Biełarusy: adukavanyja, žyvučyja i...
Kali jość śviedčańni peŭnych dasiahnieńniaŭ nacyi, to čamu b i nia dać volu ścipłamu honaru? :) Padstaŭ pačuvacca zaniadbanymi ŭ biełarusaŭ i tak bahata.
Dziaržaŭnyja medyi ŭznosiać da niabiosaŭ toj fakt, što Biełaruś zaniała davoli vysokaje — 64-je miesca ŭ śviecie pavodle indeksu raźvićcia čałaviečaha patencyjału (IRČP). Niezaležnyja resursy nie pakidajuć ad pakazčyka kamienia na kamieni. A niekatoryja ŭvohule paličyli za lepšaje praihnaravać navinu: chiba ž možna pryznavać, što pry isnym režymie mahčymyja niejkija dasiahnieńni?
Hety AANaŭski rejtynh sapraŭdy vielmi ŭmoŭny. Dastatkova skazać, što ŭ im fantastyčna vysoka staić Kuba (51-je miesca!). To bok čyńnik demakratyi i pravoŭ čałavieka jak śled nia ŭličvajecca.
Što da našaj krainy, to pahodu robić vysoki ŭzrovień piśmiennaści — 99,6% (paraŭnajcie: u Ehipcie, kałyscy vialikaj cyvilizacyi, blizu pałovy žycharoŭ nia ŭmiejuć čytać). Nia samy horšy i pakazčyk čakanaj praciahłaści žyćcia — 68,7 hodu. Viadoma ž, tut biełarusam daloka, naprykład, da iślandcaŭ (ich kraina pavodle IRČP vyjšła na pieršaje miesca, abahnaŭšy Narvehiju). Ale z ulikam našaha sucelnaha ekstrymu — histaryčnaha, palityčnaha, pobytavaha (masavaje pjanstva, paleńnie i h.d.) — śmieła možna kazać pra žyvučaść nacyi.
Nu i, narešcie, hraje rolu toj niuans, što VUP u dadzienym vypadku ličycca pavodle parytetu pakupnoj zdolnaści. Tady jon u nas padskokvaje bolej čym udvaja (AAN aperuje ličbaj pad 8 tysiač dalaraŭ na čałavieka za hod). Zahadku hetaha ajčynnaha fenomenu vam lepiej patłumačać finansava-ekanamičnyja eksperty. A kali dvuma słovami, to adekvatnaść hetaha pakazčyku sumnieŭnaja.
I ŭsio ž!
Pa mnie, dyk nadta ŭžo nakidacca na toj IRČP nia varta. Kali jość śviedčańni peŭnych dasiahnieńniaŭ nacyi, to čamu b i nia dać volu ścipłamu honaru? :) Padstaŭ pačuvacca zaniadbanymi ŭ biełarusaŭ i tak bahata.
Kali pra niešta zvonić dziaržaŭnaja presa, to nie zaŭždy varta kamentavać z dakładnaściu da naadvarot. Toj indeks jość, urešcie, nie miedalom dla režymu, a śviedčańniem našaha čałaviečaha patencyjału. Voś što da jahonaj realizacyi, to tut uładzie sapraŭdy možna adrasavać šmat rytaryčnych pytańniaŭ — nakont svabody pradprymalnictva i medyjaŭ, stanu hramadzianskich pravoŭ, jakaści toj ža adukacyi i h.d. (vy lohka praciahniecie hety śpis).
Ale ŭ lubym vypadku AANaŭski pakazčyk ilustruje jak minimum toje, što biełarusy nia złomki. Astatniaje prykładziecca.
ZY. A ŭsio ž špilku dziaržaŭnym prapahandystam varta ŭvatknuć :) Trubiać, što, voś, hladziecie, Biełaruś uvajšła ŭ hrupu krain z vysokim IRČP — ale ni hu-hu pra toje, što hetym razam AAN pašyryła samu hrupu ad 63 da 70 dziaržaŭ. Kab nia heta, siadzieli b u druhoj lizie!
Pobač z Łukašenkam na chakiei źjaviłasia novaja pryhažunia10
Kamientary