Dziakujcie!

«Dziakuj vam vialiki za pryhožuju movu – u vas dobra atrymoŭvajecca», — uśmichnuŭsia ja apierataru sietki «A-100» na kvoleńkuju sprobu razmaŭlać pa-biełarusku.

«Dziakuj! Zajazdžajcie da nas jašče!» – uśmichnuŭsia i apieratar, raspraviŭšy plečy.

Padavałasia b, heta ŭvohule nie padlahaje refleksii: u Rasiei na zapraŭkach absłuhoŭvajuć pa-rasiejsku, u Polščy pa-polsku i navat va Ŭkrainie pa-ukrainsku, ale jak tolki ŭ Biełarusi adna ź dziasiatkaŭ zapravačnych sietak pierajšła na nacyjanalnuju movu, heta vyklikaje niedaŭmienyja pozirki, pytańni ci navat šał u asobnych «impierskich imbicyłaŭ».

Chacia i pierachod na «movu» pakul što davoli ŭmoŭny. Moj ułasny dośvied pakazvaje, što pa-biełarusku na zapraŭkach «A-100» havorać u troch vypadkach z 10, jašče ŭ troch - na pryhožaj trasianačcy, i ŭ astatnich čatyroch z 10 – na čyściutkaj rasiejskaj. Navat na biełaruskaje pryvitańnie adkazvajuć – byccam i nie anansavałasia nijakaha pierachodu na matčynu.

Tym nie mienš, ja zaŭsiody dziakuju! Bo, na vialiki žal, my žyviem u takoj realnaści, kali rašeńnie razmaŭlać na rodnaj movie – heta Ŭčynak ź viakaj litary, za jakim staić asabistaja baraćba z savieckimi komleksami i hieraičnaja pieramoha nad unutranym tutejšym. Spračacca z hetym mohuć tolki tyja, chto nikoli nie sprabavaŭ razmaŭlać pa-biełarusku paŭsiul i zaŭsiody.

Kali ž tabie ŭ kramie skažuć: havarycie narmalna i nie vypiendryvajciesia; u pašpartnym stale: my nie vydajem błankaŭ pa-biełarusku; a paliklinicy: zapajniajcie tolki pa-rasiejsku – dyk ty nikoli nie skažaš, što razmaŭlać u Biełarusi pa-biełarusku – heta tak ža prosta, jak razmaŭlać u Polščy pa-polsku. Štodnia i paŭsiul u Biełarusi razmaŭlać pa-biełarusku – heta štodzionny i paŭsiudny hieraizm. Zrazumiejcie mianie pravilna: hieraizm biez vypiendrožu i nadryvu, ale hieraizm. Zrešty, kali hieraizm z vypiendrožam – heta ŭžo i nie hieraizm, a forma samalubavańnia.

Tamu i ŭčynak sietki zapravak «A-100» pierajści ŭ absłuhoŭvańni klijetaŭ na rodnuju movu – heta mužny vyčyn, jaki ŭ siońniašnim dni nie mažliva pieraacenić. Dyk davajcie kožny, u kaho balić za Biełaruś, padtrymajem ščyraje pamknieńnie sumlennych ludziej. Davajcie dziakavać!

Padziakujcie na staroncy «A-100» u Facebook. Potym zajedźcie na zapraŭku «A-100», zalejcie pad harłavinu bak paliva i padziakujcie apierataru. Padziakujcie i tady, kali heta kvoleńkaja mova, i tady navat, kali z vami buduć tolki pa-rasiejsku. Nu a što, ździvicie jaho, skažycie: «Dziakuj, što vašaja zapraŭka padtrymoŭvaje rodnuju movu! Ja razumieju, vam ciažka adrazu pierajści, ale nastupny raz pasprabujcie».

Kab vyžyć u hety čas, kab nie źniknuć i nie dazvolić siabie zataptać my pavinny być salidarnymi i adzin adnaho padtrymoŭvać. Nu a što moža być praściej, jak skazać: «Dziakuj vam za pryhožuju movu! Dziakuj vam, što vy jość!»

• 0
• 0
• 0
• 0
• 0
• 0
• 0
• 0