Былая дырэктар фабрыкі «Слодыч», якую затрымалі за праслушку падначаленых, адмаўляе сваю віну
Але перад судом паўстане.
Таццяна Селіх.
Завершана расследаванне крымінальнай справы супраць Таццяны Селіх.
«Устаноўлена, што дырэктар фабрыкі дала загад набыць за кошт прадпрыемства ў камерцыйнай фірмы спецыяльнае падслухоўваючае і гуказапісваючае абсталяванне і ўстанавіла яго ў службовых памяшканнях. Пры гэтым уся інфармацыя пра размовы супрацоўнікаў акумулявалася на камп’ютары кіраўніка фабрыкі,што з’яўляецца парушэннем таямніцы тэлефонных і іншых размоў»,
— паведаміў прадстаўнік упраўлення Следчага камітэта па Мінску Аляксандр Герасімаў.
Экс-дырэктару прад’яўлена абвінавачванне па трох артыкулах Крымінальнага кодэкса: незаконнае набыццё сродкаў для негалоснага атрымання інфармацыі, злоўжыванне ўладай альбо службовымі паўнамоцтвамі, парушэнне таямніцы тэлефонных перамоваў. Максімальнае пакаранне, якое ёй пагражае, — да 10 гадоў калоніі з канфіскацыяй маёмасці.
«Падчас расследавання абвінавачаная адмовілася ад супрацоўніцтва з органамі крымінальнага пераследавання, рабіла спробы перашкодзіць дзеянням следчых і не прызнавала сваёй віны ў інкрымінуемых ёй злачынствах.
Пры гэтым, па справе дапытана больш за 50 сведкаў і пацярпелых, атрыманыя заключэнні па ўсіх экспертызах, у тым ліку па канфіскаваным абсталяванні для праслухоўвання, сабраныя іншыя доказы», — адзначыў Герасімаў.
Матэрыялы справы перададзены пракурору для накіравання ў суд.
Акрамя таго, падчас следства фабрыка «Слодыч» заявіла пазоў аб кампенсацыі шкоды ў памеры 202 мільёнаў рублёў. Былі выяўлены арганізацыйныя і фінансавыя парушэнні з боку дырэктара. Па гэтых фактах праводзяцца дадатковыя праверкі.
Затрыманне Таццяны Селіх адбылося ў снежні 2013. Яна ўзначальвала прадпрыемства з красавіка 2009.
З 2007 яна была намеснікам дырэктара па лагістыцы. Летась яна стала пераможцай конкурсу «Жанчына года-2012» у намінацыі «За прафесіяналізм». У 2011 Таццяна Селіх была адзначана прэміяй часопіса «Дело» за падтрымку высокага стандарта сваёй прадукцыі на айчынным і замежным рынках.
Каментары