Jak stała viadoma TH, mahiloŭski hurt Zatoczka byŭ źniaty z paniadziełkavaha zbornaha kancertu ŭ mienskim klubie Step. Arhanizatary: «Kiraŭnictva klubu pastaviła nas pierad vybaram: albo kancert prachodzić biez udziełu hurta Zatoczka, albo nie prachodzić zusim».
Jak stała viadoma TH, mahiloŭski hurt Zatoczka byŭ źniaty z paniadziełkavaha zbornaha kancertu ŭ mienskim klubie Step. Arhanizatary: «Kiraŭnictva klubu pastaviła nas pierad vybaram: albo kancert prachodzić biez udziełu hurta Zatoczka, albo nie prachodzić zusim».
Vialiki zborny kancert u klubie Step maje prajści ŭ paniadziełak, u 23:00. Hurt Zatoczka byŭ zajaŭleny ŭ afišy, ale za niekalki dzion da festu im patelefanavali arhanizatary i paviedamili, što ich vystup admianiajecca, patłumačyli, što ŭ ministerstvie kultury dali admovu.
Ideja kancertu naležyć pryvatnym asobam. Arhanizatarka Nadzia tłumačyć, što jana nie zajmałasia ŭzhadnieńniem śpisu hurtoŭ i atrymańniem hastrolnaj licenzii.
«Tak, ja paviedamiła mahiloŭskim muzykam, što my vymušanyja admovicca ad ich vystupu, bo jany nie prajšli praź Minkult. Mnie heta było skazana ŭ takoj formie, ja i pieradała. Padrabiaznaściaŭ nia viedaju, bo vystupaju tolki zamoŭcam viečaryny».
Niepasrednaja vykanaŭca viečaryny taksama, jak vyjaviłasia, nijakich padrabiaznaściaŭ nia viedaje.
«Mnie tak paviedamili ŭ klubie, jany ŭzhadniali pytańnie z čynoŭnikami — kiraŭnictva pastaviła nas pierad vybaram: albo kancert prachodzić biez udziełu hurta Zatoczka, albo nie prachodzić zusim».
Adnak, art‑dyrektar kluba Step Jaŭhien Marozaŭ toje abviarhaje:
«Hastrolnaje paśviedčańnie było atrymana biez prablemaŭ na ŭsie hurty‑vystupoŭcy. Anijakich prablem nie paŭstała. Ale mnie arhanizatary paviedamili, što ŭ hurta Zatoczka niejki kancert u Rasiei i jany nie paśpiavajuć pryjechać».
Muzyki z hurta Zatoczka byli niamała ździŭlenyja telefanavańniu ad arhanizataraŭ, bo źbiralisia 17 sakavika vystupić u Miensku. Udzielnik kamandy Illa Kaścienič tak patłumačyŭ sytuacyju:
«My tak i nie zrazumieli ad kaho sychodzić zabarona na naš vystup, ale mušu skazać ad usiaho hurta: my bačym, što našamu kalamuzyčnamu i pseŭdaintelektualnamu bamondu padajecca nia nadta zručnaj našaja pazycyja i nas namahajucca prycisnuć».
Muzyka nia dumaje, što kahości moh napužać adzin z hitoŭ hurta — «Prezydent hulaje ŭ chakiej»:«Jaje možna traktavać dvaista i nia dumaju, što pryčyna tut palahaje ŭ tym, što naš hurt maje pieśni pa‑biełarusku, vystupaŭ na «Basoviščy« i hetak dalej. Miarkuju, što viadziecca pra inšaje».
Illa ličyć, što tut jość suviaź z tym, što Zatoczka — muzyčna‑spartovaja kamanda.Arhanizatar rok‑kancertaŭ Vital Supranovič miarkuje, što pryčynaj admovy ŭ hetym vypadku mahła stać aściarožnaść klubnaha kiraŭnictva:
«Apošnim časam uładalniki placovak źviartajuć asablivuju ŭvahu na prynaležnaść hurta, bo nia chočuć bačyć pankaŭ na kancertach, kab zaścierahčysia kanfliktaŭ, sutyčak, pravakacyjaŭ. Sprava ŭ tym, što kali hrajuć hurty antyfašysckaha kirunku, to mohuć pryjści i fašysty, tady kanfliktu nie paźbiehnuć».
Varta dadać, što dva hady tamu na pank‑kancercie ŭ mienskim klubie Leo adbyłasia bojka miž neanacystami i naviednikami kancertu, u vyniku jakoj čatyry čałavieki byli špitalizavanyja. Paśla hetaha kancerty ŭ zhadanym klubie bolš nie pravodzilisia.
Kamientary