Asambleja NDA prapanoŭvaje biełarusam vyznačyć simvał, jaki abjadnaje nacyju
Asambleja niaŭradavych demakratyčnych arhanizacyj (NDA) u miežach ahulnanacyjanalnaj kampanii «Zrobim lepš!» abviaściła pra start prajekta, pryśviečanaha raspracoŭcy simvała, jaki moh by abjadnać biełarusaŭ.
Pra heta paviedamlaje aficyjny sajt Asamblei NDA.
Prajekt realizujecca pry infarmacyjnaj padtrymcy hramadskaha ahienctva «Art Siadziba» i biełaruskaj słužby «Radyjo Svaboda».
Jak adznačajuć arhanizatary prajekta, siońnia nie isnuje «mahutnaha i jarkaha adzinaha znaka, jaki b pryniała bolšaść biełarusaŭ». «Heta akaličnaść zaachvociła Asambleju NDA Biełarusi, jakaja abjadnoŭvaje bolš za 300 niaŭradavych demakratyčnych arhanizacyj i hramadskich inicyjatyŭ, źviarnucca da hramadstva z pytańniem «Jaki simvał abjadnoŭvaje biełarusaŭ?», — havorycca ŭ paviedamleńni.
U miežach hetaj hramadska-kulturnaj akcyi mastakam, dyzajnieram, aktyvistam i prosta nieabyjakavym biełarusam prapanujecca «razam prydumać i vyznačyć sučasny nahladny simvał, jaki stanie znakam abjadnańnia biełarusaŭ u prajavie svajoj niezaležnaj pazicyi, budzie pryniaty šyrokimi słajami hramadstva».
«Składanaja hieapalityčnaja situacyja, rasijskaja prapahanda, masavaje raspaŭsiudžvańnie rasijskaj simvoliki — nielha pradkazać, što budzie nieŭzabavie z krainaj i nami, — adznačajuć aŭtary prajekta. — Tamu nahladny simvał, jaki budzie abjadnoŭvać krainu i biełarusaŭ, nieabchodny».
Jak paviedamlajecca, svaje prapanovy z nahody simvała da 31 žniŭnia možna adpraŭlać na adras elektronnaj pošty [email protected] z paznakaj «Simvał krainy». Budzie abrany najbolej prydatny dla abjadnaŭčaj roli simvał. Jaho prezientacyja adbudziecca 8 vieraśnia, u dzień 500-hodździa bitvy pad Oršaj.
Znak-pieramožca budzie naniesieny na śpiecyjalna vyrablenyja charuhvy, jakija možna budzie biaspłatna zamović pa pošcie praz sajt symbal.by ci atrymać u hramadskich centrach u šerahu biełaruskich haradoŭ.
Arhanizatary hetaj akcyi paśla płanujuć puścić hety znak u «samastojnaje šyrokaje raspaŭsiudžvańnie pa krainie ŭ roznych formach», kab «abrany hramadstvam simvał bližejšym časam staŭ najaŭnaj prajavaj adzinstva biełarusaŭ u imknieńni da niezaležnaści i šyrokaj nacyjanalnaj śviadomaści».
Kamientary