Za rehistracyju ŭ elektronnaj čarzie na miažy hrošy brać nie buduć

Navahodni nastroj biełarusaŭ, jakija lubiać jeździć za miažu na mašynie, sapsavała paviedamleńnie pra apłatu za rehistracyju ŭ elektronnaj čarzie na miažy. Maŭlaŭ, ciapier, kali chočaš vyjechać ź Biełarusi —płaci hrošy. I suma nie maleńkaja: 0.8 bazavaj z «lehkavuški» ci matacykła, ci praściej kažučy, 168 tysiač rubloŭ u zvyčajnyja dni i 1 bazavaja, ci 210 tysiač rubloŭ — u śviatočnyja. Adpaviednaja Pastanova Savieta ministraŭ nabyła moc 8 studzienia 2016 hoda.

Niaŭžo ciapier niemahčyma vyjechać za miažu biaspłatna? Na samoj spravie, tłumačyć kiraŭnik pres-słužby Pamiežnaha kamiteta Alaksandr Ciščanka, płacić za rehistracyju ŭ elektronnaj čarzie ničoha nie treba.

«Apłata budzie tolki za braniravańnie kankretnaha času zajezdu na punkt propusku. Heta, jak takaja płatnaja pasłuha. Samo pierasiačeńnie miažy i ŭjezd na punkt propusku — heta biaspłatna.

Sistema elektronnaj čarhi składajecca z dvuch elemientaŭ: płatnaja pasłuha, kali čałaviek choča harantavana viedać, što ŭ hety čas jon pierasiače miažu biez roznych čerhaŭ i druhi elemient — ahulnaja čarha, ale z rehistracyjaj. Nu, jak u banku, dla taho, kab byŭ paradak, kab nichto nie zalez biez čarhi. Jak heta było raniej, kali ŭ čarhu ŭłazili, pieraškadžali i hetak dalej. Ciapier čałaviek pryjechaŭ u zonu čakańnia, atrymaŭ svoj numar u čarzie, i spakojna čakaje», — tłumačyć schiemu pracy elektronnaj čarhi na miažy Alaksandr Ciščanka.

Takim čynam, kali vy nie śpiašajeciesia, da prykładu, ŭ aeraport i majecie čas pačakać, to płacić za rehistracyju ŭ elektronnaj čarzie vam nie treba. Ale tut uźnikajuć novyja pytańni. Pieršaje, a što, kali pałova tych, chto jedzie ŭ «vaš» dzień za miažu, vyrašyli nie ekanomić i zapłacić za kankretny čas — jany buduć jechać i jechać, a vam stoj nieviadoma kolki?

Surazmoŭca Jeŭraradyjo supakojvaje: dla takich «reziervistaŭ» na pamiežnych pierachodach budzie asobny kanał, i tamu ich ekspres-pierasiačeńnie miažy na ahulnuju čarhu ŭpłyvać nie budzie. Da taho ž, kolkaść reziervacyj času ŭ elektronnaj čarzie płanujecca abmiežavać.

«Budzie peŭnaja kolkaść miescaŭ, jakija možna takim čynam zabraniravać. Tut taksama nie da biaskoncaści. Inakš stvorym čarhu z «braniravanych».

Kolki čałaviek u dzień zmohuć za hrošy zabraniravać sabie čas pierasiačeńnia miažy, pradstaŭnik Pamiežnaha kamiteta nie viedaje. Kaža, na kožnym kankretnym pamiežnym pierachodzie budzie svoj limit — u zaležnaści ad «prapusknoj zdolnaści» hetaha punkta propusku. Ale limit budzie, i kali harantavana chočacie paśpieć na toj ža samalot — branirujcie zahadzia, raić Alaksandr Ciščanka.

Dobra, kab nie marnavać čas, vyrašajecie vy adškadavać tyja dziesiać dołaraŭ i branirujecie sabie kankretny čas u elektronnaj čarzie. Chutka prachodzicie biełaruskuju miažu i… spyniajeciesia na niavyznačany čas u čakańni na niejtralnaj pałasie pierad polskim ci litoŭskim punktam propusku. Prosta tamu, što vaša broń na, da prykładu, litoŭskich pamiežnikaŭ nie raspaŭsiudžvajecca. Pytańnie kaardynacyi pa ekspres-propusku mašyn praź miažu jašče na samoj spravie z zamiežnymi kalehami nie ŭzhodnienaje, pryznajecca Alaksandr Ciščanka.

«Zrazumieła, my budzie infarmavać i pravodzić sustrečy ŭ Pamiežnym kamitecie dla taho, kab prysutničała sinchronnaść u hetym pytańni. Ale ž roznaje zdarajecca i cejtnoty taksama byvajuć».

Supakojvaje adno: sioleta pa sistemie elektronnaj čarhi pačnuć pracavać tolki dva punkty propusku. «Brest» pavinien pierajści na novuju formu pracy da 29 lutaha, a «Novaja Rudnia» — da 31 śniežnia. Astatnim dali čas: častka musić uvieści elektronnuju čarhu da 31 śniežnia 2017 hoda, častka — da 31 śniežnia 2018 hoda. Tamu, čas na toje, kab damovicca z kalehami pra chutki propusk «braniravanych» u biełaruskich pamiežnikaŭ jość. 

• 0
• 0
• 0
• 0
• 0
• 0