A dzie ž lider?

Na tuju chvilinu, kali ja nabiraju hetyja radki, ŭeb-bačynu anłajnavaj kanferencyi z tryma pretendentami na pasadu kiraŭnika Partyi BNF naviedali užo kala tysiačy čałaviek. Intares vidavočny.

Pavialičyć

Vincuku Viačorku apryjory było najciažej. Bo na dziejnaha kiraŭnika kładziecca ciažar adkaznaści za ŭsie prablemy, jakich u Partyi BNF bahata. Jahonyja ž kankurenty atrymali mahčymaść vystupić "apazycyjanerami ŭ kvadracie", to bok krytykami i režymu, i partyjnaha kiraŭnika adnačasna. Naturalna, što ŭ pytańni pra limit terminaŭ staršynioŭstva abodva namieśniki vyhladali bolej demakratyčna:) Zvyš taho, sp. Viačorku była zakinutaja prychilnaść da "kratovaj pracy".

Praŭdu kažučy, sapraŭdy nie natchniaje voś taki jahony adkaz na pytańnie, što budzie novaje: "...Kiraŭniki arhanizacyjaŭ BNF u abłaściach i bujnych haradach buduć źbiracca razam sa staršyniom i namieśnikami što dva tydni — dla stratehičnaha j taktyčnaha planavańnia, padrychtoŭki palityčnych rašeńniaŭ. U vyjaznych pasiedžańniach Sojmu i Ŭpravy buduć brać udzieł usie frontaŭcy taje miaściny, kudy jedziem".

Aparatnyja niuansy, jakija nie chvalujuć nikoha, akramia samich funkcyjaneraŭ.

Ale ci prahučali niejkija jaskravyja alternatyŭnyja idei?

Voś adzin z adkazaŭ Alesia Michaleviča: "Bolšaść našych prychilnikaŭ nia bačyć paśpiachovaści masavych akcyj, tamu dla pačatku treba znajści inšyja efektyŭnyja formy akcyj, skancentravacca na daniasieńni infarmacyi da ludziej, i tady ŭ peŭny momant akcyi stanuć pa-sapraŭdnamu masavymi akcyjami".

Moc i śviežaść prapanovy acanicie sami.

Samaje ž prykraje, što havorka źviałasia pieravažna da vyśviatleńnia stasunkaŭ u samoj Partyi BNF, miž PBNF dy KCHP-BNF, miž tymi ci inšymi fihurami dy strukturami tytulnaj apazycyi ŭvohule.

Kaniešnie, partyjnamu aktyvu, uvohule palityzavanaj publicy cikavyja i hetyja perypetyi (adzin z naviednikaŭ źjedliva ŭžyŭ tut słoŭca "serpentaryj"). Ale ciažka ŭjavić sabie pradstaŭnika elektaratu, nie anhažavanaha va ŭnutryapazycyjnyja žarści, jaki b ciarpliva pračytaŭ ad pačatku da kanca hetuju "kišku", što nia toŭpicca i ŭ tuzin ekranaŭ:)

Zapomniŭsia chiba što daścipny adkaz Vincuka Viačorki na pytańnie z padvocham: "...U razie majoj pieramohi palityka BNF u halinie pravapisu kančatkaŭ rodnaha skłonu nazoŭnikaŭ mužčynskaha rodu i prynazoŭnika "z" pierad nastupnymi miakkimi zyčnymi budzie žorstka ŭviazanaja z palitykaj dyversyfikacyi pastavak enerhanośbitaŭ!".

Uvohule ž brakavała mienavita kankretyki ŭ pytańniach taktyki dy stratehii. Mažornyja zajavy: maŭlaŭ, damožamsia stvareńnia frakcyi BNF u parlamencie i ŭsio takoje — paviśli ŭ pavietry. Bo niezrazumieła, adkul što voźmiecca.

Asabista mnie bolej impanavali b nie badzioryja kliše, a ćviarozyja razvahi pra toje, naprykład, čamu padzieńnie rejtynhu kiraŭnika dziaržavy praktyčna nie pavialičvaje šerahi tytulnaj apazycyi. Heta ž zaśviedčany sacyjolahami fakt, što byłyja prychilniki kiroŭnaha kursu, rasčaravaŭšysia ŭ "dziaržavie dla narodu", nia jduć na maršy, a papaŭniajuć indyferentnaje bałota. Vypadajučy z-pad upłyvu Łukašenkavaj charyzmy, hetyja ludzi, adnak, nie traplajuć u enerhietyčnaje pole apazycyjnych lideraŭ. Mo' mahnetyzmu małavata? Darečy, na papuliźmie tut nia vyjedzieš, što ilustrujuć, u pryvatnaści, niekatoryja adkazy sp. Michaleviča.

Urešcie, varta ščyra pryznać, što apazycyja siońnia abjektyŭna słabaja dy małaŭpłyvovaja. Ja ni ŭ jakim razie nia staŭlu pad sumnieŭ mužnaść, samaachviarnaść mnohich jaje lideraŭ i aktyvistaŭ. Ale ž usio adno spadzievy prahresyŭnaj častki hramadztva na pieramieny źnitavanyja nia z maršami dy kampanijami, a z tym, što "kratovuju pracu" padkopu pad režym robiać ekanamičnyja čyńniki plus vonkavy palityčny presynh.

Jašče raz nahadaju dumku Jurja Drakachrusta: ad apazycyi faktyčna nie zaležyć, kali adbuducca pieramieny, ad jaje zaležyć jakaść hetych pieramienaŭ.

I dziela hetaj mety varta najpierš pierastać varycca va ŭłasnym soku dy adkinuć šapkazakidalnickija stereatypy. Uvohule — biaźlitasna adsiakać usie stereatypy. Bo nie žyćcio padhaniajecca pad daktrynu, a naadvarot. Dziela hetaha mała tolki źlikvidavać "idałapakłonstva ŭnutry BNF".

Dla mianie jość vidavočnym, što realnaja transfarmacyja Biełarusi budzie iści nia tak pryhoža i ŭvohule trochi nia ŭ tych parametrach, što byli zakładzienyja ŭ pieršapačatkovy ramantyčny prajekt Biełaruskaha narodnaha frontu. Miž tym dahmatyzm i pa siońnia źviazvaje frontaŭcam ruki, zvužvaje absiah kamunikacyi z hramadztvam. Zrešty, heta ŭžo asobnaja tema.

Što ž da žanru hetaha anłajnu, to zamiest abvieščanych debataŭ adbyłosia chutčej testavańnie — paralelnyja adkazy na adny i tyja ž pytańni. Heta apryjory źnižaje hradus dyskusyjnaści.

Tak ci inačaj, vynik verbalnaha supiernictva možna rascanić jak ničyjny. Vincuk Viačorka — najbolej vytančany rytar, Viktar Ivaškievič bolej ekspresyŭny, Aleś Michalevič — samy radykalny. Toje na toje. Uvohule ŭsie troje — dobryja chłopcy :)

Prykmietaŭ charyzmatyčnaha lidera z atamnym zaradam kreatyvu zaŭvažana nie było.

ZY. Darečy, nakont sakretaŭ kamunikacyi. Viktar Ivaškievič dvojčy zakinuŭ naviednikam sajtu karystańnie "pseŭdanimami" (treba razumieć — nikami:). Niedalnabačny zamach na śviatuju prerahatyvu sieciŭnaha narodu. Heta aznačaje apryjory nastroić suprać siabie 99% naviednikaŭ niezaležna ad ichnich palityčnych pohladaŭ.

A chočacie "z cełym narodam hutarku vieści"! :)

• 0
• 0
• 0
• 0
• 0
• 0
• 0
• 0