U siaredzinie kastryčnika biełaruskija ŭłady abnarodujuć prahramu strukturnych reformaŭ na 2016—2020 hady. Pra heta paviedamiŭ pieršy namieśnik staršyni praŭleńnia Nacyjanalnaha banka Biełarusi Taras Nadolny 25 vieraśnia na Rasijskim nacyjanalnym bankaŭskim forumie, jaki prachodzić u Minsku.
Pavodle jaho słoŭ, prahramu rychtujuć ŭrad i Nacbank. «U asnovu prahramy na nastupnuju piacihodku buduć pakładzieny strukturnyja reformy i novyja padychody, jakija tyčacca funkcyjanavańnia našych pradpryjemstvaŭ», — skazaŭ Nadolny.
Jon paviedamiŭ, što novyja padychody praduhledžvajuć skaračeńnie vydatkaŭ, pavyšeńnie efiektyŭnaści, a taksama źmianieńnie miechanizmu rehulavańnia dziejnaści pradpryjemstvaŭ.
«Havorka, u pryvatnaści, idzie ab padziele funkcyj orhanaŭ dziaržkiravańnia, jakija rehulujuć dziejnaść pradpryjemstvaŭ i adnačasova vykonvajuć funkcyi ŭłaśnika», — adznačyŭ Nadolny.
Pieršy namieśnik staršyni Nacbanka nahadaŭ, što dziaržavie ŭ Biełarusi naležyć kala 65% pradpryjemstvaŭ. Pavodle jaho słoŭ, u minułyja hady padtrymka realnaha siektara ažyćciaŭlałasia za košt stymulavańnia ŭnutranaha popytu, što sparadžała dysbałansy ŭ ekanomicy.
«Karekciroŭka ŭnutranaha popytu ažyćciaŭlałasia za košt devalvacyi. Takim čynam my sprabavali «astudzić» ekanomiku. Dla Biełarusi — heta nie vyjście, bo devalvacyja raskručvaje inflacyjnuju śpiral», — zaŭvažyŭ Nadolny.
Jon daŭ zrazumieć, što palityka abmiežavańnia hrašovaj prapanovy, jakaja pravodzicca ŭ hetym hodzie, dazvalaje nie dapuścić prablemy ŭ płaciežnym bałansie krainy.
«Biahučy rachunak płaciožnaha bałansu my čakajem na ŭzroŭni minus 2% VUP. Heta narmalnaja situacyja dla krain, jakija raźvivajucca. Heta toj uzrovień, jakim my možam pakryvać dziakujučy finansavamu rachunku. Mnohija krainy narmalna žyvuć z takim deficytam biahučaha rachunku płaciožnaha bałansu», — reziumavaŭ Taras Nadolny.
Ciapier čytajuć
U 55 hadoŭ pamior stvaralnik brendu Serge Siarhiej Atroščanka4
Kamientary