Dziela finału čempijanatu śvietu minskaje mietro pracavała da 1:00. A matč skončyŭsia paźniej

Pahladzieć tranślacyju finalnaha matča na stadyjonie «Dynama» sabrałasia bolš za 20 tysiač hledačoŭ. Kali b pieramožca vyznačyŭsia ŭ asnoŭny čas, zaŭziatary paśpieli b raźjechacca na mietro, pracu jakoha praciahnuli da 01:00. Ale matč zaciahnuŭsia, i mietro začyniłasia. Ludziam daviałosia sychodzić pieššu, piša Onliner.by.

Zdavałasia b, taksisty mahli dobra zarabić, ale mašyn prosta nie chapiła — popyt u razy pieravyšaŭ prapanovu.

Voś jak pra heta pisali ŭdzielniki padziej u sacyjalnych sietkach.

«Było vidavočna, što da 01:00 matč nie skončycca [skončyŭsia ŭ 01:02 — NN], tamu da apošniaha spadziavałasia, što mietro praciahnie pracu. Ale nie — prosta pasiadzieli daŭžej i zakrylisia, nie dačakaŭšysia tych, dziela kaho nibyta praciahvali hrafik. A pra taksi i kazać niama čaho».

«Pieršyja chvilin 40 išła pieššu, potym daviałosia spampavać prahramu kikšerynhu i vučycca jeździć na samakatach».

«Ja pryjechała na rovary, i heta było najlepšaje rašeńnie. Kali padychodzili da kvartała, dzie žyvuć dziaŭčaty z našaj kampanii, prahrama taksi pakazvała čarhu ŭ 70 čałaviek. Potym ja jechała pa vulicy Prytyckaha da Kamiennaj Horki na rovary — usiudy byli samakaty, a šmat kampanij prosta išli pieššu».

Pišuć, što ŭ pik čarha na taksi dasiahała 462 zakazaŭ. Pavyšany popyt zachoŭvaŭsia jašče niekalki hadzin, i niekatoryja viarnulisia dadomu tolki pad ranicu.

Byli i tyja, chto vyrašyŭ nie ryzykavać. Jany dabralisia lahčej, ale nie ŭbačyli pieramožnaha hoła ŭ pramym efiry.

«Mietro praciahnuli da hadziny nočy, ale było vidavočna, što kali zastaniešsia da kanca dadatkovaha času, užo nie paśpieješ. Tamu paśla asnoŭnaha času my pajšli da mietro i pajechali dadomu. Darečy, tak zrabili mnohija. Dabracca atrymałasia chutka i biez prablem».

«Nam chaciełasia dahledzieć matč»

Čytač Andrej raspavioŭ, jak razam z 15‑hadovym synam viartaŭsia dadomu.

— My pajechali na stadyjon da druhoha tajma na mietro, bo vakoł «Dynama» byli pierakryćci i zatory, i pakinuć mašynu było b prablematyčna. Kali pačaŭsia dadatkovy čas, mnohija stali pakidać trybuny. Pakolki siarod ich było šmat moładzi, my pamyłkova padumali, što jany prosta pajechali dadomu, bo abiacali baćkam. Akazałasia, jany prosta raźličyli čas, kab paśpieć na mietro. Ale nam vielmi chaciełasia dahledzieć matč i adčuć emocyi ad vyrašalnaha hoła. U vyniku Fieran Tores zabiŭ, i reakcyja bolš jak 22 tysiač čałaviek na «Dynama», upeŭnieny, pierakryje ŭ pamiaci ŭsie niazručnaści paśla matča.

Pavialičyć

— My vyjšli sa stadyjona krychu raniej za asnoŭny natoŭp, ale placoŭka pierad «Dynama» ŭžo była zapoŭnienaja ludźmi, jakija čakali taksi. U prahramie — bolš za sotniu zamovaŭ u čarzie. Razam ź inšymi pajšli pieššu da stancyi mietro «Kupałaŭskaja», ale tam nas sustreli tolki dvoje milicyjanieraŭ sa słovami: «Užo zakryta». Vyśvietliłasia, što mietro pracavała stroha da 01:00, a nie da faktyčnaha zakančeńnia matča. Jašče była nadzieja na elektrasamakaty. Žurnalisty pasprabavali znajści ich, ale ŭsie, što traplalisia (adskanavali 5—7 QR-kodaŭ), byli niedastupnyja dla arendy. Daviałosia iści pieššu.

Pa darozie sustrakali ludziej na prypynkach — zdavałasia, ich było nie mienš, čym zvyčajnym viečaram. Tolki byŭ užo pałova druhoj nočy. Čaho jany čakali — niezrazumieła: mahčyma, taksi, a moža, prosta adpačyvali.

U cełym vymušany piešy marš atrymaŭsia navat pryjemnym: vakoł nieznajomyja kampanii abmiarkoŭvali futboł (bolšaść, jak i my, zaŭzieła za Ispaniju), adkryta pjanych ludziej nie sustrakałasia, a nastroj byŭ uźniosły. U vyniku — kala 4 kiłamietraŭ pieššu i prykładna 6 tysiač krokaŭ — niadrennaje zaviaršeńnie spartyŭnaha viečara.

«Zahadzia damovilisia: kali nie paśpiejuć — pajeduć na taksi»

Hanna na «Dynama» nie chadziła, ale tudy pajšoŭ jaje 18‑hadovy syn ź siabrami.

— My zahadzia ŭsio abmierkavali: mietro pracuje da 01:00, kali nie paśpiejuć — pajeduć na taksi, — raskazvaje jana. — Kali stała zrazumieła, što hulnia praciahniecca daŭžej, vybaru nie było — zastalisia dahladzieć finał. Ale paśla zakančeńnia matča vyklikać taksi akazałasia praktyčna niemahčyma: u čarzie jany byli ŭžo ŭ druhoj sotni, popyt byŭ vielmi vialiki, a košt pajezdki da Kamiennaj Horki pavialičyŭsia prykładna ŭdvaja.

U vyniku chłopcy pajšli pieššu da Niamihi. Pavodle ich słoŭ, atmaśfiera na vulicach była vielmi dobrazyčlivaj i biaśpiečnaj. Adtul im užo ŭdałosia vyklikać taksi pa canie, krychu vyšejšaj za zvyčajnuju. Dadomu ŭsie viarnulisia kala treciaj hadziny nočy.

• 1
• 0
• 2
• 4
• 0
• 0
• 0
• 0