U Minsku viełasipiedam karystajecca kožny piaty žychar

U Minsku viełasipiedam karystajucca zvyš za 400 tys. žycharoŭ, heta značyć kožny piaty. Takaja acenka namieśnika dyrektara pa raźvićci sietki «Viełazona» Ihara Davydzienka.

«Uzrovień cikavaści da jazdy na viełasipiedzie napramuju zaležyć ad taho, nakolki raźvitaja infrastruktura. Isnuje prostaja zaležnaść: čym bolš u horadzie vieładarožak i maršrutaŭ, tym bolš viełasipiedystaŭ. Padjom viełasipiednaj kultury ŭžo zakranuŭ Minsk i chutka zakranie inšyja harady krainy», — upeŭnieny ekśpiert.

U Biełarusi naličvajecca kala 1,5 młn ŭładalnikaŭ viełasipiedaŭ, ź ich kala 250 tys. aktyŭna vykarystoŭvajuć hety transpart u paŭsiadzionnym žyćci. Viełasipiedysty składajuć 16 % nasielnictva krainy, što nižej za siaredniesuśvietny ŭzrovień. Dla paraŭnańnia, u Hiermanii hety pakazčyk dasiahaje 76%, u Danii — 80%, Šviecyi — 64%, Narviehii — 61%, Kitai — 37%. U samaj «dvuchkołavaj» krainie śvietu — Niderłandach — na tysiaču žycharoŭ prypadaje 990 rovaraŭ.

Štohod biełarusy kuplajuć kala 100 tys. viełasipiedaŭ. Kala 40% ź ich nabyvajuć u Minsku. Najbolš aktyŭna asvojvajuć viełasipied mužčyny — amal pałova viełaamataraŭ ŭ Biełarusi. Mienš za treć novych viełasipiedaŭ nabyvajuć žančyny. A voś na dziciačyja rovary prychodzicca kožnaja piataja kupla.

Asabliva papularnyja hornyja viełasipiedy, dola jakich u sučasnym viełaparku biełarusaŭ dasiahaje 70%. Na druhim miescy — hibrydnyja i darožnyja madeli (20%), tady jak usie astatnija typy viełasipiedaŭ zajmajuć usiaho 10% rynku. Siarod papularnych brendaŭ ekśpiert vyłučaje niamieckija viełasipiedy LTD, jakija niadaŭna byli nazvanyja praduktam hoda ŭ Biełarusi. «Biełarusy lubiać katacca jak u horadzie, tak i za jaho miežami. Tamu im patrebien niepatrabavalny viełasipied na ŭsie vypadki žyćcia», — rastłumačyŭ Ihar Davydzienka.

U Biełarusi pražyvaje kala 10 tys. viełaturystaŭ. «Pakul hety napramak tolki farmujecca: za apošnija hady ŭ krainie choć i źjavilisia znakavyja viełamaršruty, ale cikavaść da ich nieparaŭnalna nižej, čym da zvyčajnych aŭtobusnych turaŭ», — padkreśliŭ namieśnik dyrektara. Zvyčajna dla padarožžaŭ vykarystoŭvajuć hornyja abo darožnyja bajki. Śpiecyjalnyja turystyčnyja viełasipiedy na biełaruskich darohach sustrakajucca vielmi redka.

Siarod viełasipiedystaŭ u Biełarusi niamała zamožnych ludziej. «U adroźnieńnie ad Indyi, dzie viełasipied čaściej za ŭsio vykarystoŭvajuć niebahatyja ludzi, u Biełarusi možna sustreć na vieładarožcy i biźniesmienaŭ, i artystaŭ, i mieniedžeraŭ siaredniaha i vyšejšaha źviana», — źviarnuŭ uvahu ekśpiert.

Bolš za pałovu ŭładalnikaŭ novych viełasipiedaŭ — aŭtamabilisty. Jak praviła, viełasipied nabyvajuć nie jak alternatyvu mašynie, a jak dadatak, kab zaniacca sportam abo adpačyć ź siamjoj.

Biełaruś aktyŭna skaračaje razryŭ ad viadučych jeŭrapiejskich krain u halinie viełasipiednaj mody i kultury. «Usio bolš ludziej vykarystoŭvajuć viełasipied u paŭsiadzionnym žyćci. Staŭleńnie da jaho mianiajecca: zaraz heta nie prosta sposab zaniać volny čas, a nieadjemny atrybut zdarovaha ładu žyćcia. Pry aptymistyčnym scenary dasiahnuć jeŭrapiejskaha ŭzroŭniu kraina moža ŭžo praz 3-4 hady», — ličyć ekśpiert.

• 0
• 0
• 0
• 0
• 0
• 0
• 0
• 0