Heineken nabyvaje «Siabra»

Pra heta paviedamlajecca ŭ aficyjnym pres-relizie kampanii.

Halandzkaja kampanija Heineken nabyvaje babrujski piŭzavod «Siabar». Nabyćcio adbudziecca praz pahłynańnie jaje matčynaj struktury, zarehistravanaj na Kipry dy ŭtvoranaj pry ŭdziele amerykanskaj invest-hrupy Detroit Investment Ltd. i Mižnarodnaj finansavaj karparacyi (IFC). U pres-relizie nie paviedamlajecca pra sumu ŭhody. Viadoma, što finansavańnie jaje raspačniecca ŭ budučym hodzie i zavieršycca ŭ 2012 h.

Rehijanalny dyrektar Heineken pa Centralnaj i Ŭschodniaj Eŭropie Nika Nusmejier adznačyŭ, što «hetaja ŭhoda adpaviadaje našaj stratehii zajmańnia liderskich pazycyjaŭ na rynku». «Biełaruś — heta dynamičny rynak i heta dazvolić stvaryć cudoŭnuju platformu dla raźvićcia našych brendaŭ na takim ža ŭzroŭni, jak i ŭ Rasiei», — paviedamiŭ Nika Nusmejier.

Ciarhiej Levin, pradstaŭnik kampanii «Siabar», ad kamentaroŭ admoviŭsia, spasłaŭšysia na adsutnaść času.

Nahadajem, što pačynajučy ź viasny nie ścichali čutki pra mahčymaje nabyćcio pivavarni «Siabar» bujnoj zamiežnaj kampanijaj. Najčaściej nazyvali Heineken. Pavodle infarmacyi ŭdzielnikaŭ rynku, kampanijaj «Siabar» cikavilisia taksama BBH i InBev. Kiraŭnik babrujskaha brovaru Siarhiej Levin nie chavaŭ taho faktu, što kampanija viadzie adpaviednyja pieramovy, ale da apošniaha admaŭlaŭsia nazyvać mahčymaha pakupnika i ŭmovy prodažu pivavarni. «Heta moža być tolki bujnaja kampanija» — padkreślivaŭ jon.

25 śniežnia rasiejski «Kommiersant» napisaŭ pra chutki prodaž «Siabra» halandzkamu Heineken. Adnak zacikaŭlenyja baki tady admovilisia kamentavać mahčymy prodaž babrujskaj kampanii. «Kommiersant», spasyłajučysia na vartuju davieru krynicu ŭ hałoŭnym ofisie Heineken, nazvaŭ navat mahčymaha kiraŭnika budučaj biełaruskaj dački Heineken — Chenka van Helderena.

Rasiejskija ŚMI nazvali i canu ŭhody. Pavodle ich babrujski brovar acenieny na 100 dalaraŭ za hiektalitar, heta značyć — na 60 miljonaŭ dalaraŭ (tolki ŭ madernizacyju piŭzavodu «Siabar» ciapierašnija akcyjanery ad 2004 h. ukłali kala 35 miljonaŭ dalaraŭ). Heta mienš, čym Heineken zapłaciŭ za pakupku PITa (160 dalaraŭ za hiektalitar), ale bolej, čym addaŭ SUN InBev za «Tińkoff» ($83,75 za hiektalitar).

Analityk Deutsche Bank Alaksiej Kryvašapka ličyć acenku «Siabra» zavyšanaj, adnak, zvažajučy na palityčnyja ryzyki, ź jakimi moža sutyknucca zamiežny biznes u Biełarusi, nazyvaje canu ŭhody apraŭdanaj. U prykład stavicca sytuacyja vakoł niaŭdałaj sproby rasiejskaj «Bałtyki» pryvatyzavać biełaruski brovar «Krynica».

Halandzkaja kampanija Heineken N.V. ŭpeŭniena prasoŭvajecca na piŭnym rynku nia tolki Centralnaj, ale i Ŭschodniaj Eŭropy. Niadaŭna jana nabyła serbskuju pivavarnuju kampaniju Rodic Brewery. Abjom vytvorčaści hetaj kampanii składaje kala 1,5 młn hiektalitraŭ piva ŭ hod. Hetaje nabyćcio zrabiła Heineken hulcom №3 na serbskim rynku, paviedamiŭ Nika Nusmejier. U suviazi z hetym varta adznačyć, što nabyvajučy pivavarniu «Siabar» Heineken atrymlivaje niebłahija šancy i na biełaruskim rynku. Pa vynikach biahučaha hodu było ŭ Babrujsku było pryhatavana 5,08 młn dał piva, što na 50% bolš, čym letaś. Heta stała mahčymym dziakujučy čarhovaj rekanstrukcyi vytvorčaści. Dola brovaru na biełaruskim rynku składaje kala 15%, što dazvoliła joj apynucca na druhim miescy paśla «Krynicy». Kiraŭnictva pivavarni nie chavaje svaich namieraŭ stać №1 u Biełarusi.

SZAT «Brovarnaja kampanija «Siabar» utvoranaje ŭ 2004 h. Zasnavalnikami źjaŭlajucca kampanija Detroit-Belarus Brewing Company LLC (DBBC), utvoranaja pry ŭdziele amerykanskaj investycyjnaj hrupy Detroit Investment Ltd. i Mižnarodnaj finansavaj karparacyi, i AAT «Dziednava» (h. Babrujsk).

• 0
• 0
• 0
• 0
• 0
• 0
• 0
• 0