U internecie źjaviŭsia poŭny scenar filma «Aviel».
Film raspaviadaje pra toje, jak słužba biaśpieki prezidenta Biełarusi i misijaniery z mahutnaj arhanizacyi zachavalnikaŭ tajamnicy Kainavaha znaku (avielity) sprabujuć vyratavać śviet.
Sakretnaja arhanizacyja pramych naščadkaŭ biblejskaha Aviela sabrała infarmacyju ab hienietyčnym kodzie kožnaha žychara Ziamli i vyznačaje vierahodnaść zabojstvaŭ z dapamohaj kamputarnaj prahramy, jakaja dešyfruje kod Kaina.
Kainavy znak, tajamnicu jakoha zachoŭvajuć avielity, heta łancužok hienietyčnaha koda - hienietyčnaja prahrama ŭ ihrek-chramasomie, spadkavanaj pa miačy, jakaja adkazvaje za vierahodnaść učynieńnia čałaviekam zabojstva…
Žurnalistka Sara, adna ź misijanierak arhanizacyi, jeździć pa ŭsiamu śvietu i sprabuje praduchilić rezanansnyja zabojstvy «ź vialikaj kolkaściu achviar i dalokasiažnymi nastupstvami». Praŭda, jaje praca nie asabliva efiektyŭnaja i paśla niaŭdałaj apieracyi, jakuju zryvajuć tajemnyja niadobrazyčliŭcy, u Tunisie ŭspychvaje revalucyja.
Našmat lepš žurnalistcy atrymoŭvajecca vykryvać amierykanskuju zamiežnuju palityku, a jaje knižka «Štości nie tak z amierykanskaj maraj?» stanovicca bestseleram.
Paśla Tunisa Sara atrymlivaje novaje zadańnie - u Biełarusi, u jakoj tolki što prajšli prezidenckija vybary i adbyvajucca masavyja pratesty. Kamputarnaja prahrama avielitaŭ vyličyła imaviernaść dvuch złačynstvaŭ i misijaniery pavinny praduchilić ich.
Pad vyhladam zamiežnych inviestaraŭ misijaniery prybyvajuć na Biełaruski aŭtamabilny zavod, dzie ledź nie stanoviacca achviarami zamachu. BiełAZ z dystancyjnym kiravańniem padčas prezientacyi inviestaram hublaje kiravańnie i sprabuje ich razdušyć. Ich cudam ratuje major słužby biaśpieki prezidenta Jahor Anisimaŭ, jaki apynuŭsia ŭ hety čas na zavodzie, kab padrychtavać vizit kiraŭnika dziaržavy.
Jak vyśviatlajecca, misijanieraŭ cikavić jahony brat Vadzim. Jon pracuje na BiełAZie prahramistam. Mienavita Vadzim, pavodle prahnozu avielitaŭ, ź imaviernaściu 82,3% učynić zabojstva bližejšym časam. Reč u tym, što Vadzim i Jahor nie padzialili dziaŭčynu (viadomuju televizijnuju žurnalistku Vieru) i Vadzim nie moža daravać svajmu bratu.
Jahora Anisimava prystaŭlajuć da amierykanskaj žurnalistki ŭ jakaści achovy. Jon pavinien supravadžać amierykancaŭ na pres-kanfierencyju i na chakiej.
Jak by miž inšym, žurnalistka padčas pres-kanfierencyi kiraŭnictva BiełAZa ŭ Nacyjanalnaj biblijatecy tłumačyć, što zmahacca z dyktaturaj nie varta i treba šukać inšy šlach - šlach evalucyi.
Pamočnik Sary, Krys Uejn, u hety ž čas sočyć za inšym patencyjnym zabojcam - niedałuham z pryharada Mienska Kiryłam, jaki płanuje padarvać samarobnuju bombu ŭ miescy masavaha zboru ludziej. Dziakujučy prafiesijnaj i supolnaj pracy AMAPu Kiryłu nie atrymoŭvajecca pranieści bombu na chakiejny matč, na jaki, darečy, źbirałasia i amierykanskaja žurnalistka, i jon navažvajecca ŭčynić terakt u mietro.
Słužba biaśpieki prezidenta pamyłkova miarkuje, što Krys Uejn sprabuje zabić Saru i abviaščaje na jaho palavańnie. Jahor Anisimaŭ na matacykle pieraśleduje Krysa Uejna, adnak u samy apošni momant chtości paśpiavaje padarvać samoha Uejna (źniaviečany, ale žyvy). Jahor praciahvaje pahoniu za padazronym aŭtamabilem i traplaje na palihon vyprabavańniaŭ BiełAZaŭ. 400-tonny samazvał na dystancyjnym kiravańni atakuje majora, ale Jahoru atrymoŭvajecca niejtralizavać apieratara-terarysta. Im byŭ stažor zavoda z Tunisa, ahient zdradnika ŭ šerahach avielitaŭ.
Sara i jaje partniory vymušanyja raskazać Jahoru Anisimavu tajamnicu i ciapier užo razam jany iduć pa śladoch mahčymych zabojcaŭ. Jany paśpiavajuć pryjechać na stancyju mietro za imhnieńnie da vybuchu i adzin ź misijanieraŭ hinie. Kiraŭnictva Jahora dumaje, što jon i amierykancy arhanizavali vybuch u mietro. Ciapier užo ŭ vyšuk abvieščany sam major SB.
Sara i Jahor Anisimaŭ znachodziać u starym viaskovym domie siamji Anisimava źviazanuju dziaŭčynu (televizijnuju žurnalistku), jakuju brat Jahora - Vadzim uziaŭ u zakładniki, tudy ž prybyvaje hrupa zachopu i brat Jahora. Vadzim adpraŭlajecca na pieramovy, u dom jon prynios vybuchoŭku i sprabuje ŭsich padarvać, adnak Jahor ratuje žyćcio bratu.
Zakančvajecca film na vyśpie Uteja ŭ Narviehii. Sara vyličvaje zdradnika ŭ radach avielitaŭ. Im byŭ jaje kuratar Devid Parkier. Jahor, Sara, Viera i Krys Uejn sprabujuć niejtralizavać zdradnika, ale tut źjaŭlajecca Brejvik z karabinam i ładzić paboišča. Parkier paśpiavaje źbiehčy z vyspy na matornaj łodcy, ale Brejvik rasstrelvaje łodku i Parkier hinie padčas vybuchu.
«Frankienštejn zabiŭ svajho haspadara», - robić vysnovu amierykanskaja žurnalistka Sara.
* * *
Poŭny scenar spampavać TUT
Kamientary