Bundeśvier pačaŭ atrymlivać najnoŭšyja BMP Puma
Niamieckaja armija atrymała pieršyja 7 sieryjnych bajavych mašyn piachoty Puma na hetym tydni, paviedamiŭ sajt adnaho z raspracoŭščykaŭ BMP kampanii Rheinmetall Defence.
Raniej čakałasia, što novyja BMP patrapiać da niamieckich žaŭnieraŭ na hod raniej, adnak Ministerstva abarony FRH pa vynikach vyprabavańniaŭ u 2013 hodzie zapatrabavała dapracovak u kanstrukcyi i dadatkovych vyprabavańniaŭ.
Tolki 13 krasavika 2015 hoda inśpiektar suchaputnych vojsk FRH padpisaŭ zahad pra pryniaćcie BMP Puma na ŭzbrajeńnie, a 17 krasavika mašyna atrymała siertyfikat Ministerstva abarony.
Ciapier FRH płanuje zakupić 350 novych BMP da 2020 hoda – razam z koštam raspracoŭki mašyn kantrakt kaštuje kala 4,3 młrd jeŭra. BMP uzbrojenaja 30-mm aŭtamatyčnaj puškaj MK30-2/ABM, kulamiotam i supraćtankavym rakietnym kompleksam, maje maksimalnuju chutkaść u 70km/h – to bok moža ruchacca na adnoj chutkaści z tankami Leopard 2. Puma maje modulnuju kampazitnuju braniu, jakaja abaraniaje ad padkalibiernych snaradaŭ 45mm z łabavoj prajekcyi, 30mm snaradaŭ z bartoŭ i 14,5m kul z karmy. Naładavanaja elektronikaj i mocnaj optykaj BMP, ekipaž jakoj składajecca z 3 čałaviek, a desant – 6 čałaviek, taksama abaronienaja ad min i impravizavanych padryŭnych pryład. U vyniku vaha mašyny z maksimalnaj zahruzkaj dasiahaje 43 ton.
Kamientary