"Kudy jon dzieniecca z padvodnaj łodki?"
Randevu ŭ Sočy — najbolej zručny varyjant dla prasoŭvańnia niejkich latentnych planaŭ. Piša ŭ svaim błohu Alaksandar Kłaskoŭski.
"Vutka" akazałasia nie zusim "vutkaj". Paru dzion tamu presavyja słužby Pucina dy Łukašenki nia spraŭdzili infarmacyju "Niezavisimoj haziety" pra chutki vizyt biełaruskaha kiraŭnika ŭ Rasieju. Ale siońnia pra mahčymaść sustrečy dvuch prezydentaŭ najbližejšym časam — chiba što nie ŭ Maskvie, a ŭ Sočy — zajaviŭ ambasadar Surykaŭ.
Randevu ŭ Sočy — varyjant najbolej zručny dla prasoŭvańnia niejkich latentnych planaŭ. Nu sustrelisia vypadkova la trasy słałamu, abmianialisia mierkavańniami pra nadvorje dy łyžnuju maź :) Niefarmalny statut sustrečy nie abaviazvaje ni da jakich presavych kanferencyjaŭ i h.d. I nijaki Kaleśnikaŭ z "Kommiersanta" nia budzie cikavać za mimikaj dy intanacyjami.
Karaciej, kali sustreča ŭ Sočy adbudziecca, to infarmacyi publika atrymaje, chutčej za ŭsio, ź vierabjovu dziubu. Što tolki padahreje versyi nakont patajemnych damoŭlenaściaŭ, dasiahnutych padčas śniežańskaha vizytu Pucina ŭ Miensk. Dyjapazon hipotezaŭ na hety kont, jak viadoma, šyroki — ad spryjalnych umoŭ ekspansii rasiejskaha kapitału da abjadnalnaha referendumu. Pakazalna, što plebiscyt pradrakaje zaraz i maskoŭski palitolah Suzdalcaŭ, jaki raniej staviŭsia da mahčymaści takoha scenaru skieptyčna.
Zrešty, nia varta dumać, što Łukašenka palacić u Sočy biaz kozyraŭ. U śviatle imaviernaha vizytu bolej zrazumiełym stanovicca sens učorašniaj sustrečy biełaruskaha aficyjnaha kiraŭnika ź niamieckim ambasadaram. Praciahvajecca palityčnaja hulnia na dva kirunki z raźlikam na rasiejski idefiks: kryj boža, kab apošni chaŭruśnik syšoŭ na Zachad! Heta ž nataŭskija ordy pad Smalenskam stajać buduć i h.d. :)
Razam z tym, mahčymaści takoj hulni nia varta pierabolšvać. Vyhladaje na toje, što ŭ Kramli ŭsio bolej racyjanalna aceńvajuć maneŭry biełaruskaha kiraŭnictva. Śpiašacca kramloŭskim niama kudy. La dziaržaŭnaha styrna paśla sakavickich vybaraŭ zastajecca taja ž picierskaja kamanda. Dla biełaruskaj ža ŭłady vykanać 12 patrabavańniaŭ Eŭraźviazu aznačaje padpisać sabie prysud u rasterminoŭku.
Tamu ŭ Maskvie navažylisia daciskać upartaha partnera metadyčna: maŭlaŭ, kudy jon dzieniecca z padvodnaj łodki?
Pobač z Łukašenkam na chakiei źjaviłasia novaja pryhažunia10
Kamientary