«Як пачаў, то мікрафона ўжо не выключыш»: у Акадэміі навук тлумачаць, чаму запрасілі з лекцыяй чарнасоценца Бабурына 

«Наша Ніва» пісала, што на выходных у Мінску прайшла «навуковая канферэнцыя «Сусветны лад — супрацьвага сусветнаму панаванню».

Ад Расіі яе арганізоўвалі «Міжнародная славянская акадэмія» і «Усеславянскі саюз». Ад Беларусі арганізатарам стала «грамадскае аб’яднанне «Русь», якое існуе ў шчыльным кантакце з «Рассупрацоўніцтвам».

На канферэнцыю сабраліся расійскія чарнасоценцы, але разам з імі выступалі некаторыя акадэмікі Акадэміі навук Беларусі. 

Адзін з хэдлайнераў гэтай канферэнцыі, расійскі палітык імперскіх поглядаў Сяргей Бабурын, у пятніцу выступіў з лекцыяй пра «еўразійскую інтэграцыю» у актавай зале Прэзідыума Акадэміі навук. 

Мы звярнуліся ў НАН з пытаннем, навошта туды запрашалі арганізатара «рускіх маршаў» у якасці спікера. 

Павялічыць

«У нас дэмакратычная структура і ў нас выступаюць людзі з рознымі поглядамі і меркаваннямі, — сказала прэс-сакратарка НАН Наталля Марцалева. — У нас тут у зале прэзідыума і пра пінгвінаў палярнікі дзецям расказваюць, і пры канцы мінулага году была лекцыя пра чорныя дзіркі, што людзі ў калідоры слухалі — месцаў не было. Калі мы запрашаем лектара, і ён пачынае штосьці казаць, мы ж не можам яму забараняць, выключаць мікрафон».

«І лекцыя Бабурына прайшла не ў кантэксце той канферэнцыі, пра якую вы пішаце. І Акадэмія навук яе [канферэнцыю] не арганізоўвала. Бабурын выступаў па запрашэнні Інстытута падрыхтоўкі навуковых кадраў. З кімсьці ён там знаёмы, яго проста запрасілі выступіць з лекцыяй, вось і ўсё. Лепш звяртайцеся туды», — сказала Наталля і трохі дадала пра саму канферэнцыю, прысвечаную «рускаму ладу».

«А наконт шарлатанаў і гэдак далей я хачу адно сказаць. Ну на ўсіх жа можна ярлыкі навешаць. З той «наасферай» Нікіценкі — ён прыхільнік тэорыі Вернадскага, выступае на буйных міжнародных форумах па гэтай тэматыцы. Але зноў жа, у многіх навукоўцаў неадназначнае стаўленне да тэорыі наасферы. А Бабосаў — вядомы наш сацыёлаг, але выступае і па геапалітычных пытаннях. Я так думаю, што навукоўцаў проста запрасілі, і яны не тое каб падтрымліваюць нейкія там шавіністычныя погляды, а проста выступілі па сваёй праблематыцы, дзе яны эксперты. Іх запрасілі – яны прыйшлі, вось як. Яны ж акадэмікі і вольныя хадзіць куды хочуць, яны не ўзгадняюць з намі. Гэта іх прыватная пазіцыя», — сказала прэс-сакратарка.

Мы і датэлефанаваліся і ў Інстытут падрыхтоўкі навуковых кадраў пры Акадэміі навук. Яго рэктар Валерый Бельскі пацвердзіў, што Бабурына запрасілі менавіта яны.

«Так атрымалася, што ў нас дзейнічае лекцыйны клуб і мы даведаліся, што Бабурын у Беларусі. Мы яго ведаем найперш як навукоўца, яго палітычныя погляды цікавыя нам у меншай ступені. А ягоны неардынарны погляд на палітычную сітуацыю цяжка падзяляць у поўнай меры. Але некаторыя сказаныя ім рэчы былі спазнаваўчыя», — сказаў Валерый Бельскі і запэўніў, што на трыбуну НАН Бабурына прывяла не ягоная палітычная пазіцыя.

«І я не пагаджуся, — дадаў рэктар, — што ў нас высадзіўся цэлы дэсант чарнасоценцаў, як вы пішаце. У прынцыпе толькі адзін Бабурын у нас і выступаў. Я там прысутнічаў і мне падалося, што ён карэктна выказваў сваё меркаванне. Здавался, ён уяўляў, дзе знаходзіцца і ягоная ў тым ліку палітычная пазіцыя была асцярожна выказана, каб не закрануць палітычныя і дзяржаўныя погляды прысутных у зале».

«Ён у большай ступені проста разважаў на палітычныя тэмы, а не заклікаў да чагосьці. Зрэшты, гэта былы дэпутат, тройчы дэпутат, цяжка чакаць, што ў яго не будзе сваіх палітычных поглядаў. Але ж вы бачыце, што яны не вельмі папулярныя, калі ў дадзены момант Бабурын не дэпутат. Ды і аншлагу ў нас не было, не ўсе ягоныя тэзісы знайшлі, так бы мовіць, водгук у сэрцах прысутных. Што паробіш, калі адныя бачаць у Еўропе толькі геяў, а іншыя — толькі высокі культурны ўзровень. Такое жыццё», — падсумаваў навуковец і дадаў, што яны і надалей плануем запрашаць розных лектараў.

Маўляў, наступным будзе эканаміст з Ізраіля, прозвішча пакуль трымаюць у сакрэце.

• 0
• 0
• 0
• 0
• 0
• 0
• 0
• 0