«Jak pačaŭ, to mikrafona ŭžo nie vyklučyš»: u Akademii navuk tłumačać, čamu zaprasili ź lekcyjaj čarnasocienca Baburyna
«Naša Niva» pisała, što na vychodnych u Minsku prajšła «navukovaja kanfierencyja «Suśvietny ład — supraćvaha suśvietnamu panavańniu».
Ad Rasii jaje arhanizoŭvali «Mižnarodnaja słavianskaja akademija» i «Usiesłavianski sajuz». Ad Biełarusi arhanizataram stała «hramadskaje abjadnańnie «Ruś», jakoje isnuje ŭ ščylnym kantakcie z «Rassupracoŭnictvam».
Na kanfierencyju sabralisia rasijskija čarnasociency, ale razam ź imi vystupali niekatoryja akademiki Akademii navuk Biełarusi.
Adzin z chedłajnieraŭ hetaj kanfierencyi, rasijski palityk impierskich pohladaŭ Siarhiej Baburyn, u piatnicu vystupiŭ ź lekcyjaj pra «jeŭrazijskuju intehracyju» u aktavaj zale Prezidyuma Akademii navuk.
My źviarnulisia ŭ NAN z pytańniem, navošta tudy zaprašali arhanizatara «ruskich maršaŭ» u jakaści śpikiera.
«U nas demakratyčnaja struktura i ŭ nas vystupajuć ludzi z roznymi pohladami i mierkavańniami, — skazała pres-sakratarka NAN Natalla Marcaleva. — U nas tut u zale prezidyuma i pra pinhvinaŭ palarniki dzieciam raskazvajuć, i pry kancy minułaha hodu była lekcyja pra čornyja dzirki, što ludzi ŭ kalidory słuchali — miescaŭ nie było. Kali my zaprašajem lektara, i jon pačynaje štości kazać, my ž nie možam jamu zabaraniać, vyklučać mikrafon».
«I lekcyja Baburyna prajšła nie ŭ kantekście toj kanfierencyi, pra jakuju vy pišacie. I Akademija navuk jaje [kanfierencyju] nie arhanizoŭvała. Baburyn vystupaŭ pa zaprašeńni Instytuta padrychtoŭki navukovych kadraŭ. Z kimści jon tam znajomy, jaho prosta zaprasili vystupić ź lekcyjaj, voś i ŭsio. Lepš źviartajciesia tudy», — skazała Natalla i trochi dadała pra samu kanfierencyju, pryśviečanuju «ruskamu ładu».
«A nakont šarłatanaŭ i hedak dalej ja chaču adno skazać. Nu na ŭsich ža možna jarłyki naviešać. Z toj «naaśfieraj» Nikicienki — jon prychilnik teoryi Viernadskaha, vystupaje na bujnych mižnarodnych forumach pa hetaj tematycy. Ale znoŭ ža, u mnohich navukoŭcaŭ nieadnaznačnaje staŭleńnie da teoryi naaśfiery. A Babosaŭ — viadomy naš sacyjołah, ale vystupaje i pa hieapalityčnych pytańniach. Ja tak dumaju, što navukoŭcaŭ prosta zaprasili, i jany nie toje kab padtrymlivajuć niejkija tam šavinistyčnyja pohlady, a prosta vystupili pa svajoj prablematycy, dzie jany ekśpierty. Ich zaprasili – jany pryjšli, voś jak. Jany ž akademiki i volnyja chadzić kudy chočuć, jany nie ŭzhadniajuć z nami. Heta ich pryvatnaja pazicyja», — skazała pres-sakratarka.
My i datelefanavalisia i ŭ Instytut padrychtoŭki navukovych kadraŭ pry Akademii navuk. Jaho rektar Valeryj Bielski paćvierdziŭ, što Baburyna zaprasili mienavita jany.
«Tak atrymałasia, što ŭ nas dziejničaje lekcyjny kłub i my daviedalisia, što Baburyn u Biełarusi. My jaho viedajem najpierš jak navukoŭca, jaho palityčnyja pohlady cikavyja nam u mienšaj stupieni. A jahony nieardynarny pohlad na palityčnuju situacyju ciažka padzialać u poŭnaj miery. Ale niekatoryja skazanyja im rečy byli spaznavaŭčyja», — skazaŭ Valeryj Bielski i zapeŭniŭ, što na trybunu NAN Baburyna pryviała nie jahonaja palityčnaja pazicyja.
«I ja nie pahadžusia, — dadaŭ rektar, — što ŭ nas vysadziŭsia ceły desant čarnasociencaŭ, jak vy pišacie. U pryncypie tolki adzin Baburyn u nas i vystupaŭ. Ja tam prysutničaŭ i mnie padałosia, što jon karektna vykazvaŭ svajo mierkavańnie. Zdavałsia, jon ujaŭlaŭ, dzie znachodzicca i jahonaja ŭ tym liku palityčnaja pazicyja była aściarožna vykazana, kab nie zakranuć palityčnyja i dziaržaŭnyja pohlady prysutnych u zale».
«Jon u bolšaj stupieni prosta razvažaŭ na palityčnyja temy, a nie zaklikaŭ da čahości. Zrešty, heta były deputat, trojčy deputat, ciažka čakać, što ŭ jaho nie budzie svaich palityčnych pohladaŭ. Ale ž vy bačycie, što jany nie vielmi papularnyja, kali ŭ dadzieny momant Baburyn nie deputat. Dy i anšłahu ŭ nas nie było, nie ŭsie jahonyja tezisy znajšli, tak by mović, vodhuk u sercach prysutnych. Što parobiš, kali adnyja bačać u Jeŭropie tolki hiejaŭ, a inšyja — tolki vysoki kulturny ŭzrovień. Takoje žyćcio», — padsumavaŭ navukoviec i dadaŭ, što jany i nadalej płanujem zaprašać roznych lektaraŭ.
Maŭlaŭ, nastupnym budzie ekanamist ź Izraila, proźvišča pakul trymajuć u sakrecie.
Ciapier čytajuć
Minski školnik praspaŭ prypynak. Ale kiroŭca aŭtobusa davioz jaho dadomu!2
Minski školnik praspaŭ prypynak. Ale kiroŭca aŭtobusa davioz jaho dadomu!
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary