Jak šef-kuchar Pucina stvaryŭ vialikuju armiju kramloŭskich trolaŭ

Siońnia ŭ adkryty dostup trapiła ŭzłamanaja «Ananimnym Internacyjanałam» pierapiska kiraŭnictva «Ahienctva internet-daśledavańniaŭ» (AII) — kantory, jakaja zajmajecca arhanizacyjaj prakramloŭskaha trolinha.

AII naležyć «kucharu Pucina» — zasnavalniku chołdynha «Kankord» Jaŭhienu Pryhožynu (asabista znajomamu z prezidentam Rasii), a niepasrednaje kiraŭnictva Kampanijaj ažyćciaŭlaje Maryja Kupraševič (viadomaja tym, što ŭładkoŭvałasia na pracu ŭ libieralnyja ŚMI z metaj špijanažu).

Uzłamanaja pierapiska dazvalaje acanić realnyja maštaby trolinhavaha biźniesu i bolš daviedacca pra niekatoryja «temy».

Miarkujučy pa buchhałtarskich spravazdačach, jakija majucca ŭ rasparadžeńni The Insider, AII chutka razrastajecca. Ahulny miesiačny biudžet vyras z 25 młn rasijskich rubloŭ (kala 700 tys. dalaraŭ) u śniežni da 33 młn (kala 900 tys. dalaraŭ) u krasaviku.

Pry hetym kali ŭ studzieni «infarmacyjny błok» składaŭsia z 207 čałaviek (6 žurnalistaŭ, 125 «błohieraŭ-kamientataraŭ» u ofisie, 40 kamientataraŭ, jakija pracujuć «na adlehłaści» dniom i 36 kamientataraŭ, jakija pracujuć nočču paźmienna), to ŭžo ŭ krasaviku — 313 čałaviek.

Zarobak bolšaści ź ich vahajecca ŭ rajonie 37—40 tys. rasijskich rubloŭ (1 000 — 1 100 dalaraŭ, pry nahruzcy kala 100 kamientaroŭ u dzień). Praŭda, mnohija ź ich, chutčej za ŭsio, miortvyja dušy. U «źlitym» aŭdyjozapisie hiendyrektar Michaił Bystroŭ paprakaje Kupraševič u tym, što jana ściahnuła siabie ŭ kišeniu nie mienš za 10 miljonaŭ:

Cikavyja taksama i temy, jakimi zajmalisia troli.

Napramuju jany ŭ pierapiscy nie paznačanyja, ale niekatoryja proźviščy ŭsio ž taki uspłyvajuć: tak, naprykład, u studzieni AII źbiraŭ manitorynh pa čornym pijary Dvarkoviča i Chadarkoŭskaha. U spravazdačy skazana, naprykład: «U sietcy idzie raskrutka videamateryjałaŭ, što kampramietujuć dziejnaść Dvarkoviča <…>, a taksama bratoŭ Biłałavych i Mahamiedava».

(…)

A voś spravazdača AII z 1 pa 10 studzienia 2014 hoda ŭ jakim taksama skroź prasočvajucca niekatoryja temy ( arfahrafija zachavanaja):

«Za minuły pieryjad było napisana 9 dopisy. 1 dopis na temu navahodniaha zvarotu Pucina, 3 dopisy na temu teraktaŭ u Vałhahradzie, 2 dopisy na temu pjanaha kiravańnia Navalnaha, 3 — na temu «Pucin». Try dopisy byli vyviedzienyja ŭ top.

2 studzienia ŭ trendy tvitara vyvodziŭsia chešteh ab navahodnim zvarocie Pucina.

Chešteh atrymałasia padniać na 15 miesca, ale važny mienavita top-10. Pryčyny pa jakim nie ŭdałosia padniać vyšej nastupnyja: a) usia kamanda raźjechałasia na navahodnija śviaty; b) u suviazi z hetym daviałosia pracavać na čym papała, a nie na svaich padrychtavanych rabočych mašynach; v) u trendach ceły dzień znachodzilisia roznyja chešy pra sieryjał Šerłak, jakija źmianiali adzin adnaho, što śviedčyć ab dobra padrychtavanych i prafiesijna vykanańnie zakazaŭ na pijar novych sieryj treciaha siezona sieryjała».

U inšaj spravazdačy značacca nastupnyja temy: «Sočy», «Majdan», «Daktryna 2050» (zakazusie ŭ vydumanych płanach Dziarždepa ZŠA), «Ja patryjot» (zakazusie suprać Chadarkoŭskaha, Navalnaha, Ałfiorava, PussyRiot, Procharava, Chakamady i Niamcova).

Kali ciapierašni temp vydatkaŭ zachavajecca, to «fierma trolaŭ» budzie kaštavać Pryhožynu kala $ 10 młn. u hod. I heta jašče nie ŭsie vydatki…

U pierapiscy vyjaŭlajucca i inšyja prajekty z temy ž arhanizatarami. Tak, naprykład, ahienctva navinaŭ «Charkaŭ» (NACH) abychodzicca Pryhožynu krychu bolš čym u miljon rasijskich rubloŭ u miesiac (30 tys. dalaraŭ), hazieta «Nieŭskija naviny» — u 3 młn, a adnajmiennaje ahienctva — krychu bolš za 2 młn. u miesiac.

Cikava, darečy, što jašče ŭ listapadzie 2013 hoda, kali «Jeŭramajdan» jašče tolki pačynaŭsia, filijał NACH u Simfieropali ŭžo raspracavaŭ «Prajekt pa arhanizacyi dziejnaści, nakiravanaj na ŭzmacnieńnie ŭpłyvu Rasijskaj Fiederacyi na terytoryi Aŭtanomnaj Respubliki Krym, Paŭdniovym Uschodzie Ukrainy (Navarosii), a taksama Ukrainie ŭ cełym».

Metaj prajekta było: «jak minimum pieramoha na vybarach u miascovyja saviety na terytoryi Aŭtanomnaj Respubliki Krym i paŭdniovym uschodzie Ukrainy (Navarosii), aktyŭny ŭdzieł i istotny ŭpłyŭ na situacyju ŭ baraćbie za prezidenckaje kresła, farmiravańnie šmatlikaj frakcyi ŭ Viarchoŭnaj Radzie Ukrainy, a taksama pryznačeńnie svaich prychilnikaŭ na klučavyja pasady ŭ orhanach dziaržaŭnaj ułady i miascovaha samakiravańnia». Takim čynam ideja «Navarosii» padkantrolnaj Maskvie aktyŭna prasoŭvałasia jašče pry Janukoviču, bolš čym za try miesiacy da revalucyi…

• 0
• 0
• 0
• 0
• 0
• 0
• 0
• 0