Z 1 lipienia Biełaruś čakaje tatalny deficyt pramysłovych i spažyvieckich tavaraŭ. Ab hetym havorycca ŭ paviedamleńni Partyi BNF u suviazi z padrychtavanym Ministerstvam pramysłovaści prajektam ukaza prezidenta, pavodle jakoha 1 lipienia budzie ŭviedziena vyklučnaje prava dziaržavy na impart šerahu pramysłovych tavaraŭ, anałahi jakich vyrablajucca ŭ Biełarusi.
«Faktyčna rychtujecca raspaŭsiudžvańnie instytutu śpiecimparciora na vialiki pieralik tavarnych hrup i źniščeńnie zamiežnaha ekanamičnaha składalnika biełaruskaj ekanomiki», — cytuje pres-słužba partyi namieśnika staršyni arhanizacyi Ryhora Kastusiova. Palityk upeŭnieny, što taki padychod da ekanamičnaj palityki pryviadzie da tatalnaha deficytu, pryčym nie tolki impartnych tavaraŭ, ale i tavaraŭ, vyrablenych z prymianieńniem impartnych kamplektujučych i syraviny.
«Źniknuć nie tolki prapisanyja va ŭkazie bytavaja technika, radyjotechnika, aŭtamabili i šyny, ale i inšyja impartnyja tavary», — ličyć jon.
«Spustašeńnie tysiač pradpryjemstvaŭ i pryvatnych pradprymalnikaŭ, źniknieńnie dylerskich sietak i razbureńnie ajčynnaha pramysłovaha rynku stanie dalejšym nastupstvam pryniaćcia novaha ŭkaza, — adznačyŭ palityk. — Sacyjalnyja straty i biespracoŭje ŭ hetaj śfiery značna pavialičacca i ŭ bolšaj stupieni pieravysiać vyhady tych asobnych pradpryjemstvaŭ, jakija atrymajuć mahčymaść pradać na ŭnutranym rynku svaju nierealizavanuju pradukcyju».
Kastusioŭ ličyć, što paśla takoha ekśpierymientu źniknuć napracavanyja hadami zamiežnyja ekanamičnyja suviazi biełaruskich pradpryjemstvaŭ, a miascovy rynak stanie lohkaj zdabyčaj rasijskich imparcioraŭ. «Faktyčna ŭrad prapanoŭvaje «abnulić» ajčynny pramysłovy rynak i ŭstupić u Jeŭrazijski ekanamičny sajuz biez nacyjanalnaha rynku impartu», — adznačyŭ Kastusioŭ.
U Partyi BNF pierakananyja, što takija dziejańni ŭład źjaŭlajucca faktyčna ŭviadzieńniem «vajennaha kamunizmu» ŭ śfiery źniešniaj ekanamičnaj dziejnaści. «Ukaz vyhladaje jak ekanamičnaja dyviersija, skiravanaja suprać nacyjanalnaj ekanomiki. Nie vyklučaju, što impuls da jaje byŭ dadzieny tymi čynoŭnikami, jakija pradstaŭlajuć Biełaruś u strukturach Mytnaha sajuza i raspracoŭvajuć miery pa zdačy biełaruskaj ekanomiki rasijskamu kapitału pad šyldaj Jeŭrazijskaha sajuza», — padkreśliŭ Kastusioŭ.
Partyja BNF zaklikaje ŭsie biźnies-asacyjacyi, halinovyja abjadnańni pradprymalnikaŭ i pramysłoŭcaŭ, ekanamičnyja daśledčyja centry, prafsajuzy i palityčnyja partyi salidarna vystupić «suprać absurdnaha ekanamičnaha zachadu, jaki rychtujecca dziejnym kiraŭnictvam krainy».
Ciapier čytajuć
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary