Pasoł Izraila ŭ Biełarusi: Z našaha punktu hledžańnia, biełaruskija «palitviaźni» — kryminalniki

Pasoł Izraila ŭ Biełarusi Iosif Šahał u intervju izrailskamu kanału RTVI zajaviŭ, što z punktu hledžańnia Izraila biełaruskija palitźniavolenyja źjaŭlajucca kryminalnikami. Intervju było dadziena 6 lutaha. 10 lutaha videa było raźmieščana na sajcie youtube.com. 

«Tyja, kaho ličać palitźniavolenymi, — heta čatyry čałavieki aficyjna siońnia. Čatyry čałavieki zastalisia, siadziać u turmie. Łukašenka prapanuje im napisać prośbu ab pamiłavańni, jak u historyi z Chadarkoŭskim: napišy prośbu — ciabie adpuściać. Jany nie žadajuć, ličać za lepšaje zastavacca hierojami ŭ turmie», — skazaŭ Iosif Šahał. 

Na pytańnie žurnalistki ab pazicyi Izraila, jak adzinaj demakratyi na Blizkim Uschodzie, u dačynieńni da prablemy palitźniavolenych u Biełarusi Šahał adkazaŭ: «Jak my pastavimsia da paleścinca, jaki kinie kamień u Knesiet? Jon chto — palitźniavoleny ci kryminalnik? Jany ŭsie siadziać pa kryminalnym artykule, a nie pa palityčnym. Usie. Za napad na parłamient, za kidańnie kamianioŭ». 

«Ja nie kažu, što jany nie palitźniavolenyja — ź jakoha boku hladzieć. Z punktu hledžańnia kryminalnaha kodeksa krainy, dzie ich pasadzili, jany kryminalniki. Z punktu hledžańnia Polščy ci Jeŭrasajuza, jany palitźniavolenyja», — dadaŭ izrailski dypłamat. 

Na ŭdakładniajučaje pytańnie žurnalistki «a z punktu hledžańnia Izraila?», Šahał adkazaŭ: «Z punktu hledžańnia našaha, jany — kryminalniki, tamu što ŭ ich jość artykuł — za chulihanstva, za kidańnie kamianioŭ, za źniavahu ŭład nu i hetak dalej». 

Pasoł Izraila taksama prakamientavaŭ zachodnija sankcyi ŭ dačynieńni da aficyjnaha Minska. «Hałoŭnaja kraina, jakaja inicyjavała ŭsie presinhi suprać Biełarusi, — heta Polšča. Dyk voś, dla prykładu: Polšča, jakaja inicyjavała ŭsie hetyja sankcyi, maje ź Biełaruśsiu tavaraabarot 5 miljardaŭ dołaraŭ. Jak by, z adnaho boku, jany kažuć «oj, pravy čałavieka parušajuć, dyktatar», a ź inšaha — 5 miljardaŭ dołaraŭ». 

Pry hetym Šahał adznačyŭ, što tavaraabarot pamiž Biełaruśsiu i Izrailem składaje ŭsiaho 130 miljonaŭ dołaraŭ. 

Pavodle słoŭ izrailskaha dypłamata, jaho kraina ŭvažliva vyvučaje mahčymaść stvareńnia zony svabodnaha handlu z krainami Mytnaha sajuza. 

Akramia taho, Šahał paviedamiŭ, što jość vierahodnaść chutkaj admieny vizavaha režymu pamiž Biełaruśsiu i Izrailem. «Kali ŭsio składziecca, kali ŭsie baki damoviacca, jość realny šans, što da leta (2014 hoda), vizavy režym admienicca».

• 0
• 0
• 0
• 0
• 0
• 0
• 0
• 0