Bajec śpiecatrada «Pahonia»: Tut pakul što ciažka

«Naša Niva» źviazałasia z adnym ź piaci bajcoŭ stvoranaha na Vałyni atrada «Pahonia». Jany pajšli ŭ dobraachvotnicki bataljon pry Ministerstvie ŭnutranych spraŭ Ukrainy, kab vajavać u Danbasie. Bajec adkazaŭ praz Fejsbuk, fota dasłać admoviŭsia ź mierkavańniaŭ biaśpieki.

— Kamu naležała ideja stvareńnia atrada «Pahonia«?

– Nievialikamu kołu biełarusaŭ, jakija vyrašyli jechać na ŭschod Ukrainy, dapamahčy ŭ vajnie z terarystami i rasiejskimi najemnikami.

— Jakim čynam u atrad nabirajuć ludziej?

— Pakul jašče nikoha nie nabirali. Pieršy atrad — heta koła siabroŭ. Dalej budziem vypracoŭvać technałohiju naboraŭ, kab paźbiehnuć zasłanych kazačkoŭ z orhanaŭ.

— Jaki budzie jurydyčny status takich bajcoŭ?

My nie cikavilisia jurydyčnymi pytańniami, my prosta robim toje, što treba rabić u dadzienaj situacyi.

— Najomnictva ŭ Biełarusi zabaroniena zakonam. Tamu jaki status moža mieć słužba i ŭ čym jana budzie zaklučacca?

— My nie najomniki. My idziom nie za hrošy, a vajavać z terarystami i karnymi atradami, finansavanymi z RF! Nakont svajho statusu — my prosta dabraachvotniki, na svaju ŭłasnuju adkaznaść.

— Čamu, pa-Vašamu, biełarusam na siońnia važna dapamahać Ukrainie?

-– Pa-pieršaje, tamu što nielha zastavacca abyjakavym da bratniaha hora. Pa-druhoje, Ukraina ciapier vajuje za svaju niezaležnaść z našym supolnym voraham — kramleŭskaj mafijaj.

— Jak vynik ukrainskich padziej, pa-Vašamu, paŭpłyvaje na Biełaruś?

- -Praź niejki čas Ukraina budzie častkaj Jeŭraźviazu, i Biełaruś amal z usich bakoŭ (akramia RF) budzie atočana cyvilizavanymi krainami. Hledziačy na toje, jak budzie raźvivacca Ukraina ŭ Jeŭraźviazie, moža i biełarusy zrazumiejuć karyść ad samavyznačeńnia.

— U internecie raźmieščana abviestka pra zbor srodkaŭ na broniekamizelki dla bajcoŭ «Pahoni». Nakolki istotny ŭzrovień ekipiravańnia ŭ bai?

— Broniekamizelki byvajuć roznyja — 4-ja, 5-ja markiroŭka moža abaranić ad kuli. Taksama kali trapić askołak niejki… Ekipiroŭka taksama ŭpłyvaje na stan bajca. Naprykład, dobry abutak harantuje cełasnaść halenastopaŭ…

— U abviestcy havorycca, što srodki na dapamohu atradu źbiraje internet-aktyvistka Tania Jełavaja. Ci dziaŭčaty mohuć słužyć u atradzie?

— Pakul u atradzie trenirujucca vyklučna chłapcy, dalej pabačym. A Taćciana — heta akramia taho što prosta pryhožaja dziaŭčyna, vielmi adkaznaja, idejnaja i bajavaja, nie ździŭlusia, kali jana taksama budzie ŭ atradzie.

— Ci mahčymaje nakiravańnie biełarusaŭ u zonu bajoŭ?

— Adrazu pa skančeńni trenavańniaŭ my vyjazdžajem u zonu praviedzieńnia ATA!

Pakul što pryzvyčajvajemsia da novych umovaŭ žyćcia, uciahvajemsia ŭ vajskovaje žyćcio. Pobyt u łahiery vajskovy. Pakul što ciažka, ale, jak havorycca, «ciažka ŭ navučańni, lohka ŭ bai». Spadziajomsia, što na froncie heta nam dapamoža.

Darečy, padrychtoŭkaj zajmajucca vysokakvalifikavanyja instruktary. Tut tydzień muštry bolš daje, čym kali paŭtara hoda prybiralni ŭ vojsku draiš!

• 0
• 0
• 0
• 0
• 0
• 0
• 0
• 0