Razumieju mužykoŭ, jakija lubiać hetyja nahody dla ŭzdymańnia čarak. Ale ŭsio adno anamalna, što miralubnaja siniavokaja Biełaruś žyvie ŭ kalandarnaj stylistycy atočanaj cytadeli. Piša ŭ svaim błohu Alaksandar Kłaskoŭski.
Kali chto nia viedaje, dyk viedajcie: braniavy ščyt našych uzbrojenych siłaŭ nadziejna zachoŭvaje mir i biaśpieku Respubliki Biełaruś.
Dumajecie, aŭtar dobra adśviatkavaŭ učora Aršanskuju bitvu? Nie, jak škielca. Prosta cytuju našaha ministra abarony, jaki vinšuje ŭsich z Dniom tankistaŭ.
Taksama "ion adznačyŭ, što hetaje śviata ŭstalavanaje ŭ 1946 hodzie na znak vydatnych zasłuh braniatankavych i mechanizavanych vojskaŭ u Vialikaj Ajčynnaj vajnie i samaaddanaj pracy tankabudaŭnikoŭ dziela asnaščeńnia ŭzbrojenych siłaŭ braniatankavaj technikaj".
Farmuloŭki stalinskich časoŭ, śviaty nieisnujučaj savieckaj imperyi. Daŭno stała inšaj bajavaja taktyka. Kali ŭžo na toje, to blickryh u Iraku zaśviedčyŭ, što słavuty "braniavy ščyt" u sučasnaj vysokatechnalahičnaj vajnie ratuje nia bolej, čym siaredniaviečnyja daśpiechi ad bujnakalibernaha kulamiota. Hałoŭnaje ž — nichto nie źbirajecca na nas napadać. I brazhańnie rytorykaj sa starych palitrukoŭskich šparhałak vyhladaje prosta niedarečnym.
Zirniecie na śpis ajčynnych śviataŭ i pamiatnych dataŭ. Apateoz militaryzmu! Dzień inžynernych vojskaŭ, Dzień vojskaŭ supraćpavietranaj abarony, Dzień desantnikaŭ, Dzień čyhunačnych vojskaŭ, Dzień vajskova-pavietranych sił, Dzień tankistaŭ, Dzień rakietnych vojskaŭ i artyleryi… Dadajcie śviaty inšych siłavikoŭ — dni milicyi, unutranych vojskaŭ, pamiežnika, supracoŭnikaŭ prakuratury, mytnika, supracoŭnika orhanaŭ dziaržaŭnaj biaśpieki. Takim bukietam śviataŭ u pahonach nia moža pachvalicca, badaj, nivodnaja inšaja kraina.
Razumieju mužykoŭ, jakija lubiać hetyja nahody dla ŭzdymańnia čarak. Ale ŭsio adno anamalna, što miralubnaja siniavokaja Biełaruś žyvie ŭ kalandarnaj stylistycy atočanaj cytadeli.
I razam z tym — nia toje što nie ŭviekaviečyli pamiać pra Aršanskuju bitvu, a 'šče j chapajuć za sprobu niefarmalnaha śviatkavańnia!
Ciapierašni rejestar aficyjna ŭstalavanych dataŭ vyrazna adlustroŭvaje kurtataść, eklektyčnaść i saŭkovuju podbiŭku dziaržaŭnaj idealohii. Niekali hety piaresty śpis daviadziecca surjozna revizavać. A pakul — mo' i jość siarmiažnaja praŭda ŭ tym Dni tankistaŭ. Bo hłucha jak u tanku.
ZY. Nia padajcie z zedlika: 10 śniežnia ŭ nas — aficyjna zaćvierdžany Dzień pravoŭ čałavieka.
Na zdymkach: "braniavy ščyt" nie ŭratavaŭ Sadama; tym časam kiemlivyja zamiežniki prydumali kresła-tank dla invalidaŭ.
Kamientary