Bronzavyja!

Žanočaja zbornaja Biełarusi pa baskietbole hetymi vychodnymi zavajavała «bronzu» na čempijanacie Eŭropy ŭ Italii. Padzieja zusim nie šarahovaja. Našy dziaŭčaty byli absalutnymi debiutantkami top‑spabornictvaŭ.

Dahetul najbolšym dasiahnieńniem biełaruskaha baskietbołu ličyłasia pieramoha moładzievaj mužčynskaj zbornaj na čempijanacie kantynentu ŭ 1994 hodzie ŭ Makiedonii. Tady našu kamandu za saboj viali Kul, Mieščarakoŭ, Bajdakoŭ, Kryvanos. Napeŭna, samaje talenavitaje pakaleńnie biełaruskich baskietbalistaŭ, jakoje, praŭda, tak i nie zmahło prajavić siabie na darosłaj arenie. Našy dziaŭčaty pabili hety rekord 13‑hadovaj daŭniny.

Treba zaŭvažyć, što ŭvohule ŭ hulniavych vidach sportu Biełaruś jašče nikoli nie zavajoŭvała medaloŭ na čempijanatach Eŭropy, śvietu i alimpijadach. Z ahulnaha šerahu vyłučajecca tolki čaćviortaje miesca chakieistaŭ u Sołt‑Łejk‑Syty ŭ 2002 hodzie. Tamu bronza baskietbalistak adkryvaje novuju staronku ŭ historyi biełaruskaha sportu.

Paśla taho, jak u čverćfinale našy dziaŭčaty vybili čempijonak Eŭropy z Čechii , nastupnym ichnym supiernikam stali hišpanki, jakim biełaruski ŭžo prajhravali ŭ pačatku čempijanatu. Na vialiki žal, supraćstajać na roŭnych piryniejkam nie atrymałasia — 70:54.

Takim čynam, našu kamandu čakaŭ matč za bronzu z kamandaj Łatvii.

Kryŭdna za biełaruskich amataraŭ baskietbołu, jakija nie zmahli ŭbačyć u prostaj tranślacyi, jak paŭfinał, tak i matč za treciaje miesca. Dyrekcyja spartovaha viaščańnia Biełteleradyjokampanii tak i nie zmahła źmiaścić prahramu pieradač na telekanale «Ład», tamu mnohija hladzieli hetyja sustrečy, kali ŭžo viedali pra vyniki matčaŭ ź Internetu ci rasiejskich telekanałaŭ.

Na matčy za bronzu prysutničaŭ prezydent Łatvii Vałdzis Zatlers, ale navat jahonaja prysutnaść nie dapamahła bałtyjskim baskietbalistkam zavajavać medali ŭ Italii. Biełaruski ŭpeŭniena kantralavali chadu sustreču. Užo ŭ siaredzinie treciaj čverci pieravaha našych dziaŭčat składała bolš za dvaccać punktaŭ, tamu ŭ kančatkovaj pieramozie mała chto sumniavaŭsia, ale ŭ apošniaj čverci hulni ź biełaruskami pačali rabicca nievytłumačalnyja rečy. Za piać chvilinaŭ da finalnaha śvistka pieravaha našych składała ŭsiaho čatyry punkty, i heta naściarožvała. Adnak u vyrašalnyja chviliny hulniu na siabie ŭziali lidery zbornaj — Nastaśsia Vieramiejenka, Taciana Troina, Alena Leŭčanka, Natalla Marčanka. Biełaruski zachavali dla siabie pieramohu 72:63. U nas bronza!

Uznaharoda čempijanatu Eŭropy taksama vyvodzić zbornuju ŭ kvalifikacyju da pekinskaj Alimpijady. Baraćba za pucioŭki ŭ Kitaj čakajecca vielmi napružanaj, ale naša kamanda ŭžo dakazała, što ŭmieje pieramahać.

U svaju čarhu čempijonkami kantynentu stali rasijanki, jakija ŭ niadzielu viečaram u finale pieramahli hišpanak.

Źmicier Pankaviec

• 0
• 0
• 0
• 0
• 0
• 0
• 0
• 0