Byłaja dyrektar fabryki «Słodyč», jakuju zatrymali za prasłušku padnačalenych, admaŭlaje svaju vinu
Ale pierad sudom paŭstanie.
Taćciana Sielich.
Zavieršana rasśledavańnie kryminalnaj spravy suprać Taćciany Sielich.
«Ustanoŭlena, što dyrektar fabryki dała zahad nabyć za košt pradpryjemstva ŭ kamiercyjnaj firmy śpiecyjalnaje padsłuchoŭvajučaje i hukazapisvajučaje abstalavańnie i ŭstanaviła jaho ŭ słužbovych pamiaškańniach. Pry hetym usia infarmacyja pra razmovy supracoŭnikaŭ akumulavałasia na kampjutary kiraŭnika fabryki,što źjaŭlajecca parušeńniem tajamnicy telefonnych i inšych razmoŭ»,
— paviedamiŭ pradstaŭnik upraŭleńnia Śledčaha kamiteta pa Minsku Alaksandr Hierasimaŭ.
Eks-dyrektaru pradjaŭlena abvinavačvańnie pa troch artykułach Kryminalnaha kodeksa: niezakonnaje nabyćcio srodkaŭ dla niehałosnaha atrymańnia infarmacyi, złoŭžyvańnie ŭładaj albo słužbovymi paŭnamoctvami, parušeńnie tajamnicy telefonnych pieramovaŭ. Maksimalnaje pakarańnie, jakoje joj pahražaje, — da 10 hadoŭ kałonii z kanfiskacyjaj majomaści.
«Padčas rasśledavańnia abvinavačanaja admoviłasia ad supracoŭnictva z orhanami kryminalnaha pieraśledavańnia, rabiła sproby pieraškodzić dziejańniam śledčych i nie pryznavała svajoj viny ŭ inkryminujemych joj złačynstvach.
Pry hetym, pa spravie dapytana bolš za 50 śviedkaŭ i paciarpiełych, atrymanyja zaklučeńni pa ŭsich ekśpiertyzach, u tym liku pa kanfiskavanym abstalavańni dla prasłuchoŭvańnia, sabranyja inšyja dokazy», — adznačyŭ Hierasimaŭ.
Materyjały spravy pieradadzieny prakuroru dla nakiravańnia ŭ sud.
Akramia taho, padčas śledstva fabryka «Słodyč» zajaviła pazoŭ ab kampiensacyi škody ŭ pamiery 202 miljonaŭ rubloŭ. Byli vyjaŭleny arhanizacyjnyja i finansavyja parušeńni z boku dyrektara. Pa hetych faktach pravodziacca dadatkovyja pravierki.
Zatrymańnie Taćciany Sielich adbyłosia ŭ śniežni 2013. Jana ŭznačalvała pradpryjemstva z krasavika 2009.
Z 2007 jana była namieśnikam dyrektara pa łahistycy. Letaś jana stała pieramožcaj konkursu «Žančyna hoda-2012» u naminacyi «Za prafiesijanalizm». U 2011 Taćciana Sielich była adznačana premijaj časopisa «Dieło» za padtrymku vysokaha standarta svajoj pradukcyi na ajčynnym i zamiežnym rynkach.
Kamientary