Cypras u raptoŭnaj načnoj pramovie vystaviŭ patrabavańni kredytoraŭ na refierendum
Plebiscyt 5 lipienia moža stać dla Hrecyi tym ža, čym dla Biełarusi byŭ refierendum 1995 hoda.
Premjer-ministr Hrecyi Aleksis Cypras abviaściŭ u piatnicu ŭviečary refierendum adnosna prapanoŭ mižnarodnych kredytoraŭ. Pra heta jon zajaviŭ u televizijnym zvarocie unačy ź piatnicy na subotu, pieradaje Bloomberg.
Pa słovach Cyprasa, hetyja patrabavańni źnievažajuć hrecki narod, jaki pavinien «dać svoj demakratyčny adkaz».
Hałasavańnie adbudziecca amal imhnienna, 5 lipienia.
Jak adznačyŭ Cypras, kanclerka Niamieččyny Anhieła Mierkiel i kiraŭnik Jeŭrapiejskaha Centrabanka Maryjo Drahi znajomyja ź jaho płanam pravieści refierendum.
Cypras taksama abviaściŭ, što jon budzie prasić ab padaŭžeńni najaŭnaj prahramy dapamohi, jakaja zaviaršajecca 30 červienia, na niekalki dzion z tym, kab pravieści hałasavańnie.
Raniej ŚMI paviedamili, što mižnarodnyja kredytory hatovyja dapamahčy Hrecyi pahasić daŭhi, praciahnuŭšy prahramu dapamohi jašče na 5 miesiacaŭ — pry ŭmovie, što Hrecyja budzie praciahvać prahramu strohaj ekanomii.
Adnak hrečaski ŭrad choča atrymać hrošy biez radykalnaha skaračeńnia vydatkaŭ.
Apošnija sustrečy ministraŭ finansaŭ jeŭrazony i kiraŭnikoŭ krain ES z kiraŭnictvam Hrecyi nie dali jasnaha vyniku.
Rašeńnie Cyprasa było niečakanym. U vypadku hałasavańnia hrekaŭ suprać praciahu prahramy dapamohi plebiscyt 5 lipienia moža stać tym, čym dla Biełarusi byŭ refierendum maja 1995 hoda. Jon moža stać adpraŭnym punktam dla vychadu Hrecyi ź jeŭrazony, a moža być, navat i Jeŭrasajuza, i vyznačyć kurs raźvićcia krainy na niekalki dziesiacihodździaŭ.
Ciapier čytajuć
Minčuk zabiŭ maci i cieścia, a paśla 15 hadoŭ atrymlivaŭ za ich piensiju1
Kamientary