Canu rasijskaha kredytu biełarusy adčujuć na svaim kašalku

U 2016—2017 hadach Biełaruś pavinna abmiežavać raschody respublikanskaha biudžetu na apłatu pracy.

Pavodle infarmacyi BiełaPAN, takija miery źjaŭlajucca ŭmovaj vydzialeńnia krainie jeŭrazijskaha kredytu, atrymańnie jakoha Minsk kančatkova ŭzhadniaje z rasijskim bokam.

Miarkujecca, što ŭ 2016 hodzie raschody biełaruskaha biudžetu na apłatu pracy vyrastuć nie bolš jak na zapłanavany ŭzrovień inflacyi (12%). Anałahičnaja ŭmova tyčycca 2017 hoda, kali inflacyja płanujecca na ŭzroŭni 9%, — adpaviedna na hetuju vieličyniu moža vyraści fond zarpłaty respublikanskaha biudžetu.

Akramia taho, pavodle infarmacyi BiełaPAN, umovaj davańnia jeŭrazijskaha kredytu źjaŭlajucca abaviazacielstvy Biełarusi ŭ śfiery taryfnaj palityki na płatnyja pasłuhi. Havorka idzie, u pryvatnaści, ab tym, što ŭzrovień kampiensacyi nasielnictvam koštu žyllova-kamunalnych pasłuh vyraście ŭ 2016 hodzie da 50% (suprać 30% u 2015-m). U kancy 2017 hoda, jak čakajecca, nasielnictva budzie kampiensavać 70% koštu žyllova-kamunalnych pasłuh.

Anałahičnyja źmieny zapłanavanyja ŭ dačynieńni da transpartnych pasłuh. Miarkujecca, što da kanca 2016 hoda nasielnictva budzie pakryvać 65% koštu takich pasłuh (suprać 60% u 2015-m) i na 70% kampiensavać košt prajezdu ŭ hramadskim transparcie ŭ kancy 2017 hoda.

Umovaj vydzialeńnia jeŭrazijskaha kredytu taksama źjaŭlajecca libieralizacyja cen na tavary i pasłuhi (elektrasuviazi i paštovaj suviazi), jakija rehulujucca dziaržavaj.

Jak paviedamlałasia raniej, u studzieni 2016 hoda biełaruski ŭrad užo pryniaŭ pastanovu, što skaračaje pieralik sacyjalna značnych tavaraŭ i pasłuh, ceny na jakija rehuluje dziaržava. Ź pieraliku byli vyklučanyja chleb, miasa, jajka kurynaje, małočnyja pradukty, dziciačaje charčavańnie, asobnyja pasłuhi elektrasuviazi.

Umovy atrymańnia kredytu Jeŭrazijskaha fondu stabilizacyi i raźvićcia (JEFSR) Biełaruś uzhadniaje z Rasijaj užo pryblizna hod. Z zajaŭkaj na atrymańnie stabilizacyjnaha kredytu ŭ 3 młrd. dołaraŭ Biełaruś źviarnułasia ŭ JEFSR u sakaviku 2015 hoda. Paźniej padčas pieramoŭ suma kredytu była źnižanaja da 2 młrd. dołaraŭ. U lutym 2016 hoda paśla pasiadžeńnia Vyšejšaha dziaržsavieta Sajuznaj dziaržavy pasoł Rasii ŭ Biełarusi Alaksandr Surykaŭ zajaviŭ, što rašeńnie ab davańni jeŭrazijskaha kredytu Biełarusi «pryniataje kančatkova i biespavarotna» i najbližejšym časam kredytnaja prahrama budzie padpisanaja.

• 0
• 0
• 0
• 0
• 0
• 0
• 0
• 0