Kiraŭnik Jeŭrakamisii Žan-Kłod Junkier zrabiŭ Hrecyi apošniuju prapanovu ŭ suviazi z zaviaršeńniem siońnia terminu dziejańnia druhoj kredytnaj prahramy mižnarodnych kredytoraŭ, adnak hrečaski premjer Aleksis Cypras jaje nie pryniaŭ. Pra heta paviedamili ŭradavyja krynicy.
Pavodle infarmacyi z Pałaca Maksima (rezidencyi premjer-ministra Hrecyi), Junkier nakiravaŭ pasłańnie Cyprasu, prapanavaŭšy jamu pryniać apošniaju prapanovu instytutaŭ (ES, Jeŭrapiejski centralny bank (JECB) i Mižnarodny valutny fond) z palapšeńniem u vyhladzie pamienšanaha PDV na pasłuhi hrečaskich haścinic (13% zamiest 23%), a taksama zhody na zachavańnie dapamohi pa sacyjalnaj salidarnaści, jakaja vypłačvajecca asobnym katehoryjam małazabiaśpiečanych piensijanieraŭ z 65-hadovaha ŭzrostu i jakuju kredytory chacieli skasavać, pryvodzić słovy krynic hazieta «Imierysia».
Junkier taksama prapanavaŭ zhadać u pahadnieńni, što abiacańnie, dadzienaje Hrecyi Jeŭrahrupaj u 2012 hodzie razhledzieć mahčymaść restrukturyzacyi dziaržaŭnaha doŭhu krainy za košt padaŭžeńnia terminaŭ jaho pahašeńnia i źnižeńnia pracentnych stavak, budzie realizavana ŭ listapadzie hetaha hoda, adznačaje vydańnie.
Umovaj dla pryniaćcia prapanovy pavinny być list Cyprasa Junkieru, staršyni Jeŭrahrupy Jerunu Dejsiełbłumu, kancleru Hiermanii Anhiele Mierkiel i prezidentu Francyi Fransua Ałandu, jaki pavinien być atrymany svoječasova dla taho, kab arhanizavać 30 červienia ekstrannaje pasiadžeńnie Jeŭrahrupy da zakančeńnia terminu dziejańnia kredytnaj prahramy.
«Zhodna z pasłańniem Junkiera, na hetym pasiadžeńni Jeŭrahrupy možna było b uchvalić pahadnieńnie, kali, viadoma, jaho prymie hrečaski ŭrad, — piša hazieta. — Meta zaklučajecca ŭ tym, kab kirujučaja partyja SIRYZA skazała «tak» prapanovam kredytoraŭ na refierendumie ŭ niadzielu 5 lipienia.
Adnak ułady Hrecyi ŭžo adkinuli apošniuju prapanovu Junkiera, adznačyli krynicy.
«Urad Hrecyi idzie na refierendum, ź cikavaściu prysłuchoŭvajecca da taho, što kažuć i pišuć, pracuje nad rašeńniem. Aleksis Cypras u niadzielu prahałasuje suprać prapanoŭ kredytoraŭ», — skazali jany.
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA14
Kamientary