Razhon mitynhu ŭ Jerevanie pieraros u bai

Unačy armianskaja palicyja razahnała biesterminovy mitynh apazycyi, što prachodziŭ na płoščy Svabody ŭ centry stalicy. Jana vybrała dla hetaha načny čas, kali ŭ namiotach zastavałasia ŭsiaho niekalki tysiačaŭ čałaviek. Lidera apazycyi Lavona Ter-Pietrasiana palicyjanty siłaj dastavili ŭ jahonuju rezydencyju.

Viadoma taksama, što ŭładami čynilisia pieraškody žurnalistam, fota i videamateryjały źniščalisia. Ciapier uvieś centar Jerevanu ačepleny vojskami, palicyja likviduje namioty.

Ter-Pietrasian zaklikaŭ svaich prychilnikaŭ sabracca na mitynh iznoŭ a 15.00 miascovaha času (13.00 biełaruskaha). Adnak mitynh stychijna adnaviŭsia na inšym miescy, na praspekcie pierad budynkam francuskaha pasolstva, ad samaha rańnia. Na 11.00 u im udzielničali niekalki dziasiatkaŭ tysiačaŭ čałaviek. Da viečara mitynhoŭcy ŭźviali čatyry barykady.

Pad viečar stała viadoma, što prezydent Kačaran uvioŭ u stalicy nadzvyčajnaje stanovišča terminam na 20 dzion.

Paśla nadychodu nočy sutyčki pieraraśli ŭ pierastrełku, u vyniku jakoj zahinuli 8 i paranienyja 133 asoby. Nieviadomyja ludzi adkryvali biesparadačny ahoń, hrupy ludziej padpalvali budynki i aŭtamabili. Ułady abvinavačvajuć u hetym apazycyju, apazycyja ličyć, što hetak pad pokryvam ciemry dziejničali ahienty ŭładnaje hrupoŭki.

Mitynh spyniŭsia tolki paśla zakliku Lavona Ter-Pietrasiana ačyścić vulicy na čas dziejańnia nadzvyčajnaha stanovišča. Były prezydent, źmieščany ŭčora pad chatni aryšt, vystupiŭ z hetym zaklikam a 3.30 ranku. Da samaha hetaha času centar horadu zastavaŭsia ŭ rukach prykładna 30 tysiačaŭ manifestantaŭ, mnohija ź jakich byli ŭzbrojenyja.

U Armienii ŭzbrajeńnie majuć šmatlikija hramadzianie, lehalna dziejničajuć roznyja vajenizavanyja struktury. Kraina znachodzicca faktyčna ŭ stanie vajny z susiednim Azerbajdžanam za nasieleny armianami horny rajon Karabach (Arcach).

U štabie Lavona Ter-Pietrasiana paviedamili, što palicyja zablakavała budynak infarmacyjnaha ahienctva A1+ i rezydencyju Ter-Pietrasiana.

Mitynh apazycyi doŭžyŭsia 10 sutak. Jahonyja ŭdzielniki patrabavali pryznačeńnia novaha hałasavańnia j pradastaŭleńnia teleeteru. Niahledziačy na sparadyčnyja zatrymańni, uvieś minuły tydzień u centry Jerevanu manifestavali štodzionna ad 20 da 50 tysiačaŭ prychilnikaŭ apazycyi.

Ter-Pietrasianu ŭdałosia źjadnać 20 raznamasnych apazycyjnych hrupovak i ździejśnić cudoŭnaje viartańnie ŭ palityku. Pavodle aficyjnych źviestak, na prezydenckich vybarach u Armienii pieramoh premjer‑ministar krainy Sierž Sarkisian, pierajemnik Kačarana. Apazycyja i jaje lider, pieršy prezydent krainy Lavon Ter-Pietrasian, vinavaciać ułady ŭ masavych falsyfikacyjach.

Choć mnohija armianskija hramadzkija dziejačy padzialajuć Ter-Pietrasianavy acenki sytuacyi, niamnohija miarkujuć, što były prezydent — asoba, adpaviednaja dla taho kab palepšyć stan demakratyi ŭ krainie. Budučy prezydentam, Ter-Pietrasian karystaŭsia tymi ž metadami, što i Kačaran ciapier.

«Revalucyja adbyvajecca tady, kali jość pryncypovaja asoba z-pa-za systemy, jakaja choča systemu źmianić, — kaža Avetyk Iškanian, staršynia Chelsynskaha Kamitetu Armienii. — Ale hetaja apazycyja sama stvaryła hetuju systemu. Jany aboje raboje».

• 0
• 0
• 0
• 0
• 0
• 0