Pavodle danych vybaračnaha abśledavańnia chatnich haspadarak pa ŭzroŭni žyćcia, kožnaja treciaja (33,6%) chatniaja haspadarka ŭ Biełarusi adznačyła, što jaje materyjalnaje stanovišča sioleta pahoršyłasia, paviedamiŭ Nacyjanalny statystyčny kamitet.
Stanoŭča acanili źmianieńni ŭ svaim materyjalnym stanoviščy ŭ paraŭnańni ź minułym hodam 10,7% chatnich haspadarak. Na stabilnaść svajho materyjalnaha stanovišča ŭkazali 55,7% chatnich haspadarak.
Siarod chatnich haspadarak, jakija adznačyli palapšeńnie svajho materyjalnaha stanovišča ŭ paraŭnańni ź minułym hodam, 35,6% źviazvajuć heta sa źjaŭleńniem novaj ci dadatkovaj krynicy pracoŭnych dachodaŭ, 26,5% — z pavyšeńniem dachodaŭ ad pracoŭnaj dziejnaści, 16,9% — sa źjaŭleńniem dachodu, nie źviazanaha z pracoŭnaj dziejnaściu (ad zdačy ŭ arendu nieruchomaści, ad prodažu sielskahaspadarčaj pradukcyi i hetak dalej), 13,6% — z pavyšeńniem piensij ci dapamoh.
Amal dla pałovy (47,7%) chatnich haspadarak, jakija ŭkazali na paharšeńnie materyjalnaha stanovišča ŭ paraŭnańni z 2014 hodam, pryčynaj niehatyŭnych źmianieńniaŭ źjaviŭsia značny rost cen. Dla 19,3% respandentaŭ paharšeńnie materyjalnaha stanovišča źviazana sa źnižeńniem dachodaŭ ad pracoŭnaj dziejnaści, dla 10,1% — ź pierachodam na mienš apłačanuju pracu, niapoŭnaj zaniataściu ci strataj pracy.
Dźvie traciny (66,4%) chatnich haspadarak respubliki acanili svajo materyjalnaje stanovišča sioleta jak siaredniaje, čverć (25,1%) chatnich haspadarak — krychu nižej za siaredniaje, 4% — krychu vyšej za siaredniaje i vysokaje. Nizkuju acenku svajmu materyjalnamu stanovišču dali 4,5% chatnich haspadarak.
«Łukašenka pieršym adčuje katastrofu Pucina» — Śviatłana Aleksijevič u vialikaj hutarcy TOK10
Kamientary