MUS: Žorstkija abmiežavańni dla narkahandlaroŭ nie prapuskajuć u adnym z upraŭleńniaŭ Administracyi prezidenta

U Ministerstvie ŭnutranych spravaŭ užo minułym letam pra dekret kazali jak pra vyrašanuju spravu: voś jašče para miesiacaŭ — i ŭsio budzie. Ale, jak paviedamiŭ na minułym tydni ministr unutranych spravaŭ Ihar Šunievič, dakumient da hetaha času nie mohuć uzhadnić.

«Kamuści nie padabajucca našyja prapanovy, kamuści nie daspadoby sankcyi, jakija my prapanujem. A narod praciahvaje ŭžyvać i pamirać ad hetaha. Kali my ŭ najbližejšy čas pierałomim niekatorych razumnikaŭ i pastupić da vas zakonaprajekt, prašu vas padtrymać i pryniać jak maha chutčej, kab u svabodnym abaračeńni hetaja atruta ŭ nas nie znachodziłasia», — zajaviŭ Šunievič, vystupajučy ŭ minułuju piatnicu pierad deputatami.

U Biełarusi, pavodle aficyjnych dadzienych, dzieści 15 tysiač narkamanaŭ, adnak hetuju ličbu možna śmieła pamnažać na 10, ličać śpiecyjalisty AAN.

Sa 150 tysiač narkamanaŭ niedzie 80% — makavyja. U Minsku 6 tysiač «aficyjnych» narkamanaŭ, realnych — kala 60 tysiač, ź jakich 50 tysiač — opiumniki.

«Kab tolki staličnym narkamanam zadavolić svaje patreby, im treba ŭ dzień 10 ton maku, heta minimum. Kaštujuć jany pryblizna miljon dalaraŭ. Kab taki prybytak atrymać, treba ŭkłaści ŭsiaho tolki 50 tysiač dalaraŭ. Hetyja schiemy ŭžo viadomyja. «Handlaroŭ nasieńniem maku siaredniaha źviana ŭ nas u krainie dzieści 150 čałaviek. A mahnataŭ — kala 19 čałaviek. I niekalki ź ich my niadaŭna «chłopnuli». Idzie sudovaje raźbiralnictva. Tam, dzie kruciacca takija vielizarnyja hrošy, naturalna, jość tyja, chto budzie pieraškadžać abmiežavalnym normam. I, viadoma, jość tyja, chto takich mahnataŭ kansultuje», — kaža načalnik upraŭleńnia Mikałaj Karpiankoŭ.

Jakija abmiežavalnyja miery prapanoŭvajucca ŭ dekrecie? Karpiankoŭ pačynaje zdalok: «U Biełarusi, kali nie było Mytnaha sajuza, pry pierasiačeńni miažy ŭvieś mak adpraŭlali na ekśpiertyzu, na adpaviednaść jaho siertyfikatu. Dla hetaha śpiecyjalna raspracavali dziaržaŭny standart i pastanovy, pavodle jakich makam možna było handlavać tolki ŭ śpiecyjalnych miescach i ŭ fasavanym vyhladzie. Kali nie było Mytnaha sajuza, usio heta pracavała. Kali adkryli miežy, mak hety znoŭ pavieźli, navałam. Kab uparadkavać niejak hetuju śfieru, raspracavali prajekt dekreta».

Pad «pavieźli» Mikałaj Karpiankoŭ maje na ŭvazie nie charčovy mak, jaki dadajuć u bułki, a nieačyščany. Kali ŭ zvyčajny mak dadać «makavuju sałomku», to mak robicca niebiaśpiečnym narkatyčnym rečyvam. Ličycca, što čym «brudniejšaje» rečyva, tym macniej ź jaho vychodzić narkotyk. Naprykład, u piakarni traplaje mienavita vyčyščany mak.

«Pryncyp dekreta ŭ čym: zavoźcie kolki chočacie hetaha maku, ale źmiaščajcie jaho na dziaržaŭnych bazach zachoŭvańnia. Tam jaho chaj praviarajuć na adpaviednaść siertyfikacyi. A paśla hetaha viazicie jaho kamu treba. Naprykład, absłuhoŭvaje pradprymalnik sielskija kramki abo chlebapiakarniu, maje na heta licenziju, pryjazdžaje i biare. Ale ŭžo toj mak, jaki rasfasavany, adpaviadaje dziaržstandartu i h.d.» Takim čynam nasieńnie maku zabaraniajecca da volnaha prodažu, a kali ty ryzykuješ im handlavać — štraf ad 1 da 8 tysiač jeŭra. «U zaležnaści ad taho, pieršy raz ty trapiŭsia ci druhi. I ŭ zaležnaści ad hetaha dekretam praduhledžanaja kanfiskacyja aŭtamabila, na jakim ty pieravoziŭ hety mak. Adnačasova praduhledžvajecca kanfiskacyja ŭsiaho nasieńnia maku ŭ pravaparušalnika, niezaležna ad taho, u čyjoj ułasnaści jon znachodzicca, miesca jaho zachoŭvańnia i najaŭnaści dakumientaŭ, jakija paćviardžajuć zakonnaść jaho nabyćcia».

Usie dziaržaŭnyja orhany padtrymali prapanavanuju MUS redakcyju dekreta. Usie, akramia Nacyjanalnaha centra zakanadaŭstva i pravavych daśledavańniaŭ (NCZPD; strukturnaje padraździaleńnie Hałoŭnaha dziaržaŭnaha pravavoha ŭpraŭleńnia Administracyi prezidenta Biełarusi).

«Što prapanuje NCZPD: pa-pieršaje, admianić praduhledžanuju prajektam dekreta kanfiskacyju ŭ vinavatych usiaho nasieńnia maku, niezaležna ad taho, u čyjoj ułasnaści jano znachodziacca, miesca jaho zachoŭvańnia i najaŭnaści dakumientaŭ, jakija paćviardžajuć zakonnaść nabyćcia. Atrymlivajecca, kali my zatrymlivajem narkazbytčyka i ŭ momant prodažu ŭ jaho na rukach 2 kh nasieńnia maku, to tolki ich my i majem prava kanfiskavać. A toje, što ŭ jaho ŭ haražy zachoŭvajecca jašče 10 ton maku, 50 litraŭ rastvaralnika, — heta vy nie čapajcie, inakš vy parušycie kanstytucyjnyja pravy hramadzian. Ale heta naŭprosty namier na vyrab narkotykaŭ! Tak vyklučajecca z kanfiskacyi asnoŭny abjom nasieńnia maku, — kaža Karpiankoŭ. — Pa-druhoje, nam prapanujuć admianić kanfiskacyju aŭtamabila, jaki vykarystoŭvaŭsia dla pieravozki i zachoŭvańnia maku. Pa-treciaje, prapanujuć uvieści zabaronu na zachoŭvańnie nasieńnia maku va ŭsich hramadzian Biełarusi. Heta ž uvohule absurd: kali čałaviek nabyŭ sabie mak u kramie, chaj piače bułački z makam na Vialikdzień! Zvyčajnamu čałavieku bolš za kiłahram nie treba. U nas u stałoŭku ŭ MUS na hod 10 kh zakuplajuć, i ŭsie hetyja bułački jaduć. A kali čałaviek pryvioz 20 ton maku, kamu jon ich pryvioz?»

Pa słovach Mikałaja Karpiankova, u Biełarusi siońnia sapraŭdy jość «vierchavody narkabiznesu», jakim takija karektavańni dekreta dapamahajuć raźvivać svoj biznes. Niekatoryja sudovyja pracesy «sihnalać» ab tym, što narkahandlary adčuvajuć čyjości nadziejnaje plačo i ŭsiodazvolenaść, ličyć Karpiankoŭ.

«Ja byŭ ździŭleny, kali našyja supracoŭniki prosta padčas suda ŭbačyli nachabstva i samaŭpeŭnienaść narkazbytčykaŭ. Uletku milicyja na składzie ŭ Minskaj vobłaści vyjaviła 20 ton maku. Pavodle dadzienych padatkovaj, adzin ź fihurantaŭ ažyćciaŭlaŭ niezakonnuju pradprymalnickuju dziejnaść. My adpravili mak na ekśpiertyzu: u miaškach była sumieś nasieńnia maku i niebiaśpiečnaha narkatyčnaha srodku — makavaj sałomy, što moža być vykarystanaja dla vyrabu opiju. Pa dakumientach heta byŭ charčovy mak, pryznačany dla pastaŭki na terytoryju Rasii. Tady što jon rabiŭ u Biełarusi? My ž trymali hetych tavaryšaŭ u raspracoŭcy i viedajem, što ni ŭ jakuju Rasiju jany nie źbiralisia jaho vieźci! Jon pryznačaŭsia dla raspaŭsiudu ŭ Biełarusi. Viadoma, za heta praduhledžany štraf i kanfiskacyja ŭsiaho tavaru. Haspadarčy sud pa Minskaj vobłaści pastanaviŭ kanfiskavać uvieś abjom maku i pryciahnuć vinavatych da administracyjnaj adkaznaści. Ale tavaryšy hetaje rašeńnie abskardzili ŭ Vyšejšym haspadarčym sudzie. Na abskardžańni prysutničali našy supracoŭniki i vydatna čuli, pra što pierahavorvalisia fihuranty. Siadziać, pamiž saboj šepčucca: maŭlaŭ, dy my hetych miantoŭ pasadzim, zavalim ich skarhami i h.d. Adzin ź ich druhomu raskazvaŭ, što jany nibyta kamu treba hrošaj zakinuli, što «ruch» užo pajšoŭ. I što vy dumajecie: sud admianiŭ rašeńnie suda pieršaj instancyi i adpraviŭ spravu na pierahlad».

Na dumku Mikałaja Karpiankova, nie vyklučana, što ciapier sud paśla pierahladu pastanaviŭ viarnuć im usie 20 ton maku. «A nas jany sapraŭdy zakidali skarhami. Atrymlivajecca, praz toje, što zaciahvajecca pa časie pryniaćcie dekreta, takija zbytčyki adčuvajuć siabie abaronienymi. Jany razumiejuć, što na ich baku hetyja jurydyčnyja areli. Jany bačać, što im viartajuć hety mak, što ich nie karajuć. Jak nam na hetym fonie praciahvać pracavać?»

Uzmacnieńnie žorstkaści zakonu ŭ hetaj śfiery — prablema daŭniaja. «Siem hadoŭ my šturchajem niejkija abmiežavalnyja miery ŭ zakanadaŭstva, — padvodzić vynik Mikałaj Karpiankoŭ. — Da niejkaha ŭzroŭniu dachodzim — adkat. Ciapier my dajšli da samaha vysokaha ŭzroŭniu, i znoŭ toje ž samaje! U NCZPD unieśli try praŭki, u vyniku čaho treba ŭvieś dekret pierarabić. A čas idzie. Stračvajecca ŭvieś sens hetaha dakumienta. Ludzi robiacca narkazaležnymi. Vidavočna: prapanavanyja papraŭki supiarečać antynarkatyčnaj palitycy dziaržavy i patrabavańniam prezidenta ab niedapuščeńni pieratvareńnia narkamanii ŭ masavuju źjavu, umacoŭvajuć pravavyja asnovy zbytu nasieńnia maku narkazaležnym. Fizičnaja biespakaranaść narkazbytčykaŭ spravakuje dalejšaje intensiŭnaje raspaŭsiudžańnie narkotykaŭ pa ŭsioj krainie».

Termin žyćcia aktyŭnych narkamanaŭ, jakija ŭžyvajuć opiumny mak rehularna, — usiaho 2 hady.

Kali dekret nie atrymajecca pryniać u takim vyhladzie, u jakim prapanuje MUS, to ŭ Biełarusi, upeŭnieny Karpiankoŭ, usia praca milicyi pa baraćbie z makavymi narkamanami «prosta zhorniecca». «Dla kanfiskacyi niekalkich kiłahramaŭ maku niemetazhodna źbirać kamandu ludziej z roznych viedamstvaŭ i palić bienzin. My ciapier u Saviet ministraŭ dla nastupnaj pierasyłki ŭ Administracyju prezidenta adpravili prapanovy pryniać dekret biez uliku pravak ad NCZPD».

Dla daviedki: Za 9 miesiacaŭ 2013 hoda MUS sumiesna z zacikaŭlenymi strukturami skłała 132 administracyjnyja pratakoły za ŭčynieńnie pravaparušeńniaŭ, źviazanych z realizacyjaj nasieńnia maku narkazaležnym. Da adkaznaści pryciahnuta 119 asob, kanfiskavana kala 58 ton nasieńnia maku, ź jakoha možna pryhatavać zvyš 460 tysiač doz narkatyčnaha srodku ekstrakcyjnaha opiju na ahulnuju sumu bolš za 36 młrd rubloŭ. Pa vynikach 1-ha paŭhodździa 2013 sudami nakładziena štrafaŭ na 233 młn rubloŭ, u handlaroŭ nasieńniem maku kanfiskavali 64 aŭtamabili.

• 0
• 0
• 0
• 0
• 0
• 0
• 0
• 0