Imia Ryhora Baradulina budzie nasić vulica, dzie staić dom paeta, a taksama škoła, jakaja znachodzicca na hetaj vulicy. U Vušackim muziei pašyrać častku ekspazycyi pra Ryhora Baradulina.
Ź inicyjatyvaj ušanavać na radzimie pamiać Ryhora Baradulina vystupili Sajuz biełaruskich piśmieńnikaŭ, Rada Viciebskaj abłasnoj arhanizacyi Tavarystva biełaruskaj movy, šerah inšych hramadzkich abjadnańniaŭ. Na aficyjnym sajcie Viciebskaha abłvykankamu źjaviŭsia adkaz inicyjataram.
Paviedamleńnie na aficyjnym sajcie abłvykankamu pra ŭšanavańnie pamiaci litaratara, napisana pa-biełarusku, ale z pamyłkami. Tym nia mienš, jano vielmi ŭściešyła prychilnikaŭ paezii Ryhora Baradulina.
Na pačatku lipienia Viciebskaja abłasnaja rada HA «Tavarystva biełaruskaj movy imia Francyska Skaryny» źviarnułasia da premjer-ministra Michaiła Miaśnikoviča i kiraŭnika administracyi prezydenta Andreja Kabiakova z prapanovaj ušanavać pamiać jašče adnaho vybitnaha litaratara, jaki pachodzić ź Viciebščyny — Hienadzia Buraŭkina, jaki pajšoŭ z žyćcia 30 traŭnia hetaha hodu. Adkazu na list z prapanovami vydać u dziaržaŭnym vydaviectvie da 80-hodździa paeta vybranyja jaho tvory, ustalavać u Miensku na domie, dzie jon žyŭ, memaryjalnuju došku; nazvać u honar Hienadzia Buraŭkina vulicy ŭ Miensku, Połacku, Rasonach, prysvoić imia Buraŭkina adnoj ź biblijatek na Viciebščynie aŭtary pakul nie atrymali.
Kamientary