Nastaŭnikam z Bresta pavyšajuć zarobak. Heta vynikaje z pastanovy zahadčycy adździeła adukacyi administracyi Leninskaha rajona Bresta ad 1 vieraśnia.
Pavyšeńnie tłumačać «dadatkovaj mieraj stymulacyi pracy». I źviazvajuć jaho z dekretam kiraŭnika krainy za 1999 hod «Ab dadatkovych mierach pa ŭdaskanalvańni pracoŭnych adnosinaŭ».
Pavyšeńnie taryfnaj staŭki da 50% kraniecca usich piedahahičnych supracoŭnikaŭ, biblijatekaraŭ, namieśnikaŭ kiraŭnikoŭ ustanoŭ adukacyi i kiraŭnikoŭ vučebna-spartovych ustanoŭ.
«Prykładna na 17-20% ciapier vyrastuć zarobki ŭ nastaŭnikaŭ», — tłumačać u buchhałteryi adździeła adukacyi. Z čym źviazanaje takoje pavyšeńnie, tut nie tłumačać.
Nastaŭniki ŭ takuju udaču vierać słaba: zarobak daŭno nichto nie padymaŭ, nichto nie papiaredžvaŭ, tolki abviestku paviesili. Pakul im naličyli adpusknyja, biez pavyšeńnia.
«Dva dni tamu paviesili takuju abviestku na došcy, z hetym prykazam. My spačatku nie pavieryli, bo nijakaha schodu na hety kont ci tłumačeńniaŭ nie było. Ničoha nie kazali pa televizary i radyjo. Pakul nam dali tolki avans paśla adpačynku, tamu pa hrošach heta nie adčuli», — raskazvaje nastaŭnica z Bresta Alena.
Jaje apošni zarobak — 3,5 miljona. Nastupny, kali pavysiać, budzie ŭ pačatku kastryčnika.
Cikavimsia: ci nie pavysili zarobak nastaŭnikam u inšych rehijonach. U Viciebsku pavyšeńnia pakul nie było i nie płanujecca, zapeŭnivajuć u adździele adukacyi Viciebskaha harvykankama.
Ničoha nie viedajuć pra pavyšeńnie staličnyja nastaŭniki. Zarobak apošni raz padymali bolš za hod tamu, adrazu adkazvaje nastaŭnik ź Minska Maksim:
«Ź minułaha hoda ničoha nie pavysiłasia. Na kolki tady, užo i nie pamiataju. Paśla tolki taryfnuju staŭku tam mianiali, ale heta 50 tysiač u dadatak».
Miascovyja ŭłady mohuć pavysić zarobak samastojna, tłumačać u Minadukacyi, biez centralizavanaha rašeńnia. Heta dazvalaje dekret kiraŭnika krainy.
«Miascovyja orhany ŭłady prymajuć takija rašeńni pa ŭsioj krainie, u zaležnaści ad situacyi, u rozny čas», — kažuć u Minadukacyi.
U siarednim za žnivień nastaŭniki zarabili 5,5 miljona, paviedamlaje Biełstat, ahulny zarobak u adukacyi 4,6 miljona.
Kamientary