Syrski: Ja i nie viedaŭ, što ŭ nas ź Fiodaravym kanflikt, ale prašu prabačeńnia

«Dla mianie było niečakanaściu daviedacca, što ŭ nas sa spadarom ministram byŭ kanflikt. Ja ŭsprymaŭ našy stasunki jak prycoŭnyja: sa składanymi pytańniami, z roznymi pazicyjami. Tak i pavinna być pamiž dźviuma instytucyjami padčas vialikaj vajny», — adznačyŭ hienierał.

Razam z tym Syrski paprasiŭ prabačeńnia ŭ eks-kiraŭnika Minabarony.

«Kali ja kahości čymści pakryŭdziŭ: Michaił Albiertavič, prabačcie. Byvaju žorstkim. Ale prašu i vas, i ŭsich, chto zaraz z zachapleńniem sočyć za hetaj historyjaj: davajcie fakusavacca nie na asabistym, a na hłabalnym. Na pieramozie», — skazaŭ hałoŭnakamandujučy USU.

Pavodle jaho słoŭ, jość dumka, važniejšaja za lubyja proźviščy: «Ukraina bolšaja za Fiodarava, Syrskaha i luboha z nas».

Syrski kaža, što Ukraina vystaić nie tamu, što ŭ joj jość niezamiennyja ludzi, a tamu, što ŭ joj jość armija, instytucyi i miljony ludziej, jakija robiać svaju pracu. Jon padkreśliŭ, što źvieści hetuju vajnu da supraćstajańnia dźviuch pierson — «najbolšaja pasłuha, jakuju my možam zrabić vorahu».

Pavodle słoŭ hienierała, heta tyčycca nie tolki jaho ź Fiodaravym.

«Ja baču, jak ludzi dzielacca na «łahier Fiodarava» i «łahier Syrskaha». Jak tolki pytańnie, źviazanaje z vajnoj ci vojskam, palityzujecca, jano spraščajecca da łozunha. A kožnaje z pytańniaŭ, pra jakija zaraz sprečajucca ŭ sietcy, — kantrakty, zakupki, mabilizacyja — značna składaniejšaje za luby post pra jaho. Łozunhami nie prymajucca rašeńni, ad jakich zaležać žyćci ludziej», — zajaviŭ Alaksandr Syrski.

Z 16 lipienia ŭ Kijevie i inšych haradach Ukrainy prachodziać akcyi pratestu. Ich udzielniki patrabujuć viarnuć Michaiła Fiodarava na pasadu ministra abarony, a taksama adpravić u adstaŭku hałoŭnakamandujučaha Uzbrojenych sił Ukrainy Alaksandra Syrskaha.

Padčas bryfinhu 16 lipienia Fiodaraŭ zajaviŭ, što Ukrainie nieabchodna pamianiać hałoŭnakamandujučaha USU, kab bolš efiektyŭna supraćstajać praciŭniku. Jon taksama paćvierdziŭ, što pamiž im i Syrskim isnavali surjoznyja supiarečnaści. Pavodle słoŭ Fiodarava, hałoŭnakamandujučy nie padtrymlivaŭ jaho inicyjatyvy i nie chacieŭ abmiarkoŭvać prablemnyja pytańni.

U toj ža dzień prezident Ukrainy Uładzimir Zialenski paviedamiŭ, što ŭ novym uradzie, jaki ŭznačaliŭ Siarhiej Karecki, abaviazki ministra abarony budzie vykonvać Jaŭhien Chmara, jaki raniej kiravaŭ Centram śpiecyjalnych apieracyj «Alfa» Słužby biaśpieki Ukrainy.

Pavodle infarmacyi vydańnia Financial Times, na fonie pratestaŭ Zialenski razhladaje mahčymaść adstaŭki Syrskaha.

18 lipienia prezident Ukrainy paviedamiŭ, što pravioŭ praciahłuju razmovu ź Michaiłam Fiodaravym, a taksama asobna sustreŭsia z Alaksandram Syrskim. Akramia taho, u pieryjad z 17 da 20 lipienia Zialenski pravioŭ šerah sustreč z kamandzirami vajskovych karpusoŭ i inšymi vysokapastaŭlenymi pradstaŭnikami ŭkrainskaha vojska.

• 6
• 1
• 1
• 4
• 0
• 0
• 0
• 0