Maci Žaleźničenki padała ŭ sud na vajenkamat

Maci paŭtorna adličanaha z universytetu i terminova pryzvanaha ŭ vojska vydatnika i hramadzkaha aktyvista Z. Žaleźničenki choča sudzicca z vajenkamatam.

«Pryzyŭnaja kamisija była 8 studzienia. My pra heta ničoha nia viedali, nichto nie paviedamiŭ. Pozva synu pryjšła 15 studzienia. Ale pakolki 16 studzienia sud admianiŭ zahad rektara na adličeńnie syna z vučoby, to na toj momant nichto nie pazbaŭlaŭ jaho adterminoŭki. Da 22 studzienia, kali jaho adličyli druhi raz, jon byŭ studentam. Jamu za heta vypłačana stypendyja. Heta značyć, što rašeńnie pryzyŭnoj kamisii ad 8 čysła nia moža mieć anijakaj zakonnaj siły. My padavali skarhu ŭ Ministerstva abarony, ale atrymali adkaz, što «Ministerstva abarony pryzyvam junakoŭ na słužbu nie zajmajecca», a rašeńnie pryzyŭnoj kamisii moža być abskardžanaje ŭ sudzie», — havoryć Ała Žaleźničenka.

Spadarynia Žaleźničenka pierakananaja, što pryzyŭnaja kamisija ŭ dačynieńni da jaje syna parušyła patrabavańnie dziejnaha zakonu pra vajskovuju słužbu. U Źmitra surjoznyja zachvorvańni, pieradusim — prykmiety hipertanii. Jon i siońnia zastajecca ŭ medyčnaj častcy čyhunačnych vojskaŭ u Žłobinie. Da hetaha Źmitra nakiravali ŭ špital Ministerstva abarony ŭ Miensku.

«Jość sumiesnaja pastanova Ministerstva abarony j Ministerstva achovy zdaroŭja, što pry ŭpieršyniu vyjaŭlenaj hipertanii dajecca adterminoŭka na paŭhoda. U jaho jakraz paśla druhoha adličeńnia cisk byŭ padvyšany. Jość dakument urača. Hetaha taksama nichto nie razhladaŭ», — kaža Ała Žaleźničenka.

Pavodle źviestak słužboŭcaŭ, apošnim časam Homielski vajenkamat pryzyvaje na słužbu ź piaci tysiačaŭ chłapcoŭ prykładna pałovu. Astatnim dajecca adterminoŭka — kamu na papraŭku zdaroŭja, a kamu na vučobu. Biełaruskamu vojsku prosta nie patrebnaja 5‑tysiačnaja hramada homielskich pryzyŭnikoŭ.

Źmitru Žaleźničenku nie dali ni padlačycca, ni abskardzić paŭtornaje adličeńnie z universytetu.

Na 8 lutaha ŭ sudzie Savieckaha rajonu Homiela pryznačanyja kansultacyi zajaŭnicy Ały Žaleźničenki z sudździoj i pradstaŭnikami adkaźnika.

Źmicier Žaleźničenka — 20‑hadovy moładzievy aktyvist Partyi BNF. Uvosień 2007 hodu student‑vydatnik matematyčnaha fakultetu Homielskaha dziaržaŭnaha ŭniversytetu byŭ adličany z vučoby. Paśla čatyroch miesiacaŭ raźbiralnictvaŭ, 16 studzienia 2008 hodu Źmicier byŭ adnoŭleny ŭ VNU. Ale praz tydzień, 23 studzienia, jaho adličyli paŭtorna. 25 studzienia Źmiciera Žaleźničenku zabrali ŭ vojska i nakiravali ŭ Žłobin u vajskovuju častku čyhunačnych vojskaŭ.

Raniej na pryzyŭnoj kamisii Žaleźničenka zajaviŭ, što žadaje słužyć u vajskovaj častcy, dzie zahady addajucca pa‑biełarusku. Jon nakiravaŭ zajavu ŭ Kastytucyjny sud z prośbaj razhledziać na adpaviednaść Kanstytucyi pałažeńni Zakonu «Ab ahulnaj vajskovaj pavinnaści i vajskovaj słužbie», zhodna ź jakimi ŭ sałdataŭ terminovaj słužby niama prava karystacca pa ŭłasnym vybary dziaržaŭnaj (biełaruskaj) movaj.

Radyjo Svaboda

• 0
• 0
• 0
• 0
• 0
• 0
• 0
• 0