U Jeŭraparłamiencie havorać pra źniaćcie sankcyj ź Biełarusi ŭ abmien na dalejšyja sastupki z boku Minska

U kamitecie pa zamiežnych spravach Eŭraparlamentu adbylisia słuchańni pa Biełarusi. U ich uziali ŭdzieł Dyrektar adździełu Eŭrapiejskaha partnerstva Eŭrapiejskaj słužby źniešniaj palityki Hunar Vihand i admysłovy dakładčyk AAN Mikłaš Charaści. Na słuchańniach vystupiŭ namieśnik staršyni pravaabarončaha centru «Viasna» Valancin Stefanovič.

Dyrektar adździełu Eŭrapiejskaha partnerstva Eŭrapiejskaj słužby źniešniaj palityki Hunar Vihand, adznačyŭ, što chacia samaje hałoŭnaje patrabavańnie EZ — vyzvaleńnie palityčnych viaźniaŭ — było vykananaje — heta nie aznačaje, «što ciažki stan z pravami čałavieka i demakratyjaj u Biełarusi źmianiŭsia za adnu noč». Nijakich systemnych źmienaŭ u hetym nakirunku ŭ krainie nie adbyłosia, padkreśliŭ Hunar Vihand i nahadaŭ, što «hramadzianskija i palityčnyja pravy byłych palityčnych źniavolenych nie adnoŭlenyja, a ich vyzvaleńnie było zroblenaje takim čynam, kab nie dapuścić ich udziełu ŭ sioletnich prezydenckich vybarach». 

Tym nia mienš, isnavańnie palityčnych źniavolenych było adnoj z hałoŭnych pryčynaŭ, z-za jakich byli ŭviedzienyja sankcyi ŭ dačynieńni da Biełarusi, nahadaŭ Hunar Vihand.

«Dakładny adkaz Eŭraźviazu na vyzvaleńnie palitviaźniaŭ da hetaha času abmiarkoŭvajecca ŭ Eŭrapiejskaj Radzie (rada ministraŭ zamiežnych spravaŭ krainaŭ-čalcoŭ — RS), ale peŭna, što reakcyja na hety važny krok budzie ŭ bližejšy čas. Upieršyniu z kanca 2010 hodu možna sabie ŭjavić bolš kanstruktyŭnyja adnosiny pamiž EZ i Biełaruśsiu. Nie chaciełasia b, kab nas krytykavali za toje, što my nie skarystalisia hetym vaknom mahčymaściaŭ», — padkreśliŭ eŭrapiejski palityk.

Akramia hetaha, dyrektar adździełu Eŭrapiejskaha partnerstva Eŭrapiejskaj słužby źniešniaj palityki jašče raz spyniŭsia na tym, što Biełaruś zastajecca, adzinaj krainaj u Eŭropie, jakaja da hetaha času ŭžyvaje śmiarotnaje pakarańnie. 

Admysłovy dakładčyk AAN Mikłaš Charaści, zaklikaŭ nia ciešycca iluzijami z nahody nibyta adnosnaj liberalizacyi ŭ Biełarusi.

«Hetuju mylnuju operu my bačyli šmat razoŭ — vyzvaleńnie palitviaźniaŭ pierad vybarami. Tamu ja b raiŭ pačakać z bujnym krokam nasustrač Miensku, prynamsi, da vybaraŭ, na jakich Alaksandar Łukašenka stanie ŭłasnym pierajemnikam.

My viedajem vyniki hetych vybaraŭ — viedajem z pryčyny niaźmiennych zakonaŭ, niaźmiennaha stanovišča z pravami čałavieka, ŭ pryvatnaści, niaźmiennaha stanovišča z vybarčymi pravami. Takija vybary pa aznačeńni nia mohuć być svabodnymi i spraviadlivymi. I jany nikoli nie byli svabodnymi i spraviadlivymi z taho času, jak prezydent Łukašenka pryjšoŭ da ŭłady», — padkreśliŭ Admysłovy dakładčyk AAN pa Biełarusi.

«Vy možacie skasavać niekatoryja sankcyi, kali systema dazvołaŭ krychu palepšyłasia, kali dała hramadzianskaj supolnaści kropielku mahčymaściaŭ być svabodnaj. Ale ŭ minułym śniežni ŭ Biełarusi byŭ pryniaty zakon, jaki pastaviŭ uvieś internet pad kantrol dziaržavy, navat kali razmova idzie pra asobny veb-sajt i navat asobny kamentar. Heta było zroblena, kali palitviaźni čakali ŭ turmie vyzvaleńnia pierad prezydenckimi vybarami, što vidavočna było zroblena taksama z vybarčymi metami», — nahadaŭ jon. 

«Majo mierkavańnie — krok nasustrač Miensku budzie hieapalityčna važnym z dyplamatyčnaha punktu hledžańnia. Ale z punktu hledžańnia abarony pravoŭ čałavieka, ja liču, taki krok musić rabicca ŭ spałučeńni ź jašče bolšymi sastupkami z boku biełaruskich uładaŭ. Prynamsi, abiacańnia takich sastupak. U hetym vypadku abiacańni skasavańnia sankcyj mohuć dapaŭniać hetyja abiacańni Miensku», — dadaŭ Mikłaš Charaści.

• 0
• 0
• 0
• 0
• 0
• 0
• 0
• 0