicy

BEROC — niezaležny akademičny daśledčy centr u halinie ekanamičnych daśledavańniaŭ u Biełarusi — pačaŭ svaju dziejnaść u 2008 hodzie jak sumiesny prajekt Stakholmskaha instytuta pierachodnych ekanomik (SITE) i Ekanamičnaha adukacyjnaha i daśledčaha kansorcyuma (EERC) pry finansavaj padtrymcy Šviedskaha ahienctva pa raźvićci (SIDA) i Fondu Jeŭrazija (East Europe Foundation). BEROC pravodzić akademičnyja i prykładnyja daśledavańni, arhanizuje adukacyjnyja prahramy pa sučasnaj ekanomicy i ažyćciaŭlaje inšuju aktualnuju dziejnaść. BEROC źjaŭlajecca častkaj sietki daśledčych centraŭ, u jakuju ŭvachodziać SITE (Stakholm), BICEPS (Ryha), CEFIR (Maskva), CenEA (Ščecin) i KEI (Kijeŭ).

• 0
• 0
• 0
• 0
• 0
• 0
• 0
• 0