Andrej Pačobut choča pryjechać u Biełaruś da źjezdu Sajuza palakaŭ.
Niadaŭna vyzvaleny ź biełaruskaj turmy žurnalist Andrej Pačobut źbirajecca viarnucca v Biełaruś da vosieni 2026 hoda. Pra heta jon raspavioŭ u efiry prahramy «Trujka» Polskaha radyjo, piša REFORM.news.
Viadučaja Ahnieška Łaskoŭska spytałasia ŭ Andreja Pačobuta, ci vyznačyŭsia jon z dataj viartańnia ŭ Biełaruś. Na što toj adkazaŭ, što vierniecca da źjezda «Sajuza palakaŭ na Biełarusi».
«Jość jašče niekalki pytańniaŭ, jakija pakul nie ŭrehulavanyja, i tolki paśla ich vyrašeńnia ja zmahu pajechać. U mianie jość peŭnyja abaviazacielstvy, tamu što dla majho vyzvaleńnia byli prykładzieny vialikija namahańni. Tamu kali treba naviedać Brusiel ci niejkaje inšaje miesca, ja, viadoma, hatovy pajechać tudy i raspavieści pra situacyju, u jakoj znachodziŭsia, i hetak dalej. Ale biezumoŭna, ja chacieŭ by, kab heta adbyłosia jak maha chutčej, kab jak maha chutčej vyrašyć usie hetyja pytańni i pajechać u Hrodna. Biez sumnievu, ja viarnusia ŭ Hrodna da źjezda Sajuza palakaŭ, jaki pavinien adbycca ŭ bližejšy čas — chutčej za ŭsio, uvosień. I da hetaha źjezda ja ŭžo pavinien być u Biełarusi. Heta taki dedłajn», — raspavioŭ Počobut.
Žurnalistka ŭdakładniła ŭ jaho, jak toj stavicca da paprokaŭ z-za jaho žadańnia viarnucca ŭ Biełaruś.
— Vy kažacie, što byli prykładzieny vialikija namahańni dla vašaha vyzvaleńnia. I, dumaju, vy ŭžo čuli arhumient, što dokazam vašaj udziačnaści za hetyja namahańni pavinna być toje, što vy zastanieciesia tut, u Polščy. Što vy adkazvajecie, kali čujecie takija słovy ci čytajecie ich u internecie? — skazała Łaskoŭska.
— Sutnaść spravy ŭ tym, što ŭmovaj majho vyjezdu była mahčymaść viartańnia ŭ Biełaruś. Kali b takoj mahčymaści nie było, ja b nie pryniaŭ hetuju prapanovu. Ja maju namier prytrymlivacca tych damoŭlenaściej, jakija byli dasiahnuty ŭ Biełarusi ŭ kantekście hetaj spravy.
Dla polskaha boku zusim nie było niečakanaściu, što ja zachaču viarnucca ŭ Biełaruś. Kali b havorka išła tolki pra moj vyjezd, heta adbyłosia b jašče ŭ 2021, 2022 ci 2023 hodzie. Sutnaść była ŭ tym, što mienavita maja admova źjazdžać pryvodziła da taho, što sprava tak zaciahvałasia.
Tolki paśla padklučeńnia amierykanskaj dypłamatyi, amierykanskich dypłamataŭ i tych pieramoŭ, jakija zaraz viaducca pamiž Vašynhtonam i Minskam, biełaruski režym pahadziŭsia na toje, kab ja moh viarnucca ŭ Biełaruś, kab ja moh zastavacca ŭ Biełarusi. Ja razumieju, što z punktu hledžańnia prapahandy im było važna abmianiać mianie na niekaha. Biełaruskamu boku było važna niejak heta razyhrać. Ale ja nie prasiŭ pamiłavańnia, nie pryznavaŭ viny, a termin majho źniavoleńnia ŭžo padychodziŭ da kanca. Mnie zastavałasia pravieści ŭ turmie krychu bolš za paŭtara hoda, — adkazaŭ jon.
Kamientary