«Heta byŭ pryton». Muž i žonka ŭziali «zabituju kvateru», ukłali ŭ jaje 35 tysiač i ciapier žyvuć biaspłatna

Ź leta 2022 hoda siarod hatovych da žyćcia dziaržaŭnych arendnych «kvadrataŭ» stali źjaŭlacca «adščapiency» — kvatery, jakija nie bačyli ramontu apošnija hadoŭ dziesiać, a to i bolš. Dadavańnie takich abjektaŭ da šarahovych varyjantaŭ — nijakaja nie pamyłka. Usia sprava ŭ tym, što ludziam, jakija šukajuć dach nad hałavoj, vyrašyli prapanavać samastojna «praaphrejdzić» mietry (u adpaviednaści z kaštarysam, składzienym kamunalnikami). Naŭzamien — mahčymaść žyć u hetaj samaj kvatery i nie płacić za arendu, pastupova «źjadajučy» takim čynam sumu, vydatkavanuju na ramont. I tolki paśla taho, jak «inviestycyi» ŭ azdableńnie buduć pahašany, žychary pačnuć atrymlivać płaciožki, piša Onliner.by.

Pryncyp prosty: čym bolšaja razrucha ŭ kvatery — tym daŭžej atrymajecca arandavać mietry ŭmoŭna biaspłatna.

Upisacca ŭ takuju ramontnuju historyju vyrašyła Alena. Razam z mužam i dziećmi jana žyvie pad Minskam. I, jak i mnohija z nas, staić na čarzie majučych patrebu ŭ palapšeńni žyllovych umoŭ.

— Na ŭlik my stali ŭ 1999 hodzie, paśla naradžeńnia druhoha dziciaci, — raskazvaje Alena. — Da dziaržaŭnych arendnych kvateraŭ stali pryhladacca dosyć daŭno: treba ž dumać ab pašyreńni žyłpłoščy. Spačatku raźličvali patrapić u novabudoŭlu. Śviežy dom, dobryja płaniroŭki, ramont, u jakim jašče nichto nie žyŭ, — prosta mara. Tamu rehularna adhladali prapanovy i pisali zajavy na dvuchpakajoŭki i trochpakajoŭki. I zaŭsiody pralatali.

Pa našych nazirańniach, kvatery ŭ novych damach atrymlivali ludzi, jakija stali na čarhu ŭ 1986—1989 hadach. Adzin raz praskočyŭ 1994-y. I ŭsio. «Moładź» nie prabivałasia.

Na praciahu čatyroch hadoŭ my pisali zajavy ŭ nadziei na kvateru. Ale ŭ vyniku zrazumieli, što nam ničoha nie śviecić.

Tady muž i žonka vyrašyli pieraklučyć uvahu na kvatery, jakija patrabujuć ramontu. Adnak akazałasia, što i na ich surjozny popyt, asabliva kali kaštarys nievialiki.

Pavialičyć

— Varyjanty, jakija možna adramantavać za 6000—7000 rubloŭ, zabirajuć adrazu ž. My, viadoma, pasprabavali ščaścia, ale znoŭ zastalisia nie pry spravach. Stała zrazumieła, što treba padymać staŭki, — apisvaje svoj šlach da žylla ŭ Minsku dziaŭčyna.

U kastryčniku minułaha hoda na sajcie Minharvykankama narešcie źjaviłasia padychodnaja abjava. U haspadarach mieła patrebu 50‑mietrovaja dvuchpakajoŭka ŭ dobrym cahlanym domie, jaki niadaŭna pieražyŭ kapramont. Ź plusaŭ — stancyja mietro pad bokam. Ź minusaŭ — stan kvatery.

Pa raźlikach śpiecyjalistaŭ, vydatkavać na ramont (a dakładniej, adnaŭleńnie) dvuchpakajoŭki nieabchodna było 28 000 rubloŭ!

— Viadoma, my pajechali na miesca, kab ubačyć usio svaimi vačyma. Zahadzia razumieli, što tam budzie žach i kašmar. Ale nam spadabaŭsia sam dom, jaho raźmiaščeńnie, płaniroŭka kvatery i vializnaje akno ŭ haścinaj. Vyrašyli, što z hetaj «zahatoŭki» my zmožam zrabić niešta prystojnaje, — kaža Alena.

Pavialičyć

Tut užo kankurentaŭ u muža i žonki nie było, «kvadraty» adyšli im.

— Samo saboj, my zadalisia pytańniem, chto ž davioŭ kvateru da takoha stanu, — praciahvaje surazmoŭca.

— Vyśvietliłasia, što raniej u hetaj dvuchpakajoŭcy žyli baćka z synam, jakija pieratvaryli jaje faktyčna ŭ pryton. Tak jak kvatera nie była pryvatyzavana, jana ŭ niejki momant stała arendnaj. Ale płacić ni za arendu, ni za «kamunałku» mužčyny nie śpiašalisia. U vyniku nazapasili vielizarny — pad 50 000 rubloŭ — doŭh. Haz i vadu im adklučyli.

Na momant atrymańnia nami hetaj kvatery byłyja haspadary znachodzilisia ŭ turmie. Praz dva miesiacy adzin ź ich vyjšaŭ i… pačaŭ naviedvacca da nas u hości, nie razumiejučy, u čym ža sprava i čamu jon nie moža patrapić da siabie dadomu. Uvohule, pryjšłosia padklučyć učastkovaha, kab jon rastłumačyŭ čałavieku, što adbyvajecca.

Pavialičyć

Kolki na samoj spravie kaštuje ramont?

Na ramont kvatery mužu i žoncy aficyjna vydzielili paŭhoda. Šmat heta ci mała? Alena kaža, što im udałosia spravicca za čatyry miesiacy. Ale heta tolki dziakujučy tamu, što amal usie raboty vykonvali najomnyja majstry. Samastojna navasioły tolki pakłali łaminat i pakleili špalery.

— Nas papiaredzili, što kali nie ŭkładziomsia ŭ čatyry miesiacy, tady nie zmožam pretendavać na toje, kab hrošy, vydatkavanyja na ramont, pajšli ŭ zalik pražyvańnia. Tamu my śpiašalisia.

Što mahu skazać: takija kvatery — heta kot u miašku. Kaštarys składajecca paśla vizualnaha ahladu, a ŭ realnaści prablem našmat bolš.

Pavialičyć

Naprykład, zhodna z našym kaštarysam, na toje, kab padpravić tynkoŭku, advodziłasia ŭsiaho kala 300 rubloŭ: nibyta nieabchodna łakalna abnavić tyja ci inšyja ŭčastki. U realnaści ž, kali majstar tolki dakranuŭsia da ściany, usia staraja azdableńnie advaliłasia. Pryjšłosia pieratynkoŭvać kvateru całkam. I zamiest 300 rubloŭ my addali $1500 pa kursie.

Toje ž samaje i z elektrykaj. Pa kaštarysie — zamiena razietak. Pa fakcie — całkam zhniłaja pravodka, jakuju pryjšłosia prakładvać nanova. A heta jašče 2000 rubloŭ zvyš kaštarysu.

I tak amal va ŭsim. Ja sprabavała pahavaryć ź inžynieram i damahčysia taho, kab kaštarys skarektavali z ulikam realnaha stanu kvatery, ale jon skazaŭ, što heta nie praduhledžana zakonam. To bok «bankiet» za naš košt, — apisvaje dziaŭčyna.

Pavialičyć

Mianiać u kvatery pryjšłosia absalutna ŭsio — ad ŭvachodnych dźviarej da voknaŭ. Ale heta i zrazumieła: pakidać choć štości paśla prytonnaha minułaha mała kamu zachočacca.

U vyniku vydatkavać na abnaŭleńnie kvatery mužu i žoncy pryjšłosia 35 000 rubloŭ. Heta biez uliku mebli, tolki padłohi, ścieny i stoli.

Pavialičyć

— Važny niuans: uvieś toj čas, pakul idzie ramont, davodzicca ŭnosić arendnuju płatu. Całkam, nijakich panižalnych kaeficyjentaŭ. Tak, žyć u kvatery ty nie možaš, ale płacić abaviazany, — udakładniaje Alena.

— Paśla taho jak ramont skončany, u kvateru prychodzić kamisija, jakaja aceńvaje pieraŭtvareńni i źviaraje ich z kaštarysam. Usio fatahrafuje.

Ale navat heta jašče nie kaniec: treba atrymać śpiecyjalnaje rašeńnie ad vykankama. Hruba kažučy, atrymać dabro na toje, kab vydatkavanyja nami na ramont hrošy pajšli ŭ zalik arendnaj płaty. Nam pryjšłosia čakać hetaha rašeńnia dva miesiacy! I ŭvieś hety čas, naturalna, unosić arendnuju płatu. Liču, što takija pytańni pavinny razhladacca chutčej.

Pavialičyć

I ŭsio ž ab projdzienym šlachu my nie škadujem. Tak, było vydatkavana šmat hrošaj, sił, niervaŭ, ale jano taho varta. Ciapier my piać hadoŭ možam žyć spakojna, nie pieražyvajučy za toje, što treba ŭnosić arendnyja płaciažy. Kvatera — jak novaja. Z tym ramontam i dyzajnam, jaki nam padabajecca, sa śviežymi kamunikacyjami, jakija nie padviaduć.

— A za toje, što pazbavilisia miesca ŭ čarzie majučych patrebu, nie pieražyvajecie?

— Nie. My cudoŭna razumiejem, što budavacca pa dziaržrascenkach nas nie pakličuć ni ŭ bližejšy čas, ni navat praź piać-dziesiać hadoŭ. Padatkovy vylik? Doleŭku pa ciapierašnich rascenkach my b nie paciahnuli. Arendnaja kvatera — lepšy dla nas varyjant.

A ciapier ličym. Arendnaja płata za dvuchpakajovuju kvateru składaje 450 rubloŭ u miesiac. Zhodnyja, nie kapiejki. Ale pryvatnik zdavaŭ by hetuju ž dvuchpakajoŭku za $500. To bok 35 000 rubloŭ, vydatkavanych na ramont, chapiła b roŭna na dva hady žyćcia ŭ pryvatnika (kali b jon nie nadumaŭ padniać apłatu).

Pry hetym 28 000 rubloŭ, jakija ŭličyli ŭ vykankamie, dajuć siamji prava žyć u kvatery cełych piać hadoŭ. Tak, kožny hod bazavaja budzie krychu raści i, adpaviedna, termin umoŭna biaspłatnaha pražyvańnia budzie skaračacca. Ale nie radykalna. Da taho ž damova ź siamjoj padpisana na piać hadoŭ i biez prablem prałanhujecca dalej, čaho pryvatnik nijak nie moža harantavać. Tak što nieŭličanyja 7000 rubloŭ śpišam na stabilnaść.

Pavialičyć

— U lubym vypadku atrymlivajecca vyhadna. Navat kali my ŭ niejki momant vyrašym viarnucca ŭ svoj horad, kvatera zastaniecca dzieciam, — zaklučaje Alena.

• 0
• 0
• 0
• 0
• 0
• 0
• 0
• 0