Biełarus, jakoha ŭ Maskvie asudzili na niezrazumiełaj movie za nadpis na biełaruskim pasolstvie, nia choča zdavacca. Basmanny sud viarnuŭ spravu ŭ prakuraturu. Advakat spadziajecca, što sudzimaść ź biełarusa taki zdymuć.
Basmanny rajonny sud Maskvy 30 kastryčnika 2007 hodu paŭtorna razhledzieŭ skarhu hramadzianina Biełarusi Jurasia Ivaniukoviča na raniej vyniesienaje rašieeńnie miravoha sudu, zadavoliŭ jaje j viarnuŭ spravu ŭ prakuraturu. Jaje paviedamiŭ IA REGNUM advakat Ivaniukoviča Stanisłaŭ Markiełaŭ, najbližejšym časam kryminalnaja sprava suprać jahonaha padabaronnaha budzie prakuraturaj spynienaja.
Nahadajem, što 23‑hadovy Juraś Ivaniukovič, jaki žyŭ u Maskoŭskaj vobłaści j pracavaŭ kanstruktaram‑technolaham u TAA «Najvyšejšaja stalarnaja liha», abvinavačvaŭsia va ŭčynieńni złačynstva pa artykule «Vandalizm». Zhodna z abvinavaŭčaj vysnovaj, 9 traŭnia jon čornym markieram napisaŭ na šyldzie biełaruskaha pasolstva «Žyvie Biełaruś!!!» i «BT chłusić!!». Paśla ŭmiašańnia supracoŭnika milicyi, jaki achoŭvaŭ pasolstva, maładzion ścior nadpisy, ale byŭ tut ža aryštavany. Zatym suprać jaho ŭsčali kryminalnuju spravu, chacia pradstaŭniki pasolstva Biełarusi nie vystaŭlali nijakich pretenzij z nahody psavańnia majomaści ci samoj pabudovy pasolstva. Miž tym, na dumku abarony, učynienyja maładym čałaviekam dziejańni nie mahli kvalifikavacca inakš jak administratyŭnaje pravaparušeńnie.
Sprava razhladałasia miravym basmannym sudom. U časie pracesu abvinavačany ćvierdziŭ, što słaba vałodaje rasiejskaj movaj, i heta zaminaje jamu razumieć toje, što adbyvajecca ŭ časie śledztva i na sudzie. Pavodle jahonych słoŭ, jon navat nie adrazu zrazumieŭ, što pieraśledujecca ŭ kryminalnaj spravie. Miž tym, sproby zabiaśpiečyć jaho kvalifikavanym pierakładčykam pravalilisia — znajści takoha paprostu nie atrymałasia. Tym nia mienš, jon byŭ pryznany vinavatym. Sud aštrafavaŭ jaho na 3 tysiačy rubloŭ, a 3 kastryčnika 2006 hodu Basmanny rajonny sud razhledzieŭ apelacyju Ivaniukieviča j paćvierdziŭ rašeńnie miravoha sudu.
Jak paviedamiŭ Stanisłaŭ Markiełaŭ, jahony padabaronny, jaki daŭno pakinuŭ Rasieju j žyvie ŭ Biełarusi, dobrasumlenna pieraličyŭ u biudžet RF sumu štrafu, adnak nie schacieŭ zdavacca, i ŭ Maskoŭski haradzki sud była padadzienaja kasacyjnaja skarha, pa vynikach razhladu jakoj sprava była viernutaja na novy razhlad u Basmanny sud. U časie pasiedžańnia sam pradstaŭnik prakuratury paprasiŭ viarnuć spravu nazad, bo nia ličyć hetuju spravu kryminalnaj, i pamyłki, jakija byli ŭ abvinavaŭčaj vysnovie, nie dajuć mahčymaści razhladać jaje ŭ sudzie. Sud zadavoliŭ supolnaje chadajnictva abarony i abvinavačvańnia.
«Upieršyniu ŭ rasiejskaj i navat savieckaj praktycy byŭ paćvierdžany status biełaruskaj movy. Skłaŭsia precedent, kali adsutnaść pierakładčyka ź biełaruskaj movy spryjaje vyzvaleńniu abvinavačanaha ad sudovaha pieraśledu. Hety fakt važny jašče i tamu, što adsutnaść pierakładčykaŭ ź biełaruskaj moža apynucca surjoznaj pieraškodaj dla sudu ŭ vypadku, kali pierad im paŭstanie sapraŭdny złačynca — zabojca abo hvałtaŭnik», — padkreśliŭ Stanisłaŭ Markiełaŭ.
Advakat taksama adciemiŭ, što sud paćvierdziŭ niemahčymaść usčynańnia kryminalha pieraśledu za psavańnie majomaści pasolstva biaz zhody zamiežnaha boku.
Jak padkreśliŭ Stanisłaŭ Markiełaŭ, rašeńnie Basmannaha sudu, u pryvatnaści, pazbaŭlaje Jurasia Ivaniukoviča j ad sudzimaści, jakaja była vynikam pryznańnia jaho vinavatym i vyniasieńnia jamu prysudu pa kryminalnym artykule na papiarednim pracesie.
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary